ਝੱਜਰ, 7 ਜੁਲਾਈ 2026 : ਹਰਿਆਣਾ ਐਂਟੀ ਕਰਪਸ਼ਨ ਬਿਊਰੋ (Haryana Anti-Corruption Bureau) ਨੇ ਚਕਬੰਦੀ ਵਿਭਾਗ ਨਾਲ ਸਬੰਧਤ ਇੱਕ ਕਰਮਚਾਰੀ ਨੂੰ 2.50 ਲੱਖ ਰੁਪਏ ਦੀ ਰਿਸ਼ਵਤ ਲੈਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ (Arrested) ਕੀਤਾ ਹੈ ।
ਕੌਣ ਹੈ ਇਹ ਵਿਅਕਤੀ
ਮਿਲੀ ਜਾਣਕਾਰੀ ਅਨੁਸਾਰ ਹਰਿਆਣਾ ਐਂਟੀ ਕਰਪਸ਼ਨ ਬਿਊਰੋ ਵਲੋਂ ਜੋ ਇਕ ਚਕਬੰਦੀ ਵਿਭਾਗ ਦੇ ਇਕ ਕਰਮਚਾਰੀ ਨੂੰ ਲੱਖਾਂ ਰੁਪਏ ਦੀ ਰਿਸ਼ਵਤ (Bribe) ਦੇ ਮਾਮਲੇ ਵਿਚ ਗ੍ਰਿਫ਼ਤਾਰ ਕੀਤਾ ਗਿਆ ਹੈ ਦੀ ਪਛਾਣ ਬਲਵਾਨ ਸਿੰਘ (Balwan Singh) ਵਜੋਂ ਹੋਈ ਹੈ, ਜੋ ਹਿਸਾਰ ਦੇ ਆਦਮਪੁਰ ਮੰਡੀ ਦਾ ਰਹਿਣ ਵਾਲਾ ਹੈ । ਉਸ ‘ਤੇ ਝੱਜਰ ਦੀ ਬੇਰੀ ਤਹਿਸੀਲ ਦੇ ਪਿੰਡ ਐੱਮ. ਪੀ. ਮਾਜਰਾ ਵਿਖੇ ਜ਼ਮੀਨ ਦੀ ਦਰੁਸਤੀ (ਸੁਧਾਰ) ਕਰਵਾਉਣ ਦੇ ਨਾਂ ‘ਤੇ ਸ਼ਿਕਾਇਤਕਰਤਾ ਨਵੀਨ ਤੋਂ 2 ਲੱਖ 50 ਹਜ਼ਾਰ ਰੁਪਏ ਦੀ ਰਿਸ਼ਵਤ ਮੰਗਣ ਦਾ ਦੋਸ਼ ਹੈ ।
ਮੁਲਜਮ ਰਿਸ਼ਵਤ ਦੇ 50 ਹਜ਼ਾਰ ਪਹਿਲਾਂ ਹੀ ਲੈ ਚੁੱਕਿਆ ਸੀ
ਦੋਸ਼ ਹੈ ਕਿ ਮੁਲਜ਼ਮ ਪਹਿਲਾਂ ਹੀ 50 ਹਜ਼ਾਰ ਰੁਪਏ ਰਿਸ਼ਵਤ ਵਜੋਂ ਲੈ ਚੁੱਕਾ ਸੀ । ਬਾਕੀ 2 ਲੱਖ ਰੁਪਏ ਲੈਣ ਲਈ ਉਸ ਨੇ ਸਿਕਾਇਤਕਰਤਾ (Complainant) ਨੂੰ ਝੱਜਰ-ਗੁਰੂਗ੍ਰਾਮ ਰੋਡ ‘ਤੇ ਬੁਲਾਇਆ ਸੀ । ਸਿ਼ਕਾਇਤ ਮਿਲਣ ਤੋਂ ਬਾਅਦ ਐਂਟੀ ਕਰਪਸ਼ਨ ਬਿਊਰੋ ਨੇ ਯੋਜਨਾਬੱਧ ਢੰਗ ਨਾਲ ਜਾਲ ਵਿਛਾਇਆ । ਇੰਸਪੈਕਟਰ ਦੇਵੇਂਦਰ ਦੀ ਅਗਵਾਈ ਹੇਠ ਟੀਮ ਨੇ ਕਾਰਵਾਈ ਕਰਦਿਆਂ ਮੁਲਜ਼ਮ ਨੂੰ 2 ਲੱਖ ਰੁਪਏ ਦੀ ਰਿਸ਼ਵਤ ਲੈਂਦੇ ਹੋਏ ਮੌਕੇ ਤੋਂ ਕਾਬੂ ਕਰ ਲਿਆ ।
