ਦੇਸ਼ ‘ਚ ਕੋਰੋਨਾ ਦੀ ਦੂਜੀ ਲਹਿਰ ਦਾ ਕਹਿਰ ਅਜੇ ਤੱਕ ਵੀ ਖਤਮ ਨਹੀਂ ਹੋਇਆ ਤੇ ਇਸਦੇ ਨਾਲ ਹੀ ਤੀਜੀ ਲਹਿਰ ਦਾ ਖਤਰਾ ਸਿਰ ‘ਤੇ ਮੰਡਰਾਅ ਰਿਹਾ ਹੈ। ਇਸ ਦੇ ਨਾਲ –ਨਾਲ ਦੁਨੀਆ ਭਰ ਦੇ ਕਈ ਦੇਸ਼ਾਂ ‘ਚ ਕੋਰੋਨਾ ਦੀ ਤੀਜੀ ਲਹਿਰ ਨੇ ਦਸਤਕ ਦੇ ਦਿੱਤੀ ਹੈ। 126 ਦੇਸ਼ਾਂ ‘ਚ ਕੋਰੋਨਾ ਦੇ ਮਾਮਲੇ ਇੱਕ ਵਾਰ ਫਿਰ ਤੋਂ ਵਧਣ ਲੱਗੇ ਹਨ। ਦੁਨੀਆਂ ਦੇ 33 ਦੇਸ਼ ਅਜਿਹੇ ਹਨ। ਜਿੱਥੇ ਦੋ ਹਫ਼ਤਿਆਂ ‘ਚ ਕੋਰੋਨਾ ਮਹਾਂਮਾਰੀ ਦੇ ਕੇਸ ਦੁੱਗਣੇ ਹੋ ਗਏ। ਇਨ੍ਹਾਂ 33 ਦੇਸ਼ਾਂ ‘ਚ 100 ਫੀਸਦ ਤੋਂ ਜ਼ਿਆਦਾ ਕੋਰੋਨਾ ਕੇਸਾਂ ‘ਚ ਵਾਧਾ ਹੋਇਆ ਹੈ।
ਇਸ ਮਹਾਂਮਾਰੀ ਦਾ ਕਹਿਰ ਵੱਧਦਾ ਹੀ ਜਾ ਰਿਹਾ ਹੈ।ਨੀਦਰਲੈਂਡ ‘ਚ ਪਿਛਲੇ 7 ਦਿਨਾਂ ‘ਚ ਸਭ ਤੋਂ ਜ਼ਿਆਦਾ ਕੋਰੋਨਾ ਕੇਸ 299 ਫੀਸਦ ਵਧੇ ਹਨ। ਅਮਰੀਕਾ ‘ਚ ਇਕ ਹਫ਼ਤੇ ‘ਚ 69 ਫੀਸਦ ਕੇਸ ਵਧ ਗਏ। ਇੰਡੋਨੇਸ਼ੀਆ ‘ਚ ਪਿਛਲੇ 7 ਦਿਨ ‘ਚ 44 ਫੀਸਦ ਕੇਸ ਵਧੇ ਹਨ। ਥਾਈਲੈਂਡ ‘ਚ ਇਸ ਸਮੇਂ ‘ਚ 47 ਫੀਸਦ ਤੇ ਇੰਗਲੈਂਡ ‘ਚ 33 ਫੀਸਦ ਕੇਸ ਸਿਰਫ਼ 7 ਦਿਨਾਂ ‘ਚ ਵਧ ਗਏ। ਇਨ੍ਹਾਂ ਦੇਸ਼ਾਂ ‘ਚ ਕੋਰੋਨਾ ਨਿਯਮਾਂ ਦਾ ਪਾਲਣ ਨਹੀਂ ਕੀਤਾ ਗਿਆ।
ਨੀਦਰਲੈਂਡ ਤੇ ਯੂਕੇ ‘ਚ ਹਰ ਦਿਨ ਸਭ ਤੋਂ ਜ਼ਿਆਦਾ ਕੋਰੋਨਾ ਕੇਸ ਦਰਜ ਕੀਤੇ ਜਾ ਰਹੇ ਹਨ। ਦੋਵਾਂ ਦੇਸ਼ਾਂ ‘ਚ ਰੋਜ਼ਾਨਾ 50 ਹਜ਼ਾਰ ਨਵੇਂ ਕੇਸ ਆ ਰਹੇ ਹਨ। ਹਰ ਦਿਨ ਮੌਤਾਂ ਵੀ ਹਜ਼ਾਰ ਦੇ ਕਰੀਬ ਹੋ ਰਹੀਆਂ ਹਨ। ਉੱਥੇ ਹੀ ਬ੍ਰਾਜ਼ੀਲ ਤੇ ਅਮਰੀਕਾ ‘ਚ ਪ੍ਰਤੀ ਦਿਨ 40 ਹਜ਼ਾਰ ਤੋਂ ਜ਼ਿਆਦਾ ਨਵੇਂ ਕੇਸ ਵਧ ਰਹੇ ਹਨ।
ਭਾਰਤ ‘ਚ ਵੀ ਤੀਜੀ ਲਹਿਰ ਦਾ ਖਤਰਾ ਬਣਿਆ ਹੋਇਆ ਹੈ। ਨੀਤੀ ਆਯੋਗ ਦੇ ਮੈਂਬਰ ਡਾ.ਵੀਕੇ ਪੌਲ ਨੇ ਕਿਹਾ ਕਿ ਦੁਨੀਆਂ ਕੋਵਿਡ ਦੀ ਤੀਜੀ ਲਹਿਰ ਵੱਲ ਵਧ ਰਹੀ ਹੈ। ਭਾਰਤ ‘ਚ ਕੋਵਿਡ ਦੇ ਖਿਲਾਫ ਲੜਾਈ ਚ ਅਗਲੇ 100-125 ਦਿਨ ਮਹੱਤਵਪੂਰਨ ਹੈ। ਹੁਣ ਵੀ ਵੱਡੀ ਸੰਖਿਆ ‘ਚ ਲੋਕ ਇਸ ਮਹਾਂਮਾਰੀ ਦਾ ਸ਼ਿਕਾਰ ਹੋ ਰਹੇ ਹਨ। ਉਨ੍ਹਾਂ ਨੇ ਕਿਹਾ, ‘ਤੀਜੀ ਲਹਿਰ ਦਾ ਸਵਾਲ ਵਾਰ-ਵਾਰ ਆਉਂਦਾ ਰਹਿੰਦਾ ਹੈ। ਅਜਿਹਾ ਇਸ ਲਈ ਹੈ ਕਿਉਂਕਿ ਸਾਡੀ ਆਬਾਦੀ ਅਜੇ ਵੀ ਖਤਰੇ ‘ਚ ਹੈ।