ਜਲੰਧਰ : ਪੰਜਾਬ ਵਿੱਚ ਅਗਲੇ ਸਾਲ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲਈ ਸਾਰੀਆਂ ਹੀ ਪਾਰਟੀਆਂ ਨੇ ਤਿਆਰੀਆਂ ਸ਼ੁਰੂ ਕਰ ਦਿੱਤੀਆਂ ਹਨ। ਚੋਣਾਂ ਦੇ ਵਿੱਚ ਭਾਵੇ ਅਜੇ ਕਈ ਮਹੀਨੇ ਹਨ, ਪਰ ਪਾਰਟੀਆਂ ਵਿੱਚ ਸ਼ਾਮਲ ਹੋਣ ਅਤੇ ਛੱਡਣ ਦਾ ਸਿਲਸਿਲਾ ਚੱਲ ਰਿਹਾ ਹੈ। ਇਸੇ ਤਰਾਂ ਅੱਜ ਇੱਕ ਵੱਡੀ ਖ਼ਬਰ ਆਮ ਆਦਮੀ ਪਾਰਟੀ ਨਾਲ ਜੁੜੀ ਹੋਈ ਆ ਰਹੀ ਹੈ, ਪੰਜਾਬ ਪੁਲਿਸ ‘ਚੋਂ ਡੀਸੀਪੀ ਰਿਟਾਇਰਡ ਪੀਪੀਐਸ ਅਧਿਕਾਰੀ ਬਲਕਾਰ ਸਿੰਘ ਅੱਜ ਆਮ ਆਦਮੀ ਪਾਰਟੀ (ਆਪ) ਵਿੱਚ ਸ਼ਾਮਲ ਹੋ ਗਏ ਹਨ। ‘ਆਪ’ ਦੇ ਪੰਜਾਬ ਸਹਿ ਇੰਚਾਰਜ ਰਾਘਵ ਚੱਢਾ ਨੇ ਉਨ੍ਹਾਂ ਦਾ ਜਲੰਧਰ ਵਿੱਚ ਪਾਰਟੀ ਵਿੱਚ ਸਵਾਗਤ ਕੀਤਾ ਹੈ। ਕਿਹਾ ਜਾ ਰਿਹਾ ਹੈ ਕਿ ਬਲਕਾਰ ਸਿੰਘ ਨੂੰ ਕਰਤਾਰਪੁਰ ਜਾਂ ਆਦਮਪੁਰ ਤੋਂ ਆਮ ਆਦਮੀ ਪਾਰਟੀ ਦਾ ਉਮੀਦਵਾਰ ਬਣਾਇਆ ਜਾਵੇਗਾ। ਬਲਕਾਰ ਸਿੰਘ ਆਪਣੀ ਨੌਕਰੀ ਦੇ ਆਖ਼ਰੀ ਦਿਨਾਂ ਵਿੱਚ ਅਤੇ ਹੁਣ ਵੀ ਕਰਤਾਰਪੁਰ ਵਿਧਾਨ ਸਭਾ ਹਲਕੇ ਵਿੱਚ ਬਹੁਤ ਸਰਗਰਮ ਹਨ।
ਲੈਂਡਿੰਗ ਦੌਰਾਨ ਇੰਡੀਗੋ ਜਹਾਜ਼ ਦਾ ਫਟਿਆ ਟਾਇਰ, ਜਾਣੋ ਕਿਵੇਂ ਬਚੀ ਯਾਤਰੀਆਂ ਦੀ ਜਾਨ
ਕਰਨਾਟਕ ਦੇ ਹੁਬਲੀ ਜ਼ਿਲੇ ਵਿੱਚ 14 ਜੂਨ ਸ਼ਾਮ ਨੂੰ ਲੈਂਡਿੰਗ ਦੌਰਾਨ ਇੰਡੀਗੋ ਜਹਾਜ਼ ਦਾ ਟਾਇਰ ਫੱਟ ਗਿਆ ਸੀ। ਜਹਾਜ ਦਾ ਟਾਇਰ ਫੱਟਣ ਤੋਂ ਬਾਅਦ ਇੱਥੇ ਹੜਕੰਪ ਮੱਚ ਗਿਆ। ਪਰ ਇਸ ਹਾਦਸੇ ਵਿੱਚ ਕਿਸੇ ਜਾਨ ਜਾਂ ਮਾਲ ਦੇ ਨੁਕਸਾਨ ਦੀ ਕੋਈ ਖ਼ਬਰ ਨਹੀਂ ਹੈ। ਇਸ ਨਾਲ ਇੱਕ ਵੱਡਾ ਹਾਦਸਾ ਹੋਣ ਤੋਂ ਬੱਚ ਗਿਆ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਇੰਡੀਗੋ ਫਲਾਈਟ ਨੰਬਰ 6E-7979 ਕੇਰਲ ਦੇ ਕਨੂਰ ਤੋਂ ਕਰਨਾਟਕ ਦੇ ਹੁਬਲੀ ਆਈ ਸੀ। ਹੁਬਲੀ ‘ਚ ਲੈਂਡਿੰਗ ਕਰਦੇ ਸਮੇਂ ਜਹਾਜ਼ ਦਾ ਟਾਇਰ ਅਚਾਨਕ ਫੱਟ ਗਿਆ।
ਰਾਹਤ ਵਾਲੀ ਗੱਲ ਇਹ ਰਹੀ ਕਿ ਉਸ ਸਮੇਂ ਦੌਰਾਨ ਪਾਇਲਟ ਨੇ ਸਥਿਤੀ ਨੂੰ ਕਾਬੂ ਕਰ ਲਿਆ, ਜਿਸ ਕਾਰਨ ਕਿਸੇ ਵੀ ਯਾਤਰੀ ਅਤੇ ਚਾਲਕ ਦਲ ਦੇ ਮੈਂਬਰਾਂ ਨੂੰ ਨੁਕਸਾਨ ਨਹੀਂ ਪਹੁੰਚਿਆ।
ਪਾਸਪੋਰਟ ਰੀਨਿਊ ਦੇ ਮਾਮਲੇ ‘ਚ ਕੰਗਣਾ ਰਣੌਤ ਦੀਆਂ ਮੁਸ਼ਕਿਲਾਂ ‘ਚ ਵਾਧਾ! ਅਦਾਕਾਰਾ ਪਹੁੰਚੀ ਬੰਬੇ ਹਾਈ ਕੋਰਟ
ਮੁੰਬਈ : ਬਾਲੀਵੁੱਡ ਅਦਾਕਾਰਾ ਕੰਗਣਾ ਰਣੌਤ ਇੱਕ ਵਾਰ ਫਿਰ ਤੋਂ ਮੁਸ਼ਕਿਲਾਂ ‘ਚ ਹਨ। ਹੁਣ ਉਨ੍ਹਾਂ ਨੇ ਆਪਣਾ ਪਾਸਪੋਰਟ ਰੀਨਿਊ ਨਾ ਹੋਣ ਨੂੰ ਲੈ ਕੇ ਬੰਬੇ ਹਾਈਕੋਰਟ ਦਾ ਦਰਵਾਜ਼ਾ ਖੜਕਾਇਆ ਹੈ। ਦਰਅਸਲ ਬੀਤੇ ਕੁਝ ਦਿਨਾਂ ‘ਚ ਕੰਗਣਾ ਰਣੌਤ ਕਈ ਵਿਵਾਦਾਂ ‘ਚ ਆਈ ਹੈ, ਜਿਸ ਦੇ ਚੱਲਦਿਆਂ ਉਨ੍ਹਾਂ ਦੇ ਖਿਲਾਫ਼ ਕਈ ਮਾਮਲੇ ਦਰਜ਼ ਹਨ। ਅਦਾਕਾਰਾ ਦੇ ਖਿਲਾਫ ਬਾਂਦਰਾ ਪੁਲਿਸ ਨੇ ਦੇਸ਼ਧ੍ਰੋਹ ਅਤੇ ਜਾਣ ਬੁਝਕੇ ਨਫ਼ਰਤ ਫੈਲਾਉਣ ਦਾ ਵੀ ਮਾਮਲਾ ਦਰਜ਼ ਕੀਤਾ ਹੋਇਆ ਹੈ। ਅਜਿਹੇ ‘ਚ ਰੀਜ਼ਨਲ ਪਾਸਪੋਰਟ ਦਫ਼ਤਰ ਨੇ ਕੰਗਣਾ ਰਣੌਤ ਦਾ ਪਾਸਪੋਰਟ ਰੀਨਿਊ ਕਰਨ ਤੋਂ ਮਨ੍ਹਾ ਕਰ ਦਿੱਤਾ ਹੈ।
ਜਿਸ ਦੇ ਚੱਲਦਿਆਂ ਉਨ੍ਹਾਂ ਨੇ ਬੰਬੇ ਹਾਈਕੋਰਟ ਦਾ ਰੁਖ਼ ਕੀਤਾ ਹੈ। ਇਸ ਮਾਮਲੇ ਨੂੰ ਲੈ ਕੇ ਮੰਗਲਵਾਰ ਨੂੰ ਸੁਣਵਾਈ ਵੀ ਹੋਣੀ ਹੈ। ਖ਼ਬਰਾਂ ਅਨੁਸਾਰ ਕੰਗਣਾ ਰਣੌਤ ਨੇ ਕੋਰਟ ‘ਚ ਮੰਗ ਦਰਜ਼ ਕੀਤੀ ਹੈ। ਇਸ ਮੰਗ ‘ਚ ਉਨ੍ਹਾਂ ਨੇ ਕਿਹਾ ਹੈ ਕਿ ਉਹ ਇੱਕ ਅਦਾਕਾਰਾ ਹੈ, ਇਸ ਲਈ ਉਨ੍ਹਾਂ ਨੂੰ ਪ੍ਰੋਫੈਸ਼ਨਲ ਮੀਟਿੰਗ ਲਈ ਦੇਸ਼ ਅਤੇ ਵਿਦੇਸ਼ ਦੀ ਯਾਤਰਾ ਕਰਨੀ ਪੈਂਦੀ ਹੈ। ਅਜਿਹੇ ‘ਚ ਉਨ੍ਹਾਂ ਨੂੰ 15 ਜੂਨ ਤੋਂ 10 ਅਗਸਤ ਤੱਕ ਬੁਡਾਪੇਸਟ ਅਤੇ ਹੰਗਰੀ ਜਾਣਾ ਹੈ।
ਕੰਗਣਾ ਰਣੌਤ ਦੀ ਫ਼ਿਲਮ ‘ਧਾਕੜ’ ਦੇ ਸੈਕਿੰਡ ਸ਼ੈਡਿਊਲ ਦੀ ਸ਼ੂਟਿੰਗ ਬਾਕੀ ਹੈ ਪਰ ਉਸ ਖ਼ਿਲਾਫ਼ ਐੱਫ. ਆਈ. ਆਰ. ਦਰਜ਼ ਹੋਣ ਕਾਰਨ ਪਾਸਪੋਰਟ ਵਿਭਾਗ ਨੇ ਉਸ ਦਾ ਪਾਸਪੋਰਟ ਰੀਨਿਊ ਕਰਨ ਤੋਂ ਮਨ੍ਹਾ ਕਰ ਦਿੱਤਾ ਹੈ। ਪਟੀਸ਼ਨ ’ਚ ਅੱਗੇ ਕਿਹਾ ਗਿਆ ਹੈ ਕਿ ਕੰਗਨਾ ਰਣੌਤ ਨੇ ਪਹਿਲਾਂ ਹੀ ਪ੍ਰੋਫੈਸ਼ਨਲ ਕਮਿਟਮੈਂਟਸ ਕੀਤੀਆਂ ਹੋਈਆਂ ਹਨ। ਵਿਦੇਸ਼ ’ਚ ਸ਼ੂਟਿੰਗ ਲਈ ਉਸ ਦੇ ਪ੍ਰੋਡਕਸ਼ਨ ਹਾਊਸ ਨੇ ਵੱਡਾ ਨਿਵੇਸ਼ ਕੀਤਾ ਹੈ, ਜਿਥੇ ਉਸ ਨੂੰ ਹਿੱਸਾ ਲੈਣਾ ਜ਼ਰੂਰੀ ਹੈ। ਇਸ ਲਈ ਜ਼ਰੂਰੀ ਹੈ ਕਿ ਉਸ ਦਾ ਪਾਸਪੋਰਟ ਰੀਨਿਊ ਕੀਤਾ ਜਾਵੇ।
ਸੋਨਾ ਖਰੀਦਣਾ ਹੋਵੇ ਜਾਂ ਵੇਚਣਾ ਅੱਜ ਤੋਂ ਲਾਗੂ ਹੋ ਗਿਆ ਹੈ ਹਾਲਮਾਰਕਿੰਗ ਦਾ ਨਵਾਂ ਨਿਯਮ, ਇਸ ਤਰ੍ਹਾਂ ਮਿਲੇਗਾ ਆਮ ਲੋਕਾਂ ਨੂੰ ਫਾਇਦਾ
ਨਵੀਂ ਦਿੱਲੀ: ਜੇ ਤੁਸੀਂ ਸੋਨਾ ਖਰੀਦਣ ਜਾ ਰਹੇ ਹੋ ਤਾਂ ਤੁਹਾਡੇ ਲਈ ਇਹ ਮਹੱਤਵਪੂਰਣ ਖ਼ਬਰ ਹੈ। ਅੱਜ ਤੋਂ (15 ਜੂਨ) ਤੋਂ ਸੋਨੇ ਦੀ ਹਾਲਮਾਰਕਿੰਗ (GOLD Hallmarking) ਲਾਜ਼ਮੀ ਕਰ ਦਿੱਤੀ ਗਈ ਹੈ। ਅਜਿਹੀ ਸਥਿਤੀ ‘ਚ, ਜੇ ਤੁਸੀਂ ਖਰੀਦਾਰੀ ਕਰਨ ਜਾ ਰਹੇ ਹੋ, ਤਾਂ ਉਸ ਤੋਂ ਪਹਿਲਾਂ ਨਿਯਮਾਂ ਨੂੰ ਜਾਣਨਾ ਜ਼ਰੂਰੀ ਹੈ। ਕੇਂਦਰ ਸਰਕਾਰ ਨੇ ਸੋਨੇ ਦੇ ਗਹਿਣਿਆਂ ‘ਤੇ ਬੀਆਈਐਸ ਹਾਲਮਾਰਕਿੰਗ ਨੂੰ ਲਾਜ਼ਮੀ ਕਰ ਦਿੱਤਾ ਹੈ। 15 ਜੂਨ ਤੋਂ, ਸਾਰੇ ਗਹਿਣਿਆਂ ਲਈ ਸਿਰਫ ਬੀ ਆਈ ਐਸ ਪ੍ਰਮਾਣਤ ਗਹਿਣੇ ਵੇਚਣੇ ਲਾਜ਼ਮੀ ਹਨ।
ਕੇਂਦਰ ਸਰਕਾਰ ਪਿਛਲੇ ਡੇਢ ਸਾਲਾਂ ਤੋਂ ਸੋਨੇ ਦੀ ਹਾਲਮਾਰਕਿੰਗ ਨੂੰ ਲੈ ਕੇ ਯੋਜਨਾ ਬਣਾ ਰਹੀ ਹੈ ਅਤੇ ਇਹ ਹੁਕਮ ਅੱਜ ਤੋਂ ਪੂਰੇ ਦੇਸ਼ ‘ਚ ਲਾਗੂ ਕੀਤਾ ਜਾ ਰਿਹਾ ਹੈ। ਹਾਲਾਂਕਿ ਇਸ ਹੁਕਮ ਨੂੰ ਪਹਿਲਾਂ ਲਾਗੂ ਕੀਤਾ ਜਾ ਸਕਦਾ ਸੀ, ਪਰ ਦੇਸ਼ ਵਿੱਚ ਮਹਾਂਮਾਰੀ ਫੈਲਣ ਕਾਰਨ ਇਸ ਨੂੰ ਲਾਗੂ ਨਹੀਂ ਕੀਤਾ ਜਾ ਸਕਿਆ। ਆਓ ਅਸੀਂ ਤੁਹਾਨੂੰ ਇਸ ਨਿਯਮ ਦੇ ਬਾਰੇ ਵਿਸਥਾਰ ਵਿੱਚ ਦੱਸਾਂਗੇ ਕਿ ਇਹ ਨਿਯਮ ਕੀ ਹੈ ਅਤੇ ਇਸਦਾ ਆਮ ਲੋਕਾਂ ਉੱਤੇ ਕੀ ਪ੍ਰਭਾਵ ਪਏਗਾ।
ਕਿ ਹੈ ਗੋਲਡ ਹਾਲਮਾਰਕਿੰਗ ?
ਤੁਹਾਨੂੰ ਦੱਸ ਦਈਏ ਕਿ ਕੇਂਦਰ ਸਰਕਾਰ ਨੇ ਕਿਹਾ ਹੈ ਕਿ ਸੋਨੇ ਦੀ ਹਾਲਮਾਰਕਿੰਗ ਦੇ ਤਹਿਤ ਦੇਸ਼ ਦੇ ਸਾਰੇ ਸੋਨੇ ਦੇ ਵਪਾਰੀਆਂ ਨੂੰ ਸੋਨੇ ਦੇ ਗਹਿਣਿਆਂ ਜਾਂ ਆਰਟਵਰਕ ਨੂੰ ਵੇਚਣ ਲਈ ਬੀ.ਆਈ.ਐੱਸ ਦੇ ਮਾਪਦੰਡਾਂ ਨੂੰ ਪੂਰਾ ਕਰਨਾ ਚਾਹੀਦਾ ਹੈ, ਕੋਈ ਵੀ ਵਪਾਰੀ ਜੋ ਇਨ੍ਹਾਂ ਮਾਪਦੰਡਾਂ ਨੂੰ ਪੂਰਾ ਨਹੀਂ ਕਰਦਾ ਤਾਂ ਉਸ ਦੇ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।
ਜੇਲ ਵੀ ਹੋ ਸਕਦੀ
ਜੇ ਕੋਈ ਸਰਕਾਰ ਵਲੋਂ ਜਾਰੀ ਨਿਯਮਾਂ ਦੀ ਪਾਲਣਾ ਨਹੀਂ ਕਰਦਾ ਹੈ, ਤਾਂ ਉਸ ਨੂੰ ਬੀਆਈਐਸ ਐਕਟ, 2016 ਦੀ ਧਾਰਾ 29 ਤਹਿਤ ਇਕ ਸਾਲ ਤੱਕ ਦੀ ਕੈਦ ਜਾਂ 1 ਲੱਖ ਰੁਪਏ ਤੋਂ ਵੱਧ ਦਾ ਜੁਰਮਾਨਾ ਹੋ ਸਕਦਾ ਹੈ।
ਸੋਨੇ ਦੀਆਂ ਕਿੰਨੀਆਂ ਕੈਰੇਟ ਹਾਲਮਾਰਕ ਕੀਤੀਆਂ ਜਾਣਗੀਆਂ?
ਤੁਹਾਨੂੰ ਦੱਸ ਦਈਏ ਕਿ 14 ਕੈਰਟ, 18 ਕੈਰਟ ਅਤੇ 22 ਕੈਰਟ ਸ਼ੁੱਧਤਾ ਵਾਲਾ ਸੋਨਾ ਹਾਲਮਾਰਕ ਕੀਤਾ ਜਾਵੇਗਾ।
ਘਰ ਵਿੱਚ ਪਏ ਸੋਨੇ ਦਾ ਕੀ ਬਣੇਗਾ?
ਸਭ ਤੋਂ ਜ਼ਰੂਰੀ ਗੱਲ ਇਹ ਹੈ ਕਿ ਤੁਹਾਡੇ ਘਰ ਵਿਚ ਰੱਖੇ ਸੋਨੇ ਦਾ ਕੀ ਹੋਵੇਗਾ। ਜੇ ਇਹ ਸਵਾਲ ਤੁਹਾਡੇ ਦਿਮਾਗ ਵਿਚ ਵੀ ਆ ਰਿਹਾ ਹੈ, ਤਾਂ ਇਹ ਜਾਣੋ ਕਿ ਹਾਲਮਾਰਕਿੰਗ ਦਾ ਇਹ ਨਿਯਮ ਸੋਨੇ ਦੇ ਗਹਿਣਿਆਂ ਨੂੰ ਵੇਚਣ ਵਾਲੇ ਜਵੇਲਰਸ ਲਈ ਲਾਗੂ ਹੋਵੇਗਾ। ਗਾਹਕ ਬਿਨਾਂ ਕਿਸੇ ਨਿਸ਼ਾਨ ਦੇ ਆਪਣੇ ਗਹਿਣਿਆਂ ਨੂੰ ਵੇਚ ਸਕਦੇ ਹਨ।
ਇਸ ਨਿਯਮ ਦਾ ਕੀ ਫਾਇਦਾ ਹੋਵੇਗਾ?
ਸਰਕਾਰ ਦੇ ਇਸ ਕਦਮ ਨਾਲ ਸੋਨੇ ਦੀ ਸ਼ੁੱਧਤਾ ਦਾ ਸਬੂਤ ਅਸਾਨੀ ਨਾਲ ਦਿੱਤਾ ਜਾ ਸਕਦਾ ਹੈ। ਇਸਦਾ ਸਬੂਤ ਹੋਣ ਨਾਲ ਹੈਂਡਕ੍ਰਾਫਟ ਸੋਨੇ ਦੀ ਮਾਰਕੀਟ ਨੂੰ ਵੀ ਹੁਲਾਰਾ ਮਿਲੇਗਾ। ਇਸ ਦੇ ਨਾਲ, ਗਹਿਣਿਆਂ ਦਾ ਉਦਯੋਗ ਵੀ ਵਧੇਗਾ। ਇਸ ਸਮੇਂ ਦੇਸ਼ ਭਰ ਦੇ 234 ਜ਼ਿਲ੍ਹਿਆਂ ਵਿੱਚ 892 ਹਾਲਮਾਰਕਿੰਗ ਕੇਂਦਰ ਚੱਲ ਰਹੇ ਹਨ ਜੋ 28,849 ਬੀਆਈਐਸ ਰਜਿਸਟਰਡ ਗਹਿਣਿਆਂ ਲਈ ਹਾਲਮਾਰਕਿੰਗ ਕਰ ਰਹੇ ਹਨ। ਹਾਲਾਂਕਿ, ਹੁਣ ਇਹ ਗਿਣਤੀ ਹੋਰ ਵਧਣ ਦੀ ਉਮੀਦ ਹੈ।
Hyundai ਨੇ ਪ੍ਰਾਪਤ ਕੀਤੀ ਵੱਡੀ ਸਫਲਤਾ, ਪਹਿਲੇ ਸਥਾਨ ‘ਤੇ ਪਹੁੰਚੀ Creta
ਦੱਖਣੀ ਕੋਰੀਆ ਦੀ ਮੋਹਰੀ ਵਾਹਨ ਨਿਰਮਾਤਾ Hyundai ਦੀ ਮੱਧ ਅਕਾਰ ਦੀ ਐਸਯੂਵੀ ਕ੍ਰੇਟਾ ਭਾਰਤ ‘ਚ ਬਹੁਤ ਪ੍ਰਸਿੱਧ ਹੈ। ਪਿਛਲੇ ਮਹੀਨੇ ਮਈ ਵਿਚ, ਕ੍ਰੇਟਾ ਨੇ ਮਾਰੂਤੀ ਸੁਜ਼ੂਕੀ ਸਵਿਫਟ ਨੂੰ ਪਛਾੜ ਕੇ 7,527 ਇਕਾਈਆਂ ਵੇਚ ਕੇ ਪਹਿਲੇ ਸਥਾਨ ‘ਤੇ ਪਹੁੰਚ ਗਈ ਸੀ।
ਇਸ ਦੇ ਨਾਲ ਹੀ, ਕੰਪਨੀ ਦੀ ਇਸ ਐਸਯੂਵੀ ਨੇ ਹੁਣ ਇਕ ਹੋਰ ਪ੍ਰਾਪਤੀ ਕਰ ਲਈ ਹੈ। ਮਿਲੀ ਜਾਣਕਾਰੀ ਦੇ ਅਨੁਸਾਰ, ਕ੍ਰੇਟਾ ਨੇ ਹੁਣ ਤੱਕ ਭਾਰਤ ਵਿੱਚ ਆਪਣੀਆਂ 6 ਲੱਖ ਇਕਾਈਆਂ ਵੇਚੀਆਂ ਹਨ, ਜੋ ਕਿ ਕੰਪਨੀ ਲਈ ਇੱਕ ਵੱਡੀ ਪ੍ਰਾਪਤੀ ਹੈ।
ਕੰਪਨੀ ਦੇ ਇਸ ਮੱਧ-ਆਕਾਰ ਦੀ ਐਸਯੂਵੀ ਬਾਰੇ ਗੱਲ ਕਰਦਿਆਂ, ਪਹਿਲੀ ਵਾਰ ਕੰਪਨੀ ਨੇ ਇਸ ਨੂੰ ਸਾਲ 2015 ਵਿਚ ਭਾਰਤੀ ਬਾਜ਼ਾਰ ਵਿਚ ਲਾਂਚ ਕੀਤਾ ਸੀ ਅਤੇ ਉਦੋਂ ਤੋਂ ਕੰਪਨੀ ਦੀ ਇਹ ਐਸਯੂਵੀ ਹਰ ਸਾਲ ਭਾਰਤ ਵਿਚ ਪ੍ਰਸਿੱਧੀ ਵਿਚ ਵਾਧਾ ਦਰਜ ਕਰਵਾਉਂਦੀ ਰਹੀ ਹੈ।
ਪਿਛਲੇ ਸਾਲ ਕੰਪਨੀ ਨੇ ਕ੍ਰੇਟਾ ਦੇ ਦੂਸਰੇ ਪੀੜ੍ਹੀ ਦੇ ਮਾਡਲ ਨੂੰ ਭਾਰਤੀ ਬਾਜ਼ਾਰ ਵਿਚ ਲਾਂਚ ਕੀਤਾ ਸੀ, ਉਸ ਤੋਂ ਬਾਅਦ ਵੀ ਇਸ ਕਾਰ ਦੀ ਵਿਕਰੀ ਵਿਚ ਕੋਈ ਕਮੀ ਨਹੀਂ ਆਈ ਅਤੇ ਇਸਦੀ ਦੂਜੀ ਪੀੜ੍ਹੀ ਦੇ ਮਾਡਲ ਨੂੰ ਲੋਕਾਂ ਨੇ ਲਿਆ। ਕ੍ਰੇਟਾ ਨੇ ਇੰਨੀ ਪ੍ਰਸਿੱਧੀ ਪ੍ਰਾਪਤ ਕੀਤੀ ਕਿ ਇਹ ਮਈ 2021 ਵਿਚ ਭਾਰਤ ਵਿਚ ਵਿਕਰੀ ਦੇ ਮਾਮਲੇ ਵਿਚ ਪਹਿਲੇ ਸਥਾਨ ਤੇ ਪਹੁੰਚ ਗਈ।2015 ਵਿੱਚ ਆਪਣੀ ਸ਼ੁਰੂਆਤ ਤੋਂ ਬਾਅਦ, ਕ੍ਰੇਟਾ ਨੇ ਹੁਣ ਤੱਕ 6 ਲੱਖ ਯੂਨਿਟ ਵੇਚੇ ਹਨ ।ਅਰਥਾਤ ਔਸਤਨ ਕੰਪਨੀ ਹਰ ਸਾਲ ਇਸ ਕਾਰ ਦੇ 1 ਲੱਖ ਯੂਨਿਟ ਵੇਚਦੀ ਹੈ।
ਬ੍ਰਿਟੇਨ ਦੇ PM Boris Johnson ਨੇ ਜਾਰੀ ਕੀਤੇ ਨਿਰਦੇਸ਼, 19 ਜੁਲਾਈ ਤੱਕ ਜਾਰੀ ਰਹਿਣਗੀਆਂ ਪਾਬੰਦੀਆਂ
ਲੰਡਨ : ਬ੍ਰਿਟੇਨ ਦੇ ਪ੍ਰਧਾਨਮੰਤਰੀ Boris Johnson ਨੇ ਸੋਮਵਾਰ ਨੂੰ ਲਾਕਡਾਊਨ ਸਬੰਧੀ ਸਾਰੇ ਪਾਬੰਦੀਆਂ ਨੂੰ ਖ਼ਤਮ ਕਰਨ ਦੀ ਮਿਆਦ ਨੂੰ ਚਾਰ ਹਫ਼ਤੇ ਹੋਰ ਵਧਾ ਕੇ 19 ਜੁਲਾਈ ਤੱਕ ਵਧਾ ਦਿੱਤਾ। ਇਸ ਤੋਂ ਪਹਿਲਾਂ ਇਹ ਪਾਬੰਦੀਆਂ 21 ਜੂਨ ਨੂੰ ਖ਼ਤਮ ਹੋਣ ਜਾ ਰਹੀਆਂ ਸਨ। ਜਾਨਸਨ ਨੇ ਕਿਹਾ ਕਿ ਕੋਰੋਨਾ ਵਾਇਰਸ ਦੇ ਡੈਲਟਾ ਸਵਰੂਪ ਦੇ ਚਲਦੇ ਸੰਕਰਮਣ ਦੇ ਮਾਮਲਿਆਂ ਅਤੇ ਹਸਪਤਾਲ ‘ਚ ਭਰਤੀ ਹੋਣ ਵਾਲੇ ਮਰੀਜ਼ਾਂ ਦੀ ਗਿਣਤੀ ਵਾਧੇ ਬਾਰੇ ਚਿੰਤਾ ਬਣੀ ਹੋਈ ਹੈ।
ਪ੍ਰਧਾਨਮੰਤਰੀ ਦੀ ਇਸ ਦੇ ਐਲਾਨ ਦੇ ਨਾਲ ਹੀ ਹੁਣ ਫ੍ਰੀਡਮ ਡੇ 19 ਜੁਲਾਈ ਨੂੰ ਮਨਾਇਆ ਜਾਵੇਗਾ ਜੋ ਕਿ ਲਾਕਡਾਊਨ ਖ਼ਤਮ ਹੋਣ ਦੀ ਖੁਸ਼ੀ ਵਿੱਚ ਮਨਾਇਆ ਜਾਣਾ ਹੈ। ਜਾਨਸਨ ਨੇ ਕਿਹਾ ਕਿ ਹੁਣੇ ਥੋੜ੍ਹਾ ਹੋਰ ਇੰਤਜਾਰ ਕਰਨਾ ਬਿਹਤਰ ਹੋਵੇਗਾ। ਨਾਲ ਹੀ ਉਨ੍ਹਾਂ ਨੇ ਉਮੀਦ ਜਤਾਈ ਕਿ 19 ਜੁਲਾਈ ਨੂੰ ਪਾਬੰਦੀਆਂ ਖ਼ਤਮ ਕਰਨ ਦਾ ਅੰਤਮ ਦਿਨ ਹੋਵੇਗਾ ਅਤੇ ਇਸ ਨੂੰ ਹੋਰ ਫੈਲਾਉਣ ਦੇਣ ਦੀ ਜ਼ਰੂਰਤ ਨਹੀਂ ਪਵੇਗੀ। ਪ੍ਰਧਾਨਮੰਤਰੀ ਨੇ ਕਿਹਾ, ਹੁਣ ਅਸੀਂ 40 ਸਾਲ ਦੀ ਉਮਰ ਤੋਂ ਜਿਆਦਾ ਦੇ ਲੋਕਾਂ ਨੂੰ ਕੋਵਿਡ – 19 ਟੀਕੇ ਦੀ ਦੂਜੀ ਖੁਰਾਕ ਦੇਣ ਵਿੱਚ ਤੇਜ਼ੀ ਲਿਆਵਾਂਗੇ ਤਾਂਕਿ ਉਨ੍ਹਾਂ ਨੂੰ ਵਾਇਰਸ ਤੋਂ ਵੱਧ ਤੋਂ ਵੱਧ ਸੁਰੱਖਿਆ ਮਿਲ ਸਕੇ।
ਪੰਜਾਬ ਪੁਲਿਸ ਵੱਲੋਂ ਅੰਤਰਰਾਜੀ ਗਿਰੋਹ ਦਾ ਪਰਦਾਫਾਸ਼
ਲੁਟੇਰਿਆਂ ਵੱਲੋਂ ਲੋਕਾਂ ਨੂੰ ਲੁੱਟਣ ਲਈ ਨਵੇਂ-ਨਵੇਂ ਤਰੀਕੇ ਅਪਣਾਏ ਜਾਂਦੇ ਹਨ। ਅਜਿਹੇ ਹੀ ਇੱਕ ਗਿਰੋਹ ਨੂੰ ਪੰਜਾਬ ਪੁਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਪੰਜਾਬ ਪੁਲਿਸ ਨੇ ਪੁਲਿਸ ਦੀ ਵਰਦੀ ਵਿੱਚ ਛਾਪਾ ਮਾਰਨ ਦਾ ਡਰਾਮਾ ਰਚ ਕੇ ਲੁੱਟਾਂ ਖੋਹਾਂ ਕਰਨ ਵਾਲੇ ਪੰਜ ਲੁਟੇਰਿਆਂ ਨੂੰ ਫੜਿਆ ਹੈ। ਇਹ ਅੰਤਰਰਾਜੀ ਲੁਟੇਰਾ ਗਿਰੋਹ ਹਰਿਆਣਾ, ਪੰਜਾਬ, ਰਾਜਸਥਾਨ, ਯੂਪੀ ਅਤੇ ਦਿੱਲੀ ਵਿਚ 30 ਤੋਂ ਵੱਧ ਵਾਰਦਾਤਾਂ ਨੂੰ ਅੰਜਾਮ ਦੇ ਚੁੱਕਾ ਹੈ। ਪੁਲਿਸ ਨੇ ਇਨ੍ਹਾਂ ਤੋਂ ਪਿਛਲੇ ਮਹੀਨੇ ਪੰਜਾਬ ਦੇ ਪਾਤੜਾਂ ਵਿੱਚ ਵਪਾਰੀ ਕੋਲੋਂ ਲੁੱਟੇ ਤਿੰਨ ਲੱਖ ਰੁਪਏ ਅਤੇ ਦੋ ਗੱਡੀਆਂ ਬਰਾਮਦ ਕੀਤੀਆਂ ਹਨ।
ਇਨ੍ਹਾਂ ਲੁਟੇਰਿਆਂ ‘ਚ ਵਿਜੇ ਕੁਮਾਰ, ਸੰਜੀਵ ਅਤੇ ਸੰਨੀ ਸ਼ਰਮਾ ਵਾਸੀ ਨਰਵਾਣਾ ਸ਼ਾਮਲ ਹਨ। ਸਤਿੰਦਰ ਅਤੇ ਸੰਨੀ ਕਨੜੀ ਫਤਿਹਾਬਾਦ ਦੇ ਪਿੰਡ ਕਨਹੇੜੀ ਦੇ ਰਹਿਣ ਵਾਲੇ ਹਨ। ਵਿਸ਼ਨੂ ਉਰਫ ਵਿਸ਼ੂ ਅਤੇ ਜਸਵਿੰਦਰ ਤੋਂ ਇਲਾਵਾ ਰੋਹਤਕ ਦੇ ਪਿੰਡ ਬੈਂਸੀ ਦਾ ਨਰੇਸ਼ ਕੁਮਾਰ ਤੇ ਰੋਹਤਕ ਦਾ ਹੀ ਨਰੇਸ਼ ਫਰਾਰ ਹੈ।
ਇਨ੍ਹਾਂ ਦੀ ਗ੍ਰਿਫਤਾਰੀ ਲਈ ਕੋਸ਼ਿਸ਼ਾਂ ਜਾਰੀ ਹਨ। ਲੁਟੇਰਿਆਂ ਕੋਲੋਂ ਤਿੰਨ ਲੱਖ ਨਕਦੀ ਅਤੇ ਦੋ ਗੱਡੀਆਂ ਤੋਂ ਇਲਾਵਾ ਇੱਕ 22 ਬੋਰ ਦੀ ਰਿਵਾਲਵਰ, ਇੱਕ 12 ਬੋਰ ਡਬਲ ਬੈਰਲ ਰਾਈਫਲ, ਚਾਰ 12 ਬੋਰ ਦੇ ਕਾਰਤੂਸ, ਚਾਰ ਪੁਲਿਸ ਵਰਦੀਆਂ, ਦੋ ਪੁਲਿਸ ਬੈਲਟ ਅਤੇ ਹਰਿਆਣਾ ਪੁਲਿਸ ਦੇ ਦੋ ਲੋਗੋ ਮਾਸਕ ਬਰਾਮਦ ਹੋਏ ਹਨ।
ਐਸਐਸਪੀ ਨੇ ਦੱਸਿਆ ਕਿ ਫੜੇ ਗਏ ਗਿਰੋਹ ਨੇ ਆਪਣਾ ਨੈੱਟਵਰਕ ਪੰਜਾਬ, ਹਰਿਆਣਾ, ਰਾਜਸਥਾਨ, ਦਿੱਲੀ ਅਤੇ ਯੂਪੀ ਵਿੱਚ ਫੈਲਾਇਆ ਹੈ। ਕਿਸੇ ਵਿਅਕਤੀ ਨੂੰ ਨਿਸ਼ਾਨਾ ਬਣਾਉਣਾ ਅਤੇ ਉਸ ਨੂੰ ਨੋਟ ਦੁੱਗਣਾ ਕਰਨ ਦੇ ਲਾਲਚ ਦੇ ਕੇ ਫਸਾਉਂਦੇ ਸਨ। ਇਸ ਯੋਜਨਾ ਤਹਿਤ ਲੁਟੇਰੇ ਪੁਲਿਸ ਵਰਦੀ ਵਿਚ ਛਾਪਾ ਮਾਰਨ ਦਾ ਵਿਖਾਵਾ ਕਰਦੇ ਸਨ। ਇਸ ਤੋਂ ਬਾਅਦ ਵਿਅਕਤੀ ਨੂੰ ਡਰਾ-ਧਮਕਾ ਕੇ ਉਸ ਤੋਂ ਪੈਸੇ ਖੋਹ ਲੈਂਦੇ ਸਨ।
CM ਕੈਪਟਨ ਅੱਜ ਸ਼ਾਮ ਨੂੰ ਕਰਨਗੇ Covid ਰੀਵਿਊ ਮੀਟਿੰਗ, Balbir Sidhu ਸਮੇਤ ਕਈ ਅਫ਼ਸਰ ਹੋਣਗੇ ਸ਼ਾਮਲ
ਚੰਡੀਗੜ੍ਹ : ਪੰਜਾਬ ‘ਚ ਕੋਰੋਨਾ ਵਾਇਰਸ ਦੇ ਮਾਮਲੇ ਲਗਾਤਾਰ ਘੱਟ ਹੋ ਰਹੇ ਹਨ। ਇਸ ਦੇ ਚੱਲਦਿਆਂ ਪੰਜਾਬ ਦੇ ਮੁੱਖਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਅੱਜ ਕੋਰੋਨਾ ਰੀਵਿਊ ਮੀਟਿੰਗ ਕਰਨਗੇ। ਜਾਣਕਾਰੀ ਅਨੁਸਾਰ ਇਹ ਬੈਠਕ ਅੱਜ ਸ਼ਾਮ 4 ਵਜੇ ਹੋਵੇਗੀ।
ਮੰਨਿਆ ਜਾ ਰਿਹਾ ਹੈ ਕਿ ਇਸ ਬੈਠਕ ‘ਚ ਪੰਜਾਬ ‘ਚ ਲਾਗੂ ਮਿੰਨੀ ਲੌਕਡਾਊਨ ‘ਚ ਕਈ ਰਿਆਇਤਾਂ ਦਿੱਤੀਆਂ ਜਾ ਸਕਦੀਆਂ ਹਨ। ਇਸ ਬੈਠਕ ‘ਚ ਬਲਬੀਰ ਸਿੱਧੂ ਸਮੇਤ ਕਈ ਅਫ਼ਸਰ ਸ਼ਾਮਲ ਹੋਣਗੇ।
COVID – 19 ਮਾਮਲਿਆਂ ‘ਚ ਲਗਾਤਾਰ ਗਿਰਾਵਟ, 75 ਦਿਨ ਬਾਅਦ ਸਾਹਮਣੇ ਆਏ ਸਭ ਤੋਂ ਘੱਟ ਕੇਸ
ਨਵੀਂ ਦਿੱਲੀ : ਦੇਸ਼ ਵਿੱਚ ਕੋਰੋਨਾ ਵਾਇਰਸ ਦੇ ਰੋਜ਼ਾਨਾ ਮਾਮਲਿਆਂ ਵਿੱਚ ਲਗਾਤਾਰ ਕਮੀ ਆ ਰਹੀ ਹੈ ਅਤੇ ਪਿਛਲੇ 24 ਘੰਟਿਆਂ ਦੇ ਦੌਰਾਨ ਦੇਸ਼ ਦੇ ਵੱਖ ਵੱਖ ਹਿੱਸਿਆਂ ‘ਚ ਸੰਕਰਮਣ ਦੇ 60,471 ਨਵੇਂ ਮਾਮਲੇ ਦਰਜ਼ ਕੀਤੇ, ਜੋ ਪਿਛਲੇ 75 ਦਿਨਾਂ ਵਿੱਚ ਸਭ ਤੋਂ ਘੱਟ ਹਨ। ਇਸ ਵਿੱਚ ਸੋਮਵਾਰ ਨੂੰ 39 ਲੱਖ 27 ਹਾਜ਼ਰ 154 ਲੋਕਾਂ ਨੂੰ ਕੋਰੋਨਾ ਦੇ ਟੀਕੇ ਲਗਾਏ ਗਏ। ਦੇਸ਼ ਵਿੱਚ ਹੁਣ ਤੱਕ 25 ਕਰੋੜ 90 ਲੱਖ 44 ਹਾਜ਼ਰ 072 ਲੋਕਾਂ ਦਾ ਟੀਕਾਕਰਣ ਕੀਤਾ ਜਾ ਚੁੱਕਿਆ ਹੈ।
ਕੇਂਦਰੀ ਸਿਹਤ ਮੰਤਰਾਲੇ ਵਲੋਂ ਮੰਗਲਵਾਰ ਸਵੇਰੇ ਜਾਰੀ ਅੰਕੜਿਆਂ ਦੇ ਅਨੁਸਾਰ ਪਿਛਲੇ 24 ਘੰਟਿਆਂ ਵਿੱਚ 60,471 ਨਵੇਂ ਮਾਮਲੇ ਆਉਣ ਦੇ ਨਾਲ ਹੀ ਸੰਕਰਮਣ ਦੀ ਸੰਖਿਆ ਵੱਧਕੇ ਦੋ ਕਰੋੜ 95 ਲੱਖ 70 ਹਜ਼ਾਰ 881 ਹੋ ਗਏ। ਇਸ ਦੌਰਾਨ 1 ਲੱਖ 17 ਹਜ਼ਾਰ 525 ਮਰੀਜ਼ ਤੰਦੁਰੁਸਤ ਹੋਏ ਹਨ ਜਿਸ ਨੂੰ ਮਿਲਾਕੇ ਦੇਸ਼ ਵਿੱਚ ਹੁਣ ਤੱਕ ਦੋ ਕਰੋੜ 82 ਲੱਖ 80 ਹਜ਼ਾਰ 472 ਲੋਕ ਇਸ ਮਹਾਂਮਾਰੀ ਨੂੰ ਮਾਤ ਦੇ ਚੁੱਕੇ ਹਨ। ਸਰਗਰਮ ਮਾਮਲੇ 59 ਹਜ਼ਾਰ 980 ਘੱਟ ਹੋ ਕੇ ਨੌਂ ਲੱਖ 33 ਹਜ਼ਾਰ 378 ਰਹਿ ਗਏ ਹਨ। ਪਿਛਲੇ 24 ਘੰਟਿਆਂ ਦੇ ਦੌਰਾਨ 2726 ਮਰੀਜ਼ ਆਪਣੀ ਜਾਨ ਗੁਆ ਬੈਠੇ ਅਤੇ ਇਸ ਰੋਗ ਤੋਂ ਮਰਨ ਵਾਲਿਆਂ ਦੀ ਕੁੱਲ ਗਿਣਤੀ ਵੱਧਕੇ 3 ਲੱਖ 77 ਹਜ਼ਾਰ 031 ਹੋ ਗਈ ਹੈ।
ਕਰਨਾਟਕ ਦੇ ਥਿਏਟਰ ਸਰਕਲ ਦੇ ਮਸ਼ਹੂਰ ਅਦਾਕਾਰ ਸੰਚਾਰੀ ਵਿਜੇ ਦੀ ਇੱਕ ਸੜਕ ਹਾਦਸੇ ‘ਚ ਹੋਈ ਮੌਤ
ਕੰਨੜ ਅਦਾਕਾਰ ਸੰਚਾਰੀ ਵਿਜੇ ਦਾ ਮੰਗਲਵਾਰ ਸਵੇਰੇ ਬੰਗਲੌਰ ਦੇ ਓਪੋਲੋ ਹਸਪਤਾਲ ਵਿੱਚ ਦਿਹਾਂਤ ਹੋ ਗਿਆ।11 ਜੂਨ ਦੀ ਰਾਤ ਨੂੰ ਉਸ ਨਾਲ ਸਾਈਕਲ ਤੋਂ ਖਿਸਕਣ ਕਾਰਨ ਹਾਦਸਾ ਵਾਪਰ ਗਿਆ ਸੀ। ਜਿਸ ਕਾਰਨ ਉਸ ਨੂੰ ਦਿਮਾਗ ਦੀਆਂ ਕਈ ਸੱਟਾਂ ਲੱਗੀਆਂ ਸਨ। ਇਸ ਹਾਦਸੇ ਤੋਂ ਬਾਅਦ ਉਸਨੂੰ ਤੁਰੰਤ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ। ਉਸਦੀ ਹਾਲਤ ਬਹੁਤ ਗੰਭੀਰ ਸੀ ਇਸ ਲਈ ਉਸ ਦਾ ਅਪਰੇਸ਼ਨ ਕਰਵਾਉਣਾ ਪਿਆ।
ਪਰ ਇਸਦੇ ਬਾਵਜੂਦ ਡਾਕਟਰ ਉਸਨੂੰ ਬਚਾ ਨਹੀਂ ਸਕੇ ਅਤੇ ਅਭਿਨੇਤਾ ਕੋਮਾ ਵਿੱਚ ਚਲਾ ਗਿਆ। 15 ਜੂਨ ਦੀ ਸਵੇਰ ਸੰਚਾਰੀ ਵਿਜੇ ਨੇ ਆਖਰੀ ਸਾਹ ਲਿਆ। ਵਿਜੇ ਦੇ ਪਰਿਵਾਰ ਨੇ ਆਪਣੇ ਪੁੱਤਰ ਦੀ ਮੌਤ ਤੋਂ ਬਾਅਦ ਉਨ੍ਹਾਂ ਦੇ ਅੰਗ ਦਾਨ ਕਰਨ ਦਾ ਫੈਸਲਾ ਕੀਤਾ ਹੈ।
ਰਿਪੋਰਟਾਂ ਦੇ ਅਨੁਸਾਰ, ਇਹ ਘਟਨਾ ਸ਼ਨੀਵਾਰ ਰਾਤ ਕਰੀਬ 11:45 ਵਜੇ ਵਾਪਰੀ ਜਦੋਂ ਸੰਚਾਰੀ ਆਪਣੇ ਇੱਕ ਦੋਸਤ ਦੇ ਨਾਲ, ਦਵਾਈ ਲੈਣ ਲਈ ਇੱਕ ਸਾਈਕਲ ਤੇ ਬਾਹਰ ਗਿਆ ਹੋਇਆ ਸੀ। ਵਿਜੇ ਦੇ ਦੋਸਤ ਨਵੀਨ ਨੇ ਦੱਸਿਆ ਕਿ ਬਾਰਸ਼ ਕਾਰਨ ਸੜਕਾਂ ਬਹੁਤ ਗਿੱਲੀਆਂ ਸਨ, ਜਿਸ ਕਾਰਨ ਉਸ ਦੀ ਸਾਈਕਲ ਦਾ ਸੰਤੁਲਨ ਵਿਗੜ ਗਿਆ ਅਤੇ ਇਹ ਖਿਸਕ ਗਈ। ਉਸਦੀ ਸਾਈਕਲ ਸਿੱਧਾ ਬਿਜਲੀ ਦੇ ਖੰਭੇ ਵਿੱਚ ਜਾ ਵੱਜੀ। ਇਸ ਹਾਦਸੇ ਵਿੱਚ ਨਵੀਨ ਦੀ ਲੱਤ ਟੁੱਟ ਗਈ ਅਤੇ ਸੰਚਾਰੀ ਵਿਜੇ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ। ਉਸ ਦੇ ਸਿਰ ਅਤੇ ਪੱਟ ਨੂੰ ਗੰਭੀਰ ਸੱਟਾਂ ਲੱਗੀਆਂ ਸਨ।
ਸੰਚਾਰੀ ਵਿਜੇ ਨੂੰ ਘਟਨਾ ਤੋਂ ਬਾਅਦ ਤੁਰੰਤ ਹਸਪਤਾਲ ਲਿਆਂਦਾ ਗਿਆ ਅਤੇ ਉਸ ਦੀ ਸਰਜਰੀ ਕਰਵਾਈ ਗਈ। ਪਰ ਡਾਕਟਰ ਇਸ ਅਦਾਕਾਰ ਨੂੰ ਬਚਾ ਨਹੀਂ ਸਕੇ। ਸੰਚਾਰੀ ਵਿਜੇ ਦੀ ਮੌਤ ਤੋਂ ਬਾਅਦ, ਉਸਦੇ ਪਰਿਵਾਰ ਨੇ ਉਸਦੇ ਅੰਗ ਦਾਨ ਕਰਕੇ ਸਮਾਜ ਸੇਵਾ ਕਰਨ ਦਾ ਫੈਸਲਾ ਕੀਤਾ ਹੈ।
ਸੰਚਾਰੀ ਵਿਜੇ ਕਰਨਾਟਕ ਦੇ ਮਸ਼ਹੂਰ ਅਦਾਕਾਰਾਂ ਵਿਚੋਂ ਇਕ ਸੀ। ਇਹ ਅਦਾਕਾਰ ਕਰਨਾਟਕ ਦੇ ਥਿਏਟਰ ਸਰਕਲ ਦੇ ਮਸ਼ਹੂਰ ਅਦਾਕਾਰ ਸਨ। ਉਸਨੇ ਆਪਣੀ ਫਿਲਮ ਦੀ ਸ਼ੁਰੂਆਤ ਸਾਲ 2011 ਵਿੱਚ ਕੰਨੜ ਫਿਲਮ ‘ਰੰਗੱਪਾ ਹੋਗਾਬਿਤਾਣਾ’ ਨਾਲ ਕੀਤੀ ਸੀ। ਉਨ੍ਹਾਂ ਨੂੰ ਫਿਲਮ ‘ਨਾਨੂ ਅਵਨਾਲਾ ਅਵਲੂ’ ਵਿੱਚ ਸਰਬੋਤਮ ਪ੍ਰਦਰਸ਼ਨ ਲਈ ਰਾਸ਼ਟਰੀ ਪੁਰਸਕਾਰ ਨਾਲ ਸਨਮਾਨਤ ਕੀਤਾ ਗਿਆ ਸੀ।
