ਪਟਿਆਲਾ, 26 ਜੂਨ 2026 : ਹਾਲ ਹੀ ਵਿਚ ਮਲੇਸ਼ੀਆ ਤੋਂ ਡਿਪੋਰਟ (Deportation from Malaysia) ਹੋ ਕੇ ਭਾਰਤ ਲਿਆਂਦੇ ਗਏ ਦੋਹਾਂ ਨੌਜਵਾਨਾਂ ਦਾ ਪਟਿਆਲਾ ਪੁਲਸ ਨੂੰ ਪੰਜ ਦਿਨਾਂ ਪੁਲਸ ਰਿਮਾਂਡ (Police remand) ਦਿੱਤਾ ਗਿਆ ਹੈ ।
ਪੁਲਸ ਨੇ ਮੰਗਿਆ ਸੀ 7 ਦਿਨ ਦਾ ਰਿਮਾਂਡ
ਸੱਤ ਦਿਨਾਂ ਦਾ ਪੁਲਸ ਰਿਮਾਂਡ ਖ਼ਤਮ ਹੋਣ `ਤੇ ਇਨ੍ਹਾਂ ਦੋਵਾਂ ਨੂੰ ਵੀਰਵਾਰ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਅਦਾਲਤ ਨੇ ਇਨ੍ਹਾਂ ਦਾ ਪੰਜ ਦਿਨਾਂ ਦਾ ਪੁਲਿਸ ਰਿਮਾਂਡ ਹੋਰ ਵਧਾ ਦਿੱਤਾ ਹੈ । ਪੁਲਸ ਨੇ ਰਿਮਾਂਡ ਦੌਰਾਨ ਉਕਤ ਜਾਣਕਾਰੀ ਮਿਲਣ ਤੋਂ ਬਾਅਦ ਤਫ਼ਤੀਸ਼ ਅੱਗੇ ਵਧਾਉਣ ਲਈ ਸੱਤ ਦਿਨਾਂ ਦਾ ਰਿਮਾਂਡ ਮੰਗਿਆ ਸੀ । ਡਾਟਾ ਰਿਕਵਰੀ ਅਤੇ ਬੰਦ ਕੀਤੇ ਗਏ ਫ਼ੋਨ ਨੰਬਰਾਂ ਦੀ ਡਿਟੇਲ ਹਾਸਲ ਕਰਨ ਲਈ ਪੁਲਸ ਨੇ ਰਿਮਾਂਡ ਵਧਵਾਇਆ ਹੈ, ਜਿਸ ਤੋਂ ਬਾਅਦ ਅਗਲੀ ਕਾਰਵਾਈ ਹੋਵੇਗੀ ।
ਕੀ ਸਾਹਮਣੇ ਆਇਆ ਪੁਲਸ ਜਾਂਚ ਦੌਰਾਨ
ਪੁਲਸ ਵਲੋਂ ਦੋਹਾਂ ਤੋਂ ਕੀਤੀ ਗਈ ਸ਼ੁਰੂਆਤੀ ਜਾਂਚ ਦੌਰਾਨ ਸਾਹਮਣੇ ਆਇਆ ਸ਼ੰਭੂ ਰੇਲਵੇ ਟਰੈਕ (Shambhu Railway Track) ’ਤੇ ਹੋਏ ਆਈ. ਈ. ਡੀ. ਧਮਾਕੇ ਦੇ ਮਾਮਲੇ ਵਿੱਚ ਮਲੇਸ਼ੀਆ ਤੋਂ ਡਿਪੋਰਟ ਹੋਏ ਦੋਵੇਂ ਮੁਲਜ਼ਮ ਮਲੇਸ਼ੀਆ ਵਿੱਚ ਦਿਨ ਵੇਲੇ ਗੋਲਗੱਪੇ ਵੇਚਦੇ ਸਨ ਅਤੇ ਰਾਤ ਨੂੰ ਸ਼ੰਭੂ ਧਮਾਕੇ ਦੀ ਯੋਜਨਾ ਬਣਾਉਦੇ ਸਨ । ਮੁਲਜ਼ਮਾਂ ਨੇ ਧਮਾਕੇ ਵਿੱਚ ਜਗਰੂਪ ਦੀ ਮੌਤ ਦੀ ਖ਼ਬਰ ਸੁਣਦਿਆਂ ਹੀ ਆਪਣਾ ਮੋਬਾਈਲ ਡਾਟਾ ਡਿਲੀਟ ਕਰ ਦਿੱਤਾ । ਘਨੌਰ ਦਾ ਰਹਿਣ ਵਾਲਾ ਮਨਜੀਤ ਸਿੰਘ ਸਾਲ 2019 ਵਿੱਚ ਮਲੇਸ਼ੀਆ ਗਿਆ ਸੀ, ਜਦੋਂਕਿ ਅੰਬਾਲਾ ਦਾ ਰਹਿਣ ਵਾਲਾ ਗੁਰਵਿੰਦਰ ਸਿੰਘ ਸਾਲ 2023 ਵਿੱਚ ਮਲੇਸ਼ੀਆ ਗਿਆ ਸੀ । ਇਸ ਦੌਰਾਨ ਜਗਰੂਪ ਸਿੰਘ ਵੀ ਮਲੇਸ਼ੀਆ ਘੁੰਮਣ ਗਿਆ ਸੀ, ਜਿੱਥੇ ਇਨ੍ਹਾਂ ਲੋਕਾਂ ਦੀ ਆਪਸ ਵਿੱਚ ਮੁਲਾਕਾਤ ਹੋਈ ਅਤੇ ਦੋਸਤੀ ਗੂੜ੍ਹੀ ਹੁੰਦੇ ਹੀ ਉਹ ਬਲਾਸਟ ਦੀ ਪਲੈਨਿੰਗ ਕਰਨ ਲੱਗੇ ।
ਦੋਵੇਂ ਮੁਲਜਮ ਕਰ ਰਹੇ ਸਨ ਜਗਰੂਪ ਦੇ ਖਾਤੇ ਵਿਚ ਪੈਸੇ ਟ੍ਰਾਂਸਫਰ
ਪੁਲਸ ਅਨੁਸਾਰ ਦੋਵੇਂ ਮੁਲਜ਼ਮ ਲੰਬੇ ਸਮੇਂ ਤੋਂ ਸ਼ੰਭੂ ਰੇਲਵੇ ਟਰੈਕ ਬਲਾਸਟ (Shambhu railway track blast) ਵਿੱਚ ਮਾਰੇ ਗਏ ਤਰਨਤਾਰਨ ਦੇ ਰਹਿਣ ਵਾਲੇ ਜਗਰੂਪ ਸਿੰਘ ਦੇ ਬੈਂਕ ਖਾਤੇ ਵਿੱਚ ਲਗਾਤਾਰ ਪੈਸੇ ਟ੍ਰਾਂਸਫਰ ਕਰ ਰਹੇ ਸਨ । ਘਟਨਾ ਤੋਂ ਪਹਿਲਾਂ ਵੀ ਮੁਲਜ਼ਮਾਂ ਵੱਲੋਂ ਉਸ ਦੇ ਖਾਤੇ ਵਿੱਚ ਵੱਡੀ ਰਕਮ ਭੇਜੀ ਗਈ ਸੀ । ਵਿੱਤੀ ਲੈਣ-ਦੇਣ ਦੇ ਇਨ੍ਹਾਂ ਸੁਰਾਗਾਂ ਦੇ ਅਧਾਰ `ਤੇ ਦੋਵੇਂ ਜਾਂਚ ਏਜੰਸੀਆਂ ਦੇ ਰਡਾਰ `ਤੇ ਆ ਗਏ ਸਨ ।
ਹੁਣ ਤੱਕ ਚਾਰ ਵਿਅਕਤੀ ਕੀਤੇ ਜਾ ਚੁੱਕੇ ਹਨ ਗ੍ਰਿਫ਼ਤਾਰ
ਮਲੇਸ਼ੀਆ ਵਿੱਚ ਬੈਠੇ ਮੁਲਜ਼ਮ ਇਸ ਪੂਰੀ ਸਾਜਿ਼ਸ਼ ਦਾ ਸੰਚਾਲਨ ਕਰ ਰਹੇ ਸਨ । ਡਿਪੋਰਟ ਕੀਤੇ ਗਏ ਦੋਵੇਂ ਮੁਲਜ਼ਮ ਵਿਦੇਸ਼ੀ ਖਾਤਿਆਂ ਰਾਹੀਂ ਪੰਜਾਬ ਵਿੱਚ ਸਰਗਰਮ ਆਪਰੇਟਿਵਾਂ ਤੱਕ ਅੱਤਵਾਦੀ ਫੰਡ ਪਹੁੰਚਾਉਣ, ਹਮਲਿਆਂ ਦੀ ਯੋਜਨਾ ਤਿਆਰ ਕਰਨ ਅਤੇ ਸੂਬੇ ਵਿੱਚ ਸ਼ਾਂਤੀ ਤੇ ਕਾਨੂੰਨ-ਵਿਵਸਥਾ ਨੂੰ ਭੰਗ ਕਰਨ ਦੀ ਸਾਜਿਸ਼ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਅ ਰਹੇ ਸਨ । ਇਸ ਮਾਮਲੇ ਵਿੱਚ ਹੁਣ ਤੱਕ ਚਾਰ ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ (Arrest) ਹੋ ਚੁੱਕੀ ਹੈ ।
ਕੇਂਦਰੀ ਏਜੰਸੀਆਂ ਨੂੰ ਜਾਂਚ ਦੌਰਾਨ ਕਾਫੀ ਮਾਤਰਾ ਵਿਚ ਹਥਿਆਰ ਵੀ ਮਿਲੇ ਸਨ
ਜਾਂਚ ਦੌਰਾਨ ਪੁਲਸ ਅਤੇ ਕੇਂਦਰੀ ਏਜੰਸੀਆਂ (Central agencies) ਨੇ ਆਰ. ਪੀ. ਜੀ. ਲਾਂਚਰ, ਆਈ. ਈ. ਡੀ., ਆਰ. ਡੀ. ਐਕਸ, ਹੈਂਡ ਗ੍ਰਨੇਡ, ਆਧੁਨਿਕ ਪਿਸਤੌਲਾਂ ਅਤੇ ਵੱਡੀ ਗਿਣਤੀ ਵਿੱਚ ਕਾਰਤੂਸ ਵੀ ਬਰਾਮਦ ਕੀਤੇ ਸਨ । ਬਰਾਮਦ ਹਥਿਆਰਾਂ ਅਤੇ ਵਿਸਫੋਟਕਾਂ ਨੇ ਜਾਂਚ ਏਜੰਸੀਆਂ ਦੀ ਚਿੰਤਾ ਹੋਰ ਵਧਾ ਦਿੱਤੀ ਸੀ, ਕਿਉਂਕਿ ਇਸ ਨਾਲ ਇੱਕ ਵੱਡੇ ਅੱਤਵਾਦੀ ਨੈੱਟਵਰਕ ਦੇ ਸਰਗਰਮ ਹੋਣ ਦੇ ਸੰਕੇਤ ਮਿਲੇ ਸਨ ।
