ਓਟਾਵਾ : ਕੈਨੇਡਾ ਦੀ ਕਰੀਬ 50.08 ਫੀਸਦੀ ਆਬਾਦੀ ਨੂੰ ਸ਼ਨੀਵਾਰ ਦੁਪਹਿਰ ਤੱਕ ਕੋਵਿਡ – 19 ਵੈਕਸੀਨ ਦੀ ਪਹਿਲੀ ਖੁਰਾਕ ਅਤੇ 4.3 ਫੀਸਦੀ ਨੂੰ ਦੂਜੀ ਖੁਰਾਕ ਦੇ ਦਿੱਤੀ ਗਈ ਹੈ।ਖ਼ਬਰਾਂ ਅਨੁਸਾਰ 3.8 ਕਰੋੜ ਆਬਾਦੀ ਵਾਲੇ ਦੇਸ਼ ਨੇ 2 ਕਰੋੜ ਤੋਂ ਜ਼ਿਆਦਾ ਲੋਕਾਂ ਨੂੰ ਵੈਕਸੀਨ ਦੀ ਖੁਰਾਕ ਦਿੱਤੀ ਹੈ।
ਸ਼ਨੀਵਾਰ ਨੂੰ ਕੈਨੇਡਾ ਦੀ ਪਬਲਿਕ ਸਿਹਤ ਏਜੰਸੀ ਅਨੁਸਾਰ,”ਪਿਛਲੇ ਹਫ਼ਤੇ ਅਸੀਂ ਕੋਵਿਡ-19 ਟੀਕਿਆਂ ਦੀ ਵੰਡ ਅਤੇ ਟੀਕਾਕਰਨ ਕਵਰੇਜ ‘ਚ ਕੁਝ ਅਦਭੁੱਤ ਮੀਲ ਪੱਥਰ ਦਰਸਾਏ, ਜਿਸ ‘ਚ ਹਫ਼ਤੇ ਦੇ ਅਖੀਰ ਤੋਂ ਪਹਿਲਾਂ ਟੀਕੇ ਦੀਆਂ 4.5 ਮਿਲੀਅਨ ਖੁਰਾਕਾਂ ਦੀ ਡਿਲੀਵਰੀ ਅਤੇ ਦੇਸ਼ ਭਰ ਵਿਚ ਲਗਭਗ 20 ਮਿਲੀਅਨ ਟੀਕੇ ਪਹੁੰਚਾਉਣਾ ਸ਼ਾਮਿਲ ਹੈ।” ਮੁੱਖ ਜਨ ਸਿਹਤ ਅਧਿਕਾਰੀ ਥੇਰੇਸਾ ਟੈਮ ਨੇ ਸ਼ਨੀਵਾਰ ਨੂੰ ਕਿਹਾ ਕਿ ਜਿਵੇਂ ਕਿ ਟੀਕਿਆਂ ਦੀ ਵੰਡ ਤੇਜ਼ ਗਤੀ ਨਾਲ ਜਾਰੀ ਹੈ ਇਸ ਨਾਲ ਇਹ ਆਸ ਵੱਧ ਰਹੀ ਹੈ ਕਿ ਕੋਵਿਡ-19 ਟੀਕਾਕਰਣ ਵਲੋਂ ਵਿਆਪਕ ਅਤੇ ਸਥਾਈ ਛੋਟ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।”
ਦੱਸਿਆ ਜਾ ਰਿਹਾ ਹੈ ਕਿ ਦੇਸ਼ ਦੇ ਤਾਜ਼ਾ ਰਾਸ਼ਟਰੀ ਪੱਧਰ ਦੇ ਅੰਕੜਿਆਂ ਤੋਂ ਪਤਾ ਚੱਲਦਾ ਹੈ ਕਿ ਬਿਮਾਰੀ ਦੀਆਂ ਗਤੀਵਿਧੀਆਂ ‘ਚ ਲਗਾਤਾਰ ਗਿਰਾਵਟ ਦਰਜ ਕੀਤੀ ਗਈ ਹੈ ਅਤੇ ਪਿਛਲੇ ਸੱਤ ਦਿਨਾਂ ਦੀ ਮਿਆਦ ਵਿਚ ਰੋਜ਼ਾਨਾ ਔਸਤਨ 5,004 ਕੇਸ ਸਾਹਮਣੇ ਆਏ ਹਨ, ਜੋ ਪਿਛਲੇ ਹਫ਼ਤੇ ਦੇ ਮੁਕਾਬਲੇ 26 ਪ੍ਰਤੀਸ਼ਤ ਘੱਟ ਹਨ।
