ਢਾਕਾ, 24 ਅਗਸਤ 2026 : ਬੰਗਲਾਦੇਸ਼ (Bangladesh) ਦੇ ਰੰਗਪੁਰ ਸ਼ਹਿਰ ‘ਚ ਸਕੂਲ ਦੇ ਸੇਵਾਮੁਕਤ ਹਿੰਦੁ ਅਧਿਆਪਕ, ਉਨ੍ਹਾਂ ਦੀ ਪਤਨੀ ਅਤੇ 2 ਬੱਚਿਆਂ ਦਾ ਰਿਹਾਇਸ਼ ‘ਤੇ ਕਤਲ (Murder) ਕਰ ਦਿੱਤਾ ਗਿਆ ।
ਕੌਣ ਕੌਣ ਹਨ ਮ੍ਰਿਤਕਾ ਵਿਚ
ਮ੍ਰਿਤਕਾਂ ਦੀ ਪਛਾਣ ਗਣਪਤੀ ਚੱਕਰਵਰਤੀ (65), ਪ੍ਰੀਤੀਲਤਾ ਚੱਕਰਵਰਤੀ (50), ਅਗਾਮੀ ਚੱਕਰਵਰਤੀ ਪ੍ਰਾਰਥੀ (23) ਅਤੇ ਪ੍ਰਿਅਮ ਚੱਕਰਵਰਤੀ (12) ਵਜੋਂ ਹੋਈ ਹੈ । ਪੁਲਸ ਨੇ ਕਤਲਾਂ ‘ਚ ਕਥਿਤ ਸ਼ਮੂਲੀਅਤ ਦੇ ਦੋਸ਼ ‘ਚ ਮੁਗਧੋ ਅਤੇ ਸਿੱਧਾਰਥ ਨਾਂ ਦੇ 2 ਵਿਅਕਤੀਆਂ ਨੂੰ ਹਿਰਾਸਤ (Detention) ‘ਚ ਲਿਆ ਹੈ । ਦੋਵੇਂ ਆਪਸ ‘ਚ ਚਚੇਰੇ ਭਰਾ ਹਨ ।
ਕੀ ਦੱਸਿਆ ਪੁਲਸ ਕਮਿਸ਼ਨਰ ਨੇ
ਰੰਗਪੁਰ ਮੈਟਰੋਪੋਲੀਟਨ ਪੁਲਸ ਦੇ ਕਮਿਸ਼ਨਰ (Police Commissioner) ਮੁਹੰਮਦ ਅਬਦੁਲ ਮਾਬੂਦ ਨੇ ਐਤਵਾਰ ਨੂੰ ਮੀਡੀਆ ਨੂੰ ਦੱਸਿਆ ਕਿ ਦੋਵੇਂ ਮੁਲਜ਼ਮ ਵੀਰਵਾਰ ਰਾਤ ਨਾਲ ਲੱਗਦੀ ਇਮਾਰਤ ਦੇ ਰਸਤੇ ਚੱਕਰਵਰਤੀ ਦੇ ਘਰ ਦੀ ਛੱਤ ‘ਤੇ ਪਹੁੰਚੇ ਅਤੇ ਉੱਥੇ ਨਸ਼ੀਲੇ ਪਦਾਰਥ `ਯਾਬਾ`ਦਾ ਸੇਵਨ ਕਰ ਰਹੇ ਸਨ । ਅਧਿਕਾਰੀ ਅਨੁਸਾਰ ਆਵਾਜ਼ ਸੁਣ ਕੇ ਗਣਪਤੀ ਚੱਕਰਵਰਤੀ ਛੱਤ ‘ਤੇ ਗਏ ਅਤੇ ਉੱਥੇ ਮੌਜੂਦ ਦੋਵਾਂ ਵਿਅਕਤੀਆਂ ਤੋਂ ਪੁੱਛਗਿੱਛ ਕੀਤੀ ।
ਕੀ ਦੱਸਿਆ ਪੁਲਸ ਨੇ
ਪੁਲਸ ਨੇ ਦੱਸਿਆ ਕਿ ਖੁਦ ਦੇ ਫੜੇ ਜਾਣ ਤੋਂ ਬਚਣ ਲਈ ਮੁਲਜ਼ਮਾਂ ਨੇ ਚੱਕਰਵਰਤੀ ਦੇ ਮੋਢੇ ‘ਤੇ ਰੱਖੇ ਪਰਨੇ ਨਾਲ ਉਨ੍ਹਾਂ ਦਾ ਗਲਾ ਘੁੱਟ ਦਿੱਤਾ । ਅਧਿਕਾਰੀ ਨੇ ਦੱਸਿਆ ਕਿ ਰੌਲਾ ਸੁਣ ਕੇ ਚੱਕਰਵਰਤੀ ਦੀ ਪਤਨੀ ਛੱਤ ‘ਤੇ ਗਈ ਤਾਂ ਮੁਲਜ਼ਮਾਂ ਨੇ ਕਥਿਤ ਤੌਰ ‘ਤੇ ਪੌੜੀਆਂ ‘ਤੇ ਕੱਪੜੇ ਦੇ ਇਕ ਟੁਕੜੇ ਨਾਲ ਉਸ ਦਾ ਵੀ ਗਲਾ ਘੁੱਟ (Strangulation) ਦਿੱਤਾ । ਪੁਲਸ ਨੇ ਦੱਸਿਆ ਕਿ ਘਟਨਾ ਦੌਰਾਨ ਜੋੜੇ ਦੀ ਧੀ ਤੇ ਪੁੱਤਰ ਦਾ ਵੀ ਕਤਲ ਕਰ ਦਿੱਤਾ ਗਿਆ ।
ਸੇਵਾਮੁਕਤੀ ਤੋਂ ਬਾਅਦ ਹੋਮਿਓਪੈਥੀ ਦਾ ਕੰਮ ਕਰ ਰਹੇ ਸਨ
ਗਣਪਤੀ ਚੱਕਰਵਰਤੀ ਪਿਛਲੇ ਸਾਲ 31 ਦਸੰਬਰ ਨੂੰ ਰੰਗਪੁਰ ਜ਼ਿਲਾ ਸਕੂਲ ਤੋਂ ਸੇਵਾਮੁਕਤ ਹੋਏ ਸਨ । ਸੇਵਾਮੁਕਤੀ ਤੋਂ ਬਾਅਦ ਉਨ੍ਹਾਂ ਨੇ ਹੋਮਿਓਪੈਥਿਕ ਪ੍ਰੈਕਟੀਸ਼ਨਰ ਵਜੋਂ ਕੰਮ ਸ਼ੁਰੂ ਕੀਤਾ ਸੀ । ਉਨ੍ਹਾਂ ਦੀ ਧੀ ਅਗਾਮੀ ਨੇ ਇਸੇ ਸਾਲ ਰੰਗਪੁਰ ਕਾਰਮਾਈਕਲ ਕਾਲਜ ਤੋਂ ਅੰਗਰੇਜ਼ੀ ‘ਚ ਮਾਸਟਰ ਡਿਗਰੀ ਪੂਰੀ ਕੀਤੀ ਸੀ । ਉੱਥੇ ਹੀ ਉਨ੍ਹਾਂ ਦਾ 12 ਸਾਲਾ ਪੁੱਤਰ ਪ੍ਰਿਅਮ ਰੰਗਪੁਰ ਜ਼ਿਲਾ ਸਕੂਲ ‘ਚ 5ਵੀਂ ਜਮਾਤ ‘ਚ ਪੜ੍ਹਦਾ ਸੀ । ਸਥਾਨਕ ਵਾਸੀ ਸੁਧਾਂਬੂ ਚੰਦਰ ਦਾਸ ਅਨੁਸਾਰ, ਪਰਿਵਾਰ ਲੱਗਭਗ 4 ਸਾਲਾਂ ਤੋਂ ਇਸ ਇਲਾਕੇ ‘ਚ ਰਹਿ ਰਿਹਾ ਸੀ ।
