ਨਵੀਂ ਦਿੱਲੀ : ਕੇਂਦਰ ਸਰਕਾਰ 1 ਅਕਤੂਬਰ ਤੋਂ ਦੇਸ਼ ‘ਚ ਲੇਬਰ ਕੋਡ ਦੇ ਨਿਯਮਾਂ ਨੂੰ ਲਾਗੂ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਜਿਵੇਂ ਹੀ ਇਹ ਕਾਨੂੰਨ ਲਾਗੂ ਹੋ ਜਾਂਦਾ ਹੈ, ਕਰਮਚਾਰੀਆਂ ਦੇ ਟੇਕ ਹੋਮ ਸੈਲਰੀ ਤੇ ਪੀਐਫ ਢਾਂਚੇ ‘ਚ ਤਬਦੀਲੀ ਆਵੇਗਾ। ਤਬਦੀਲੀ ਕਰਮਚਾਰੀਆਂ ਦੀ ਟੇਕ ਹੋਮ ਤਨਖਾਹ ਨੂੰ ਘਟਾ ਦੇਵੇਗੀ, ਜਦੋਂਕਿ ਪ੍ਰੋਵੀਡੈਂਟ ਫੰਡ ਯਾਨੀ ਪੀਐਫ ‘ਚ ਵਧੇਰੇ ਪੈਸਾ ਇਕੱਠਾ ਹੋਣਾ ਸ਼ੁਰੂ ਹੋ ਜਾਵੇਗਾ।
ਦਰਅਸਲ, ਕੇਂਦਰ ਸਰਕਾਰ ਚਾਰੇ ਕਿਰਤ ਕਾਨੂੰਨਾਂ ਨੂੰ ਜਲਦ ਤੋਂ ਜਲਦ ਲਾਗੂ ਕਰਨਾ ਚਾਹੁੰਦੀ ਹੈ। ਇਸ ਤੋਂ ਪਹਿਲਾਂ 1 ਜੁਲਾਈ ਤੋਂ ਲੇਬਰ ਕੋਡ ਦੇ ਨਿਯਮਾਂ ਨੂੰ ਲਾਗੂ ਕਰਨ ਦੀ ਯੋਜਨਾ ਸੀ ਪਰ ਰਾਜ ਸਰਕਾਰਾਂ ਤਿਆਰ ਨਹੀਂ ਸਨ। ਇਨ੍ਹਾਂ ਚਾਰ ਕੋਡਾਂ ਤਹਿਤ, ਕੇਂਦਰ ਤੇ ਰਾਜਾਂ ਦੋਵਾਂ ਨੂੰ ਇਨ੍ਹਾਂ ਨਿਯਮਾਂ ਨੂੰ ਨੋਟੀਫਾਈ ਕਰਨਾ ਪਵੇਗਾ, ਉਸ ਸਮੇਂ ਹੀ ਇਹ ਕਾਨੂੰਨ ਸਬੰਧਤ ਰਾਜਾਂ ‘ਚ ਲਾਗੂ ਹੋਣਗੇ। ਕਿਰਤ ਕਾਨੂੰਨਾਂ ਦੇ ਲਾਗੂ ਹੋਣ ਤੋਂ ਬਾਅਦ, ਤਨਖਾਹ ਢਾਂਚੇ ਵਿੱਚ ਬਹੁਤ ਸਾਰੇ ਬਦਲਾਅ ਹੋਣ ਜਾ ਰਹੇ ਹਨ।
ਨਵੇਂ ਕਾਨੂੰਨ ਨਾਲ, ਮੁਲਾਜ਼ਮਾਂ ਦੀ ਮੁੱਢਲੀ ਤਨਖਾਹ ਤੇ ਭਵਿੱਖ ਫੰਡ ਦੀ ਗਣਨਾ ਕਰਨ ਦੇ ਢੰਗ ਵਿੱਚ ਮਹੱਤਵਪੂਰਨ ਤਬਦੀਲੀ ਆਵੇਗੀ। ਕਿਰਤ ਮੰਤਰਾਲਾ ਉਦਯੋਗਿਕ ਸਬੰਧਾਂ, ਉਜਰਤਾਂ, ਸਮਾਜਿਕ ਸੁਰੱਖਿਆ, ਕਿੱਤਾਮੁਖੀ ਤੇ ਸਿਹਤ ਸੁਰੱਖਿਆ ਤੇ ਕੰਮ ਕਰਨ ਦੀਆਂ ਸਥਿਤੀਆਂ ਦੇ ਸਬੰਧ ਵਿੱਚ ਨਵੇਂ ਨਿਯਮਾਂ ਨੂੰ ਲਾਗੂ ਕਰਨ ਦੀ ਤਿਆਰੀ ਕਰ ਰਿਹਾ ਹੈ। 44 ਕੇਂਦਰੀ ਕਿਰਤ ਕਾਨੂੰਨਾਂ ਨੂੰ ਚਾਰ ਕਿਰਤ ਕੋਡਾਂ ਦੇ ਅਧੀਨ ਇਕਸਾਰ ਕੀਤਾ ਜਾ ਸਕਦਾ ਹੈ।
ਤਬਦੀਲੀ ਤੋਂ ਬਾਅਦ ਕਰਮਚਾਰੀਆਂ ਦੀ ਮੁੱਢਲੀ ਤਨਖਾਹ 15000 ਰੁਪਏ ਤੋਂ 21000 ਰੁਪਏ ਹੋ ਸਕਦੀ ਹੈ। ਲੇਬਰ ਯੂਨੀਅਨ ਮੰਗ ਕਰ ਰਹੀ ਹੈ ਕਿ ਕਰਮਚਾਰੀਆਂ ਦੀ ਘੱਟੋ ਘੱਟ ਮੁੱਢਲੀ ਤਨਖਾਹ 15000 ਰੁਪਏ ਤੋਂ ਵਧਾ ਕੇ 21000 ਰੁਪਏ ਕੀਤੀ ਜਾਵੇ। ਜੇ ਅਜਿਹਾ ਹੁੰਦਾ ਹੈ ਤਾਂ ਤੁਹਾਡੀ ਤਨਖਾਹ ਵਧੇਗੀ। ਨਵੇਂ ਤਨਖਾਹ ਕੋਡ ਤਹਿਤ, ਭੱਤਿਆਂ ਨੂੰ 50 ਪ੍ਰਤੀਸ਼ਤ ਤੱਕ ਸੀਮਤ ਕੀਤਾ ਜਾਵੇਗਾ। ਇਸ ਦਾ ਮਤਲਬ ਹੈ ਕਿ ਕਰਮਚਾਰੀਆਂ ਦੀ ਕੁੱਲ ਤਨਖਾਹ ਦਾ 50 ਫੀਸਦੀ ਮੁੱਢਲੀ ਤਨਖਾਹ ਹੋਵੇਗੀ।
ਵਰਤਮਾਨ ‘ਚ, ਮਾਲਕ ਤਨਖਾਹ ਨੂੰ ਕਈ ਕਿਸਮਾਂ ਦੇ ਭੱਤਿਆਂ ‘ਚ ਵੰਡਦੇ ਹਨ। ਇਸ ਨਾਲ ਮੁੱਢਲੀ ਤਨਖਾਹ ਘੱਟ ਰਹਿੰਦੀ ਹੈ, ਜਿਸ ਨਾਲ ਭਵਿੱਖ ਨਿਧੀ ਤੇ ਆਮਦਨ ਟੈਕਸ ‘ਚ ਯੋਗਦਾਨ ਘੱਟ ਜਾਂਦਾ ਹੈ।
ਕੀ ਹੋਵੇਗਾ ਫਾਇਦਾ
ਨਵੀਆਂ ਤਬਦੀਲੀਆਂ ਤੋਂ ਬਾਅਦ, ਮੁੱਢਲੀ ਤਨਖਾਹ 50 ਪ੍ਰਤੀਸ਼ਤ ਜਾਂ ਵੱਧ ਹੋ ਸਕਦੀ ਹੈ। ਜਦੋਂਕਿ ਮੁੱਢਲੀ ਤਨਖ਼ਾਹ ਦੇ ਅਧਾਰ ਤੇ ਪੀਐਫ ਦੀ ਗਣਨਾ ਕੀਤੀ ਜਾਂਦੀ ਹੈ, ਤਾਂ ਇਸ ‘ਚ ਕੰਪਨੀ ਤੇ ਕਰਮਚਾਰੀ ਦੋਵਾਂ ਦਾ ਯੋਗਦਾਨ ਵਧੇਗਾ। ਗਰੈਚੂਟੀ ਤੇ ਪੀਐਫ ਵਿੱਚ ਯੋਗਦਾਨ ਵਿੱਚ ਵਾਧੇ ਦੇ ਨਾਲ, ਰਿਟਾਇਰਮੈਂਟ ਤੋਂ ਬਾਅਦ ਪ੍ਰਾਪਤ ਕੀਤੀ ਰਕਮ ਵਿੱਚ ਵਾਧਾ ਹੋਏਗਾ।
ਪੀਐਫ ‘ਚ ਕਰਮਚਾਰੀਆਂ ਦੇ ਯੋਗਦਾਨ ਨੂੰ ਵਧਾਉਣ ਨਾਲ ਕੰਪਨੀਆਂ ‘ਤੇ ਵਿੱਤੀ ਬੋਝ ਵਧੇਗਾ। ਇਸ ਦੇ ਨਾਲ ਹੀ, ਬੇਸਿਕ ਤਨਖਾਹ ਵਿੱਚ ਵਾਧੇ ਦੇ ਕਾਰਨ, ਗ੍ਰੈਚੂਟੀ ਦੀ ਮਾਤਰਾ ਵੀ ਪਹਿਲਾਂ ਨਾਲੋਂ ਜ਼ਿਆਦਾ ਹੋਵੇਗੀ, ਇਹ ਪਹਿਲਾਂ ਦੇ ਮੁਕਾਬਲੇ ਡੇਢ ਗੁਣਾ ਜ਼ਿਆਦਾ ਹੋ ਸਕਦੀ ਹੈ। ਇਹ ਚੀਜ਼ਾਂ ਪ੍ਰਾਈਵੇਟ ਕੰਪਨੀਆਂ ਦੀਆਂ ਬੈਲੇਂਸ ਸ਼ੀਟਾਂ ਨੂੰ ਵੀ ਪ੍ਰਭਾਵਤ ਕਰਨਗੀਆਂ।
