ਬੈਂਕਾਕ, 10 ਸਤੰਬਰ 2026 : ਥਾਈਲੈਂਡ (Thailand) ਦੇ ਪੂਰਬੀ ਹਿੱਸੇ ‘ਚ ਬੰਦੂਕਧਾਰੀ ਵਲੋਂ ਬਾਲ ਵਾਟਿਕਾ ਸਕੂਲ ਦੀ ਇਮਾਰਤ ਦੇ ਅੰਦਰ ਇਕ ਅਧਿਆਪਕਾ ਦਾ ਗੋਲੀ ਮਾਰ ਕੇ ਕਤਲ (Murder) ਕਰ ਦਿੱਤਾ ਗਿਆ ਹੈ ।
ਕੀ ਦੱਸਿਆ ਪੁਲਸ ਅਧਿਕਾਰੀਆਂ ਨੇ
ਉਪਰੋਕਤ ਵਾਪਰੇ ਗੋਲੀਬਾਰੀ (Shooting) ਦੇ ਘਟਨਾਕ੍ਰਮ ਸਬੰਧੀ ਜਾਣਕਾਰੀ ਦਿੰਦਿਆਂ ਪੁਲਸ ਅਧਿਕਾਰੀਆਂ ਨੇ ਦੱਸਿਆ ਕਿ ਘਟਨਾ ਦੌਰਾਨ 44 ਬੱਚਿਆਂ ਅਤੇ ਤਿੰਨ ਹੋਰ ਅਧਿਆਪਕਾਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ । ਇਹ ਗੋਲੀਬਾਰੀ ਸਵੇਰੇ ਦੀ ਲੱਗਭਗ 11 ਵਜੇ ਬੈਂਕਾਕ ਤੋਂ ਲੱਗਭਗ 150 ਕਿਲੋਮੀਟਰ ਦੱਖਣ-ਪੂਰਬ ‘ਚ ਚੋਨਬੁਰੀ ਸੂੁਬੇ ਵਿਚ ਸਥਿਤ ‘ਨੋਂਗਪਲਲਾਈ ਮਿਊਂਸਪਲ ਕਿੰਡਰਗਾਰਟਨ` ਦੀ ਇਕ ਇਮਾਰਤ ਦੇ ਅੰਦਰ ਹੋਈ ।
ਪੁਲਸ ਨੂੰ ਸ਼ੱਕ ਹੈ ਕਿ ਬੰਦੂਕਧਾਰੀ ਵਿਅਕਤੀ ਮ੍ਰਿਤਕ ਅਧਿਆਪਕਾ ਦਾ ਹੀ ਪਤੀ ਹੈ
ਚੋਨਬੁਰੀ ਸੂਬਾਈ ਸਰਕਾਰ ਦੇ ਅਨੁਸਾਰ ਸਾਰੇ 44 ਵਿਦਿਆਰਥੀ ਸੁਰੱਖਿਅਤ ਰਹੇ ਅਤੇ ਗੋਲੀਬਾਰੀ ਤੋਂ ਬਾਅਦ ਉਨ੍ਹਾਂ ਨੂੰ ਹੋਰ ਅਧਿਆਪਕਾਂ ਦੇ ਨਾਲ ਸਕੂਲ ਤੋਂ ਬਾਹਰ ਕੱਢ ਲਿਆ ਗਿਆ । ਅਧਿਕਾਰੀਆਂ ਨੇ ਦੱਸਿਆ ਕਿ ਗੋਲੀ ਚਲਾਉਣ ਵਾਲਾ ਵਿਅਕਤੀ ਘਟਨਾ ਸਥਾਨ ਤੋਂ ਫਰਾਰ ਹੋ ਗਿਆ । ਅਜਿਹਾ ਸ਼ੱਕ ਹੈ ਕਿ ਉਹ ਮ੍ਰਿਤਕ ਅਧਿਆਪਕਾ ਦਾ ਪਤੀ ਹੈ । ਪੁਲਸ ਨੇ ਉਸ ਦੇ ਟਿਕਾਣੇ ਨੂੰ ਘੇਰ ਲਿਆ ਹੈ ।
ਕੀ ਦੱਸਿਆ ਗਵਰਨਰ ਦਫ਼ਤਰ ਨੇ
ਚੋਨਬੁਰੀ ਦੇ ਗਵਰਨਰ ਦਫ਼ਤਰ ਨੇ ਦੱਸਿਆ ਕਿ ਗਵਰਨਰ ਨਾਰਿਤ ਨਿਰਾਮਾਈਵੋਂਗ ਨੇ ਸਕੂਲ ਨੂੰ ਬੰਦ ਕਰਨ ਦਾ ਹੁਕਮ ਦਿੱਤਾ ਹੈ । ਅਗਸਤ ਵਿਚ 14 ਸਾਲਾ ਇਕ ਵਿਦਿਆਰਥੀ ਨੇ ਆਪਣੇ ਹਾਈ ਸਕੂਲ ਅਤੇ ਘਰ ‘ਚ ਗੋਲੀਬਾਰੀ ਕਰ ਕੇ ਅੱਠ ਲੋਕਾਂ ਦਾ ਕਤਲ ਕਰ ਦਿੱਤਾ ਸੀ ।
