ਪੰਜਾਬ ਸਰਕਾਰ ਗੰਨ ਕਲਚਰ ਨੂੰ ਪ੍ਰਮੋਟ ਕਰਨ ਵਾਲਿਆਂ ਖਿਲਾਫ ਲਗਾਤਾਰ ਐਕਸ਼ਨ ਲੈ ਰਹੀ ਹੈ। ਆਮ ਆਦਮੀ ਪਾਰਟੀ ਦੀ ਪੰਜਾਬ ਸਰਕਾਰ ਵੱਲੋਂ ਸੂਬੇ ਵਿੱਚ ਗੰਨ ਕਲਚਰ ਨੂੰ ਰੋਕਣ ਲਈ ਕੀਤੀ ਗਈ ਸਖਤੀ ਕਾਰਨ ਹੁਣ ਤੱਕ ਅਨੇਕਾਂ ਉਹਨਾਂ ਲੋਕਾਂ ’ਤੇ ਪੁਲਿਸ ਪਰਚੇ ਦਰਜ ਕਰ ਚੁੱਕੀ ਹੈ ਜਿਹਨਾਂ ਦੀਆਂ ਫੋਟੋਆਂ ਹਥਿਆਰਾਂ ਦੇ ਨਾਲ ਸੋਸ਼ਲ ਮੀਡੀਆਂ ’ਤੇ ਪਾਈਆਂ ਗਈਆਂ ਸਨ।
ਇਸਦਾ ਫਾਇਦਾ ਲੈਣ ਲਈ ਕੁੱਝ ਲੋਕ ਆਪਣੀਆਂ ਪੁਰਾਣੀਆਂ ਰੰਜ਼ਿਸ਼ਾਂ ਵੀ ਕੱਢਣ ਲੱਗੇ ਨੇ ਜਿਸਨੂੰ ਦੇਖਦਿਆਂ ਮੁੱਖ ਮੰਤਰੀ ਮਾਨ ਨੇ 3 ਦਿਨ ਦਾ ਸਮਾਂ ਦਿੰਦਿਆਂ ਸਾਰਿਆਂ ਨੂੰ ਆਪਣੀਆਂ ਪੁਰਾਣੀਆਂ ਤਸਵੀਰਾਂ ਸੋਸ਼ਲ ਮੀਡੀਆ ਤੋਂ ਹਟਾਉਣ ਲਈ ਕਿਹਾ ਹੈ। ਇਸ ਲਈ ਸਰਕਾਰ ਵੱਲੋਂ ਲੋਕਾਂ ਨੂੰ 72 ਘੰਟੇ ਦਾ ਸਮਾਂ ਦਿੱਤਾ ਗਿਆ ਹੈ। ਇਸੇ ਦੌਰਾਨ ਸੋਸ਼ਲ ਮੀਡੀਆਂ ’ਤੇ ਗਾਇਕ ਬੱਬੂ ਮਾਨ, ਮੰਤਰੀ ਅਨਮੋਲ ਗਗਨ ਮਾਨ ਤੇ ਸੋਨੀਆਂ ਮਾਨ ਦੀਆਂ ਤਸਵੀਰਾਂ ਵਾਲੇ ਡੁਪਲੀਕੇਟ ਕ੍ਰਿਏਟਿਵ ਬਣਾਕੇ ਕੁੱਝ ਲੋਕਾਂ ਵੱਲੋਂ ਆਨ ਏਅਰ ਦੇ ਨਾਮ ਹੇਠ ਅਪਲੋਡ ਕੀਤੇ ਗਏ ਹਨ।
ਇਸ ਫੇਕ ਪੋਸਟ ’ਚ ਬੱਬੂ ਮਾਨ ਦੇ ਗੀਤ ਦੀਆਂ ਸਤਰਾਂ ਲਿਖ ਕੇ ਗਲਤ ਤਰੀਕੇ ਨਾਲ ਅਪਲੋਡ ਕੀਤਾ ਗਿਆ ਜਿਸਤੋਂ ਪਾਠਕਾਂ ਤੇ ਦਰਸ਼ਕਾਂ ਨੂੰ ਸੁਚੇਤ ਰਹਿਣ ਦੀ ਲੋੜ੍ਹ ਹੈ।
ਇਸੇ ਤਰ੍ਹਾਂ ਨਾਲ ਮੰਤਰੀ ਅਨਮੋਲ ਗਗਨ ਮਾਨ ਤੇ ਸੋਨੀਆ ਮਾਨ ਦੀਆਂ ਪੁਰਾਣੀਆਂ ਤਸਵੀਰਾਂ ਲੈ ਕੇ ਸ਼ਰਾਰਤੀ ਅਨਸਰਾਂ ਵੱਲੋ ਫੇਕ ਪੋਸਟਾਂ ਆਨ ਏਅਰ ਦੇ ਨਾਮ ਹੇਠ ਅਪਲੋਡ ਕੀਤੀਆਂ ਗਈਆਂ ਹਨ ਜਿਹਨਾਂ ਦੀ ਆਨ ਏਅਰ ਕਰੜੀ ਨਿੰਦਾ ਕਰਦਾ ਹੈ।
ਇਸਦੇ ਨਾਲ ਹੀ ਜਿਹਨਾਂ ਸ਼ਰਾਰਤੀ ਅਨਸਰਾਂ ਵੱਲੋਂ ਇਹ ਫੇਕ ਪੋਸਟਾਂ ਅਪਲੋਡ ਕੀਤੀਆਂ ਗਈਆਂ ਨੇ ਆਨ ਏਅਰ ਉਹਨਾਂ ਵਿਰੁੱਧ ਜਲਦ ਕਾਨੂੰਨੀ ਕਾਰਵਾਈ ਵੀ ਕਰਨ ਜਾ ਰਿਹਾ ਹੈ। ਪਾਠਕਾਂ ਤੇ ਦਰਸ਼ਕਾਂ ਨੂੰ ਅਪੀਲ ਹੈ ਕਿ ਉਹ ਅਸਲੀ ਤੇ ਨਕਲੀ ਵਿਚਲਾ ਫਰਕ ਜ਼ਰੂਰ ਪਹਿਚਾਣਨ ਅਤੇ ਫੇਕ ਪੋਸਟਾਂ ਨੂੰ ਅੱਗੇ ਸਾਝਾਂ ਕਰਨ ਤੋਂ ਗੁਰੇਜ਼ ਕਰਨ।
