ਫਿਰੋਜ਼ਪੁਰ ਸ਼ਹਿਰ ‘ਚ ਚਾਈਨਾ ਡੋਰ ਕਾਰਨ ਵਾਪਰੇ ਇੱਕ ਦਰਦਨਾਕ ਹਾਦਸੇ ਵਿਚ ਚਾਰ ਸਾਲਾ ਬੱਚੀ ਦੀ ਮੌਤ ਹੋ ਗਈ ਜਦੋਂ ਕਿ ਉਸ ਦੀ ਮਾਂ ਵੀ ਜ਼ਖ਼ਮੀ ਹੋ ਗਈ। ਹਾਦਸਾ ਉਸ ਵੇਲੇ ਵਾਪਰਿਆ ਜਦੋਂ 4 ਸਾਲਾ ਬੱਚੀ ਐਸ਼ਲੀਨ ਕੌਰ ਦੀ ਮਾਂ ਉਸ ਨੂੰ ਸਕੂਲ ਤੋਂ ਐਕਟਿਵਾ ‘ਤੇ ਲੈ ਕੇ ਘਰ ਜਾ ਰਹੀ ਸੀ। ਦਰਦਨਾਕ ਹਾਦਸੇ ਸਬੰਧੀ ਪਤਾ ਲੱਗਦਿਆਂ ਹੀ ਚੁਫ਼ੇਰੇ ਸੋਗ ਦੀ ਲਹਿਰ ਹੈ।
ਇਸ ਸੰਬੰਧੀ ਵਧੇਰੇ ਜਾਣਕਾਰੀ ਦਿੰਦਿਆਂ ਮ੍ਰਿਤਕ ਬੱਚੀ ਦੇ ਪਿਤਾ ਦਲਜੀਤ ਸਿੰਘ ਨੇ ਦੱਸਿਆ ਕਿ ਉਸ ਦੀ ਪਤਨੀ ਸੋਮਵਾਰ ਨੂੰ ਉਨ੍ਹਾਂ ਦੀ ਚਾਰ ਸਾਲਾ ਬੇਟੀ ਐਸ਼ਲੀਨ ਨੂੰ ਸਕੂਲੋਂ ਲੈ ਕੇ ਆ ਰਹੀ ਸੀ ਕਿ ਸਥਾਨਕ ਸ਼ੇਖਾਂ ਵਾਲੀ ਬਸਤੀ ਦੇ ਨਜ਼ਦੀਕ ਅਗਰਵਾਲ ਪੈਟਰੋਲ ਪੰਪ ਕੋਲ ਚਾਈਨਾ ਡੋਰ ਉਨ੍ਹਾਂ ਦੀ ਬੱਚੀ ਦੀ ਗਰਦਨ ‘ਤੇ ਲਪੇਟੀ ਗਈ। ਇਸ ਦੌਰਾਨ ਡੋਰ ਹਟਾਉਣ ਦੀ ਜੱਦੋਜਹਿਦ ਵਿਚ ਬੱਚੀ ਦੀ ਮਾਂ ਦਾ ਅੰਗੂਠਾ ਵੀ ਕੱਟਿਆ ਗਿਆ। ਗੰਭੀਰ ਜ਼ਖ਼ਮੀ ਹਾਲਤ ਵਿੱਚ ਦੋਵਾਂ ਨੂੰ ਸਥਾਨਕ ਨਿੱਜੀ ਹਸਪਤਾਲ ਵਿਖੇ ਲਿਜਾਇਆ ਗਿਆ ਜਿੱਥੇ ਬੀਤੀ ਦੇਰ ਰਾਤ ਐਸ਼ਲੀਨ ਦੀ ਮੌਤ ਹੋ ਗਈ।
ਦੱਸਣਯੋਗ ਹੈ ਕਿ ਬਸੰਤ ਪੰਚਮੀ ਵਾਲੇ ਦਿਨ ਸ਼ਹਿਰ ਵਿੱਚ ਚੀਨੀ ਡੋਰ ਦੀ ਵਰਤੋਂ ਕੀਤੀ ਜਾ ਰਹੀ ਸੀ ਪਰ ਪੁਲਿਸ ਪ੍ਰਸ਼ਾਸਨ ਕੁੰਭਕਰਨੀ ਨੀਂਦ ਸੁੱਤਾ ਪਿਆ ਸੀ, ਜਿਸ ਦੀ ਕੀਮਤ ਇੱਕ ਮਾਸੂਮ ਬੱਚੀ ਨੂੰ ਭੁਗਤਣੀ ਪਈ। ਹਾਲਾਂਕਿ ਤਿਉਹਾਰ ਤੋਂ ਪਹਿਲਾਂ ਪੁਲਿਸ ਦੁਆਰਾ ਚੀਨੀ ਧਾਗੇ ਦੀਆਂ ਕੁਝ ਹੀ ਬਰਾਮਦਗੀਆਂ ਕੀਤੀਆਂ ਗਈਆਂ ਸਨ।