ਚੰਡੀਗੜ੍ਹ, 24 ਨਵੰਬਰ 2025 : ਪੰਜਾਬ ਦੇ ਰੋਪੜ ਰੇਂਜ ਦੇ ਮੁਅੱਤਲ ਡੀ. ਆਈ. ਜੀ. ਹਰਚਰਨ ਸਿੰਘ ਭੁੱਲਰ (D. I. G. Harcharan Singh Bhullar) ਨੇ ਆਪਣੀ ਗ੍ਰਿਫ਼ਤਾਰੀ ਨੂੰ ਚੁਣੌਤੀ ਦਿੰਦਿਆਂ ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ (Punjab and Haryana High Court) ਦਾ ਦਰਵਾਜ਼ਾ ਖੜਕਾ ਕੇ ਸੀ. ਬੀ. ਆਈ. ਦੀ ਕਾਰਵਾਈ `ਤੇ ਗੰਭੀਰ ਸਵਾਲ ਚੁੱਕੇ ਹਨ ।
ਸੀ. ਬੀ. ਆਈ. ਦੀ ਕਾਰਵਾਈ ਨੂੰ ਦੱਸਿਆ ਗੈਰ-ਸੰਵਿਧਾਨਕ
ਰਿਸ਼ਵਤਖੋਰੀ ਤੇ ਆਮਦਨ ਤੋਂ ਵੱਧ ਜਾਇਦਾਦ ਰੱਖਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਭੁੱਲਰ ਨੇ ਆਪਣੀ ਨਵੀਂ ਪਟੀਸ਼ਨ ਵਿਚ ਤਰਕ ਦਿੱਤਾ ਹੈ ਕਿ ਸੀ. ਬੀ. ਆਈ. ਵੱਲੋਂ ਕੀਤੀ ਗਈ ਜਾਂਚ ਤੇ ਗ੍ਰਿਫ਼ਤਾਰੀ (Arrest) ਕਾਨੂੰਨੀ ਤੌਰ `ਤੇ ਸਹੀ ਨਹੀਂ ਹੈ । ਉਨ੍ਹਾਂ ਦੀ ਪਟੀਸ਼ਨ 4 ਮੁੱਖ ਤਰਕਾਂ `ਤੇ ਆਧਾਰਿਤ ਹੈ, ਜੋ ਉਨ੍ਹਾਂ ਅਨੁਸਾਰ ਸੀ. ਬੀ. ਆਈ. ਦੀ ਕਾਰਵਾਈ ਨੂੰ ਗ਼ੈਰ-ਸੰਵਿਧਾਨਕ ਦੱਸਦੇ ਹਨ । ਭੁੱਲਰ ਦਾ ਦਾਅਵਾ ਹੈ ਕਿ ਕਥਿਤ ਘਟਨਾ ਸਮੇਂ ਉਹ ਪੰਜਾਬ `ਚ ਨਿਯੁਕਤ ਸਨ ਤੇ ਇਸ ਲਈ ਡੀ. ਐੱਸ. ਪੀ. ਈ. ਐਕਟ, 1946 ਦੀ ਧਾਰਾ 6 ਤਹਿਤ ਸੀ. ਬੀ. ਆਈ. ਲਈ ਉਨ੍ਹਾਂ ਖ਼ਿਲਾਫ਼ ਕੋਈ ਵੀ ਐੱਫ. ਆਈ. ਆਰ. ਜਾਂ ਜਾਂਚ ਸ਼ੁਰੂ ਕਰਨ ਤੋਂ ਪਹਿਲਾਂ ਪੰਜਾਬ ਸਰਕਾਰ ਤੋਂ ਅਗਾਊਂ ਇਜਾਜ਼ਤ ਲੈਣੀ ਜ਼ਰੂਰੀ ਸੀ । ਉਨ੍ਹਾਂ ਦਾ ਦਾਅਵਾ ਹੈ ਕਿ ਇਸ ਲਾਜ਼ਮੀ ਇਜਾਜ਼ਤ ਤੋਂ ਬਗ਼ੈਰ ਐੱਫ. ਆਈ. ਆਰ. ਤੇ ਉਸ ਤੋਂ ਬਾਅਦ ਦੀ ਗ੍ਰਿਫ਼ਤਾਰੀ ਨਾਜਾਇਜ਼ ਹੈ ।
ਪਟੀਸ਼ਨ ਅਨੁਸਾਰ ਕਥਿਤ ਰਿਸ਼ਤਵਖੋਰੀ ਦੀ ਘਟਨਾ ਪੂਰੀ ਤਰ੍ਹਾਂ ਪੰਜਾਬ `ਚ ਹੋਈ ਸੀ
ਪਟੀਸ਼ਨ ਅਨੁਸਾਰ ਕਥਿਤ ਰਿਸ਼ਤਵਖੋਰੀ (Bribery) ਦੀ ਘਟਨਾ ਪੂਰੀ ਤਰ੍ਹਾਂ ਪੰਜਾਬ `ਚ ਹੋਈ ਸੀ । ਭੁੱਲਰ ਦੇ ਵਕੀਲ ਦਾ ਤਰਕ ਹੈ ਕਿ ਸੀ. ਬੀ. ਆਈ. (C. B. I.) ਦੀ ਚੰਡੀਗੜ੍ਹ ਇਕਾਈ ਨੂੰ ਅਜਿਹੇ ਮਾਮਲੇ `ਚ ਐੱਫ. ਆਈ. ਆਰ. ਦਰਜ ਕਰਨ ਦਾ ਕੋਈ ਅਧਿਕਾਰ ਨਹੀਂ ਹੈ । ਕਥਿਤ ਅਪਰਾਧ ਪੰਜਾਬ ਵਿਚ ਹੋਇਆ, ਜੋ ਇਕ ਵੱਖਰਾ ਸੂਬਾ ਹੈ ਜਦਕਿ ਚੰਡੀਗੜ੍ਹ ਇਕ ਕੇਂਦਰ ਸ਼ਾਸਿਤ ਪ੍ਰਦੇਸ਼ ਹੈ, ਇਸ ਲਈ ਸੂਬਾ ਸਰਕਾਰ ਦੀ ਮਨਜ਼ੂਰੀ ਤੋਂ ਬਗ਼ੈਰ ਸੀ. ਬੀ. ਦੀ ਆਈ. ਨਾ ਤਾਂ ਮਾਮਲਾ ਦਰਜ ਕਰ ਸਕਦੀ ਸੀ ਤੇ ਨਾ ਹੀ ਭੁੱਲਰ ਨੂੰ ਗ੍ਰਿਫ਼ਤਾਰ ਕਰ ਸਕਦੀ ਸੀ, ਉੱਥੇ ਹੀ ਭੁੱਲਰ ਦਾ ਕਹਿਣਾ ਹੈ ਕਿ ਚੰਡੀਗੜ੍ਹ `ਚ ਬਰਾਮਦ ਕੀਤੀਆਂ ਗਈਆਂ ਕਥਿਤ ਵਸਤੂਆਂ ਉਨ੍ਹਾਂ ਦੇ ਨਿੱਜੀ ਕਬਜ਼ੇ ਵਿਚੋਂ ਜ਼ਬਤ ਨਹੀਂ ਕੀਤੀਆਂ ਗਈਆਂ । ਉਨ੍ਹਾਂ ਦਾ ਦਾਅਵਾ ਹੈ ਕਿ ਸੀ. ਬੀ. ਆਈ. ਵੱਲੋਂ ਬਰਾਮਦ ਸਮੱਗਰੀ ਨੂੰ ਉਨ੍ਹਾਂ ਦਾ ਦੱਸਿਆ ਜਾਣਾ ਭਰਮਾਊ ਤੇ ਤਥਾਤਮਕ ਤੌਰ `ਤੇ ਗਲਤ ਹੈ ।
ਭੁੱਲਰ ਖਿਲਾਫ਼ ਦਰਜ ਹਨ ਦੋ ਵੱਖ-ਵੱਖ ਵਿਭਾਗਾਂ ਵਲੋਂ ਐਫ. ਆਈ. ਆਰਜ.
ਪਟੀਸ਼ਨ `ਚ ਇਹ ਵੀ ਕਿਹਾ ਗਿਆ ਹੈ ਕਿ ਇਕੋ ਅਪਰਾਧ ਲਈ 2 ਐੱਫ. ਆਈ. ਆਰਜ਼ ਦਰਜ ਕਰਨਾ ਕਾਨੂੰਨੀ ਸਿਧਾਂਤਾਂ ਦੀ ਉਲੰਘਣਾ ਹੈ । ਵਿਜੀਲੈਂਸ ਬਿਊਰੋ (Vigilance Bureau) ਨੇ ਸੀ. ਬੀ. ਆਈ. ਵੱਲੋਂ ਐੱਫ. ਆਈ. ਆਰ. ਦਰਜ ਕਰਨ ਤੋਂ ਪਹਿਲਾਂ ਹੀ ਐੱਫ. ਆਈ. ਆਰ. ਦਰਜ ਕਰ ਲਈ ਸੀ । ਦੋਵੇਂ ਐੱਫ. ਆਈ. ਆਰਜ਼ ਦਰਮਿਆਨ ਲੱਗਭਗ ਅੱਧੇ ਘੰਟੇ ਦਾ ਵਕਫ਼ਾ ਦੱਸਿਆ ਜਾ ਰਿਹਾ ਹੈ ।
Read More : ਈ. ਡੀ. ਨੇ ਕੀਤੀ ਸਸਪੈਂਡ ਡੀ. ਆਈ. ਜੀ. ਭੁੱਲਰ ਦੇ ਖਾਤਿਆਂ ਦੀ ਜਾਂਚ
