ਲੰਡਨ, 28 ਮਈ 2026 : ਵਿਦੇਸ਼ੀ ਮੁਲਕ ਬ੍ਰਿਟੇਨ (Britain) ਵਿਖੇ ਔਰਤ ਦਾ ਗਲਾ ਘੁਟ ਕੇ ਕਤਲ ਕਰਨ ਦੇ ਮਾਮਲੇ ਵਿਚ ਭਾਰਤੀ ਮੂਲ ਦੇ ਇਕ ਵਿਅਕਤੀ ਨੂੰ 29 ਸਾਲ ਦੀ ਸਜ਼ਾ ਸੁਣਾਈ ਗਈ ਹੈੈ ।
ਕੀ ਹੈ ਪੂਰਾ ਮਾਮਲਾ
ਮਿਲੀ ਜਾਣਕਾਰੀ ਅਨੁਸਾਰ ਬ੍ਰਿਟੇਨ ਦੇ ਵੈਸਟ ਮਿਡਲੈਂਡਜ਼ ਖੇਤਰ ਵਿੱਚ ਇੱਕ ਔਰਤ ਦਾ ਗਲਾ ਘੁੱਟ ਕੇ ਕਤਲ (Murder by strangulation) ਕਰਨ ਅਤੇ ਉਸਦੀ ਲਾਸ਼ ਨੂੰ ਸੜਕ ਕੰਢੇ ਸੁੱਟਣ ਦੇ ਦੋਸ਼ ਵਿੱਚ ਬੁੱਧਵਾਰ ਨੂੰ ਇੱਕ ਭਾਰਤੀ ਮੂਲ ਦੇ ਡਰਾਈਵਰ ਨੂੰ 29 ਸਾਲ ਦੀ ਕੈਦ ਦੀ ਸਜ਼ਾ (Punishment) ਸੁਣਾਈ ਗਈ । ਦੱਸਣਯੋਗ ਹੈ ਕਿ ਪਿਛਲੇ ਸਾਲ ਅਗਸਤ ਵਿੱਚ ਸਮੈਥਵਿਕ ਖੇਤਰ ਵਿੱਚ ਇੱਕ ਰਾਹਗੀਰ ਦੁਆਰਾ ਔਰਤ ਦੀ ਲਾਸ਼ ਲੱਭੀ ਗਈ ਸੀ । 32 ਸਾਲਾ ਤਨਵੀਰ ਸਿੰਘ ‘ਤੇ 41 ਸਾਲਾ ਸ਼ਾਰਾ ਮਿਲਰ ਦੀ ਹੱਤਿਆ ਦਾ ਦੋਸ਼ ਲਗਾਇਆ ਗਿਆ ਸੀ ।
ਸਜ਼ਾ ਸੁਣਾਉਂਦਿਆਂ ਜੱਜ ਨੇ ਕਾਤਲ ਨੂੰ ਕੀ ਆਖਿਆ
ਵੁਲਵਰਹੈਂਪਟਨ ਕਰਾਊਨ ਕੋਰਟ ਵਿੱਚ ਸਜ਼ਾ ਸੁਣਾਉਂਦੇ ਹੋਏ ਜੱਜ ਮਾਈਕਲ ਚੈਂਬਰਜ਼ ਨੇ ਸਿੰਘ ਨੂੰ ਇੱਕ “ਚਾਲਬਾਜ਼ ਅਤੇ ਬੇਰਹਿਮ” ਆਦਮੀ ਦੱਸਿਆ ਜਿਸਨੇ ਆਪਣੇ ਕੰਮਾਂ ਲਈ ਕੋਈ ਪਛਤਾਵਾ ਨਹੀਂ ਦਿਖਾਇਆ । ਵੈਸਟ ਮਿਡਲੈਂਡਜ਼ ਪੁਲਿਸ ਦੇ ਡਿਟੈਕਟਿਵ ਇੰਸਪੈਕਟਰ ਜੋਅ ਡੇਵਨਪੋਰਟ ਨੇ ਕਿਹਾ ਕਿ ਸ਼ਾਰਾ ਦਾ ਇੱਕ ਖਤਰਨਾਕ ਅਪਰਾਧੀ ਦੁਆਰਾ ਬੇਰਹਿਮੀ ਨਾਲ ਕਤਲ ਕਰ ਦਿੱਤਾ ਗਿਆ ਸੀ । ਉਸਨੇ ਕਿਹਾ ਕਿ ਘਟਨਾ ਵਾਲੀ ਰਾਤ ਸਿੰਘ ਇੱਕ ਪੱਬ ਵਿੱਚ ਸ਼ਰਾਬ ਪੀ ਰਿਹਾ ਸੀ ਅਤੇ ਬਾਅਦ ਵਿੱਚ ਸੈਕਸ ਵਰਕਰਾਂ ਦੀ ਭਾਲ ਵਿੱਚ ਸੋਹੋ ਰੋਡ ਗਿਆ ਸੀ । ਫਿਰ ਉਸਨੇ ਸ਼ਾਰਾ ਨੂੰ ਆਪਣੀ ਵੈਨ ਵਿੱਚ ਜ਼ਬਰਦਸਤੀ ਬਿਠਾ ਲਿਆ, ਜਿੱਥੇ ਉਸ ‘ਤੇ ਘਾਤਕ ਹਮਲਾ ਕੀਤਾ ਗਿਆ ।
ਜਾਂਚ ਵਿਚ ਕੀ ਸਾਹਮਣੇ ਆਇਆ
ਪੁਲਿਸ ਜਾਂਚ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਸਿੰਘ ਨੇ ਫੋਰੈਂਸਿਕ ਸਬੂਤਾਂ ਨੂੰ ਨਸ਼ਟ ਕਰਨ ਲਈ ਪੀੜਤ ਦੇ ਸਰੀਰ `ਤੇ ਤਰਲ ਪਦਾਰਥ ਡੋਲ੍ਹਿਆ ਸੀ । ਇਸ ਮਹੀਨੇ ਦੇ ਸ਼ੁਰੂ ਵਿੱਚ, ਵੁਲਵਰਹੈਂਪਟਨ ਕਰਾਊਨ ਕੋਰਟ ਦੀ ਇੱਕ ਜਿਊਰੀ ਨੇ ਸਿੰਘ ਨੂੰ ਸ਼ਾਰਾ ਦੇ ਕਤਲ ਦਾ ਦੋਸ਼ੀ ਠਹਿਰਾਇਆ । ਦੋ ਹਫ਼ਤਿਆਂ ਦੀ ਸੁਣਵਾਈ ਦੌਰਾਨ, ਅਦਾਲਤ ਨੂੰ ਦੱਸਿਆ ਗਿਆ ਕਿ ਸ਼ਾਰਾ ਦੇ ਸਿਰ ਵਿੱਚ ਸੱਟਾਂ ਸਨ, ਅਤੇ ਇੱਕ ਫੋਰੈਂਸਿਕ ਪੋਸਟਮਾਰਟਮ ਨੇ ਮੌਤ ਦਾ ਕਾਰਨ ਗਲਾ ਘੁੱਟਣਾ ਪਾਇਆ ।
ਕੀ ਕੀ ਸਾਹਮਣੇ ਆਇਆ ਸੀ. ਸੀ. ਟੀ. ਵੀ. ਫੁਟੇਜ ਵਿਚ
ਵੈਸਟ ਮਿਡਲੈਂਡਜ਼ ਪੁਲਸ ਨੇ ਕਤਲ ਦੀ ਜਾਂਚ ਸ਼ੁਰੂ ਕੀਤੀ ਅਤੇ ਸੀ. ਸੀ. ਟੀ. ਵੀ. ਫੁਟੇਜ ਦੀ ਜਾਂਚ ਕੀਤੀ, ਜਿਸ ਵਿੱਚ ਸ਼ੱਕੀ ਵਿਅਕਤੀ ਸ਼ਾਰਾ ਦੀ ਲਾਸ਼ ਨੂੰ ਇੱਕ ਚਿੱਟੇ ਵੈਨ ਤੋਂ ਕੱਢਦੇ ਹੋਏ, ਫੁੱਟਪਾਥ ‘ਤੇ ਛੱਡਦੇ ਹੋਏ, ਅਤੇ ਫਿਰ ਉਸ ‘ਤੇ ਤਰਲ ਪਦਾਰਥ ਛਿੜਕਦੇ ਹੋਏ ਦਿਖਾਇਆ ਗਿਆ । ਪੁਲਸ ਨੇ ਕਿਹਾ ਕਿ ਜਾਂਚ ਤੋਂ ਪਤਾ ਲੱਗਾ ਹੈ ਕਿ ਵੈਨ ਇੱਕ ਕਿਰਾਏ ਦੀ ਕੰਪਨੀ ਕੋਲ ਰਜਿਸਟਰਡ ਸੀ ਅਤੇ ਪਾਰਸਲ ਡਿਲੀਵਰੀ ਲਈ ਵਰਤੀ ਜਾ ਰਹੀ ਸੀ । ਘਟਨਾ ਸਮੇਂ ਤਨਵੀਰ ਸਿੰਘ ਕੋਲ ਵੈਨ ਸੀ । ਪੁਲਸ ਅਧਿਕਾਰੀਆਂ ਨੇ ਵੈਸਟ ਬ੍ਰੋਮਵਿਚ ਵਿੱਚ ਸਿੰਘ ਦਾ ਪਤਾ ਲਗਾਇਆ ਅਤੇ ਬਾਅਦ ਵਿੱਚ ਉਸਨੂੰ ਕਤਲ ਦੇ ਸ਼ੱਕ ਵਿੱਚ ਗ੍ਰਿਫਤਾਰ ਕਰ ਲਿਆ ।
