ਹੁਣ ਤੱਕ ਲੋਕ ATM ਰਾਹੀਂ ਪੈਸੇ ਕਢਵਾਉਂਦੇ ਸਨ ਪਰ ਹੁਣ ਉਹ ATM ਰਾਹੀਂ ਸੋਨਾ ਵੀ ਕਢਵਾ ਸਕਿਆ ਕਰਨਗੇ। ਹੁਣ ਅਜਿਹੀ ਸਹੂਲਤ ਸ਼ੁਰੂ ਕੀਤੀ ਗਈ ਹੈ, ਜਿਸ ਰਾਹੀਂ ਤੁਸੀਂ ATM ਤੋਂ ਸੋਨਾ ਕਢਵਾ ਸਕੋਗੇ। ਦਰਅਸਲ ਤੇਲੰਗਾਨਾ ਦੀ ਰਾਜਧਾਨੀ ਹੈਦਰਾਬਾਦ ਵਿੱਚ ਪਹਿਲਾ ਰੀਅਲ ਟਾਈਮ ਗੋਲਡ ਏਟੀਐਮ ਲਗਾਇਆ ਗਿਆ ਹੈ। ਇਸ ਰੀਅਲ ਟਾਈਮ ਗੋਲਡ ਏਟੀਐਮ ਤੋਂ ਸੋਨੇ ਦੇ ਸਿੱਕੇ ਕਢਵਾਏ ਜਾ ਸਕਦੇ ਹਨ।
ਹੈਦਰਾਬਾਦ ਸਥਿਤ ਕੰਪਨੀ ਗੋਲਡਸਿੱਕਾ ਪ੍ਰਾਈਵੇਟ ਲਿਮਟਿਡ ਨੇ ਓਪਨਕਿਊਬ ਟੈਕਨਾਲੋਜੀ ਦੀ ਮਦਦ ਨਾਲ ਇਹ ਏ.ਟੀ.ਐੱਮ. ਲਗਾਇਆ ਹੈ, ਜਿਸ ਰਾਹੀਂ ਸੋਨੇ ਦੇ ਸਿੱਕੇ ਖਰੀਦਣ ਲਈ ਗਾਹਕ ਡੈਬਿਟ ਜਾਂ ਕ੍ਰੈਡਿਟ ਕਾਰਡ ਦੀ ਵਰਤੋਂ ਕਰ ਸਕਦੇ ਹਨ।
ਗੋਲਡਸਿੱਕਾ ਦੇ ਸੀ.ਈ.ਓ., ਸੀ. ਤਰੁਜ, ਜੋ ਕਿ ਸੋਨਾ ਖਰੀਦਣ ਅਤੇ ਵੇਚਣ ਦਾ ਕਾਰੋਬਾਰ ਕਰੇ ਹਨ, ਮੁਤਾਬਕ, ਲੋਕ ਇਸ ATM ਦੀ ਵਰਤੋਂ ਕਰਕੇ 0.5 ਗ੍ਰਾਮ ਤੋਂ 100 ਗ੍ਰਾਮ ਤੱਕ ਦੇ ਸੋਨੇ ਦੇ ਸਿੱਕੇ ਖਰੀਦ ਸਕਦੇ ਹਨ। ਇਸ ATM ‘ਤੇ ਸੋਨੇ ਦੀ ਕੀਮਤ ਲਾਈਵ ਅਪਡੇਟ ਕੀਤੀ ਜਾਵੇਗੀ। ਗੋਲਡ ਏਟੀਐਮ ਸੇਵਾ 24 ਘੰਟੇ ਉਪਲਬਧ ਹੋਵੇਗੀ। ਹੈਦਰਾਬਾਦ ਦੀ ਗੋਲਡ ਕੋਇਨ ਕੰਪਨੀ ਨੇ ਗੋਲਡ ਏਟੀਐਮ ਮਸ਼ੀਨ ਲਗਾਈ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਦੇਸ਼ ਦੀ ਪਹਿਲੀ ਰੀਅਲ-ਟਾਈਮ ਗੋਲਡ ਡਿਸਪੈਂਸਿੰਗ ਮਸ਼ੀਨ ਹੈ। ਫਰਮ ਦਾ ਪਹਿਲਾ ਏਟੀਐਮ ਅਸ਼ੋਕਾ ਰਘੁਪਤੀ ਚੈਂਬਰ, ਬੇਗਮਪੇਟ ਵਿਖੇ ਲਗਾਇਆ ਗਿਆ ਹੈ। ਫਰਮ ਦੇ ਅਨੁਸਾਰ ਇਹ ਵਰਤਣ ਵਿੱਚ ਆਸਾਨ ਹੈ ਅਤੇ 24×7 ਉਪਲਬਧ ਹੈ।
ATM ਤੋਂ ਸੋਨਾ ਕਿਵੇਂ ਖਰੀਦੀਏ?
ਗਾਹਕ ਏਟੀਐਮ ਤੋਂ ਸੋਨਾ ਖਰੀਦਣ ਲਈ ਆਪਣੇ ਡੈਬਿਟ, ਕ੍ਰੈਡਿਟ ਕਾਰਡ ਦੀ ਵਰਤੋਂ ਕਰ ਸਕਦੇ ਹਨ। ਸਭ ਤੋਂ ਪਹਿਲਾਂ ਉਹਨਾਂ ਨੂੰ ਗੋਲਡ ਏਟੀਐਮ ਵਿੱਚ ਆਪਣਾ ਡੈਬਿਟ/ਕ੍ਰੈਡਿਟ ਕਾਰਡ ਪਾਉਣ ਅਤੇ ਪਿੰਨ ਦਰਜ ਕਰਨ ਦੀ ਲੋੜ ਹੁੰਦੀ ਹੈ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਕਿੰਨਾ ਸੋਨਾ ਖਰੀਦਣਾ ਹੈ, ਉਸ ਨੂੰ ਦਰਜ ਕਰਨਾ ਹੋਵੇਗਾ। ਭੁਗਤਾਨ ਪੂਰਾ ਹੋਣ ਤੋਂ ਬਾਅਦ ਸੋਨਾ ਬਾਹਰ ਆ ਜਾਵੇਗਾ। ਸੋਨੇ ਦੀਆਂ ਕੀਮਤਾਂ ਦੇ ਅੱਪਡੇਟ ਲਾਈਵ ਕੀਮਤਾਂ ‘ਤੇ ਆਧਾਰਿਤ ਹਨ।
ਗੋਲਡਸਿੱਕਾ ਦੇ ਮੀਤ ਪ੍ਰਧਾਨ ਪ੍ਰਤਾਪ ਨੇ ਦੱਸਿਆ ਕਿ ਏਟੀਐਮ ਵਿੱਚ 5 ਕਿਲੋ ਸੋਨਾ ਰੱਖਣ ਦੀ ਸਮਰੱਥਾ ਹੈ। ਇਸ ਦੀ ਕੀਮਤ ਕਰੀਬ 2-3 ਕਰੋੜ ਰੁਪਏ ਹੈ। ATM ਮਸ਼ੀਨ 0.5 ਗ੍ਰਾਮ ਤੋਂ ਲੈ ਕੇ 100 ਗ੍ਰਾਮ ਤੱਕ ਦੇ ਸਿੱਕੇ ਕੱਢ ਸਕਦੀ ਹੈ। 0.5 ਗ੍ਰਾਮ, 1 ਗ੍ਰਾਮ, 2 ਗ੍ਰਾਮ, 5 ਗ੍ਰਾਮ, 10 ਗ੍ਰਾਮ, 20 ਗ੍ਰਾਮ, 50 ਗ੍ਰਾਮ ਅਤੇ 100 ਗ੍ਰਾਮ ਸਮੇਤ ਅੱਠ ਵਿਕਲਪ ਉਪਲਬਧ ਹਨ।
ਜੇ ਪੈਸੇ ਡੈਬਿਟ ਕਰਨ ਤੋਂ ਬਾਅਦ ਸੋਨਾ ਪ੍ਰਾਪਤ ਨਹੀਂ ਹੁੰਦਾ ਤਾਂ ਕੀ ਹੋਵੇਗਾ?
ਸੁਰੱਖਿਆ ਲਈ, ਮਸ਼ੀਨ ਵਿੱਚ ਇਨਬਿਲਟ ਕੈਮਰਾ, ਅਲਾਰਮ ਸਿਸਟਮ, ਬਾਹਰੀ ਸੀਸੀਟੀਵੀ ਕੈਮਰੇ ਵਰਗੀਆਂ ਚੀਜ਼ਾਂ ਹਨ। ਗਾਹਕਾਂ ਦੀ ਸਹੂਲਤ ਲਈ ਇੱਕ ਗਾਹਕ ਸਹਾਇਤਾ ਟੀਮ ਵੀ ਹੈ। ਇਸ ਦੇ ਨਾਲ ਹੀ ਪ੍ਰਤਾਪ ਨੇ ਦੱਸਿਆ ਕਿ ਜੇਕਰ ਰਕਮ ਡੈਬਿਟ ਹੋਣ ਤੋਂ ਬਾਅਦ ਵੀ ਸੋਨਾ ਨਹੀਂ ਨਿਕਲਦਾ ਹੈ ਤਾਂ ਲੈਣ-ਦੇਣ ਦੇ 24 ਘੰਟਿਆਂ ਦੇ ਅੰਦਰ ਪੈਸੇ ਵਾਪਸ ਕਰ ਦਿੱਤੇ ਜਾਣਗੇ। ਸਾਡੇ ਕੋਲ ਕਿਸੇ ਵੀ ਕਿਸਮ ਦੀ ਸਹਾਇਤਾ ਲਈ ਸਮਰਪਿਤ ਗਾਹਕ ਸਹਾਇਤਾ ਹੈ।