NEET UG Counseling 2021: ਨੀਟ ਯੂਜੀ ਕਾਊਂਸਲਿੰਗ 2021-2022 ‘ਚ ਸ਼ਾਮਲ ਹੋਣ ਵਾਲੇ ਦੇਸ਼ ਭਰ ਦੇ ਉਮੀਦਵਾਰਾਂ ਲਈ ਵੱਡੀ ਖਬਰ ਹੈ। ਕੇਂਦਰੀ ਸਿਹਤ ਮੰਤਰਾਲੇ ਦੀ ਮੈਡੀਕਲ ਕਾਉਂਸਲਿੰਗ ਕਮੇਟੀ ਨੇ ਚੱਲ ਰਹੀ NEET UG ਕਾਉਂਸਲਿੰਗ 2021 ਦੇ ਸਬੰਧ ਵਿੱਚ ਮਹੱਤਵਪੂਰਨ ਸਪੱਸ਼ਟੀਕਰਨ ਜਾਰੀ ਕੀਤੇ ਹਨ। ਕਮੇਟੀ ਵੱਲੋਂ 5 ਮਾਰਚ, 2022 ਨੂੰ ਜਾਰੀ ਕੀਤੇ ਤਾਜ਼ਾ ਨੋਟਿਸ ਅਨੁਸਾਰ ਮੈਡੀਕਲ ਤੇ ਡੈਂਟਲ ਕਾਲਜਾਂ ‘ਚ ਯੂਜੀ ਕੋਰਸਾਂ ‘ਚ ਦਾਖ਼ਲੇ ਲਈ ਮਾਈਗ੍ਰੇਸ਼ਨ ਸਰਟੀਫਿਕੇਟ ਜ਼ਰੂਰੀ ਨਹੀਂ ਹੈ। MCC ਦੇ ਨੋਟਿਸ ਅਨੁਸਾਰ ਹੁਣ ਉਮੀਦਵਾਰਾਂ ਲਈ ਗ੍ਰੈਜੂਏਸ਼ਨ ਲਈ ਮਾਈਗ੍ਰੇਸ਼ਨ ਸਰਟੀਫਿਕੇਟ ਜਮ੍ਹਾਂ ਕਰਨਾ ਲਾਜ਼ਮੀ ਨਹੀਂ ਹੋਵੇਗਾ। ਦੱਸ ਦੇਈਏ ਕਿ ਦੇਸ਼ ਦੇ ਕਈ ਉਮੀਦਵਾਰਾਂ ਨੂੰ ਕਾਲਜਾਂ ‘ਚ ਮਾਈਗ੍ਰੇਸ਼ਨ ਸਰਟੀਫਿਕੇਟ ਦੀ ਮੰਗ ਕਾਰਨ ਦਾਖ਼ਲੇ ‘ਚ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਜਿਸ ਵਿਚ ਉਹ ਵੱਖ-ਵੱਖ ਸੋਸ਼ਲ ਮੀਡੀਆ ਪਲੇਟਫਾਰਮਾਂ ਰਾਹੀਂ ਛੋਟ ਦੀ ਮੰਗ ਕਰ ਰਹੇ ਸਨ।
ਜਾਣਕਾਰੀ ਅਨੁਸਾਰ ਮੈਡੀਕਲ ਕੌਂਸਲਿੰਗ ਕਮੇਟੀ ਨੇ ਮਾਈਗ੍ਰੇਸ਼ਨ ਸਰਟੀਫਿਕੇਟ ਸਬੰਧੀ ਨਿਰਧਾਰਤ ਨਿਯਮਾਂ ‘ਚ ਉਮੀਦਵਾਰਾਂ ਨੂੰ ਆਰਜ਼ੀ ਰਾਹਤ ਦਿੱਤੀ ਹੈ। MCC ਨੇ ਆਪਣੇ ਨੋਟਿਸ ਰਾਹੀਂ ਦੇਸ਼ ਭਰ ਦੇ ਕਾਲਜਾਂ ਨੂੰ ਕਿਹਾ ਹੈ ਕਿ ਉਹ ਬਿਨਾਂ ਮਾਈਗ੍ਰੇਸ਼ਨ ਸਰਟੀਫਿਕੇਟ ਦੇ ਉਮੀਦਵਾਰਾਂ ਨੂੰ ਦਾਖਲਾ ਦੇਣ ਤੋਂ ਇਨਕਾਰ ਨਾ ਕਰਨ ਤੇ ਉਨ੍ਹਾਂ ਨੂੰ ਪ੍ਰੋਵਿਜ਼ਨਲ ਪ੍ਰਮਾਣ ਪੱਤਰ ਜਮ੍ਹਾਂ ਕਰਨ ਲਈ ਵੱਧ ਤੋਂ ਵੱਧ 7 ਦਿਨਾਂ ਦਾ ਸਮਾਂ ਦਿੰਦੇ ਹੋਏ ਉਨ੍ਹਾਂ ਨੂੰ ਆਰਜ਼ੀ ਦਾਖਲਾ ਦੇਣ। ਅਜਿਹੀ ਸਥਿਤੀ ਵਿੱਚ ਉਮੀਦਵਾਰਾਂ ਨੂੰ ਨੋਟ ਕਰਨਾ ਚਾਹੀਦਾ ਹੈ ਕਿ ਮਾਈਗ੍ਰੇਸ਼ਨ ਸਰਟੀਫਿਕੇਟ ਤੋਂ ਬਿਨਾਂ ਵੀ ਉਹ ਨੀਟ ਯੂਜੀ ਕਾਊਂਸਲਿੰਗ 2021 ਤਹਿਤ ਅਲਾਟ ਕੀਤੇ ਗਏ ਕਾਲਜ ‘ਚ ਰਿਪੋਰਟ ਕਰ ਸਕਦੇ ਹਨ ਅਤੇ ਆਰਜ਼ੀ ਦਾਖਲਾ ਲੈ ਸਕਦੇ ਹਨ
ਦੂਜੇ ਪਾਸੇ NEET UG Counseling 2021 ਲਈ MCC ਵੱਲੋਂ ਜਾਰੀ ਕੀਤੀ ਗਈ ਅਨੁਸੂਚੀ ਅਨੁਸਾਰ, ਕੌਂਸਲਿੰਗ ਦੇ ਦੋ ਦੌਰ ਦੀ ਪ੍ਰਕਿਰਿਆ 27 ਫਰਵਰੀ ਨੂੰ ਖਤਮ ਹੋਣ ਤੋਂ ਬਾਅਦ ਮੋਪ-ਅਪ ਰਾਊਂਡ ਕਰਵਾਇਆ ਜਾਣਾ ਹੈ। ਇਸ ਰਾਊਂਡ ਲਈ ਕਾਲਜਾਂ ਨੂੰ 8 ਤੇ 9 ਮਾਰਚ ਤਕ ਸੀਟ ਮੈਟਰਿਕਸ ਦੀ ਤਸਦੀਕ ਕਰਨੀ ਪਵੇਗੀ। ਇਸ ਦੇ ਨਾਲ ਹੀ ਉਮੀਦਵਾਰ 10 ਤੋਂ 14 ਮਾਰਚ 2022 ਤਕ ਇਸ ਰਾਊਂਡ ਲਈ ਆਨਲਾਈਨ ਰਜਿਸਟਰ ਕਰ ਸਕਣਗੇ। ਉਮੀਦਵਾਰਾਂ ਨੂੰ ਇਨ੍ਹਾਂ ਮਿਤੀਆਂ ਤਕ ਹੀ ਆਪਣੀ ਸੀਟ ਦੀ ਚੋਣ ਭਰਨ ਤੇ ਚੋਣ ਲੌਕਿੰਗ ਵੀ ਕਰਨੀ ਪਵੇਗੀ। ਇਸ ਦੌਰ ਦੇ NEET UG Counseling 2021 ਦੇ ਨਤੀਜੇ 19 ਮਾਰਚ ਨੂੰ ਐਲਾਨੇ ਜਾਣੇ ਹਨ ਅਤੇ ਉਮੀਦਵਾਰ ਬਿਨਾਂ ਮਾਈਗ੍ਰੇਸ਼ਨ ਸਰਟੀਫਿਕੇਟ ਦੇ ਵੀ 20 ਤੋਂ 27 ਮਾਰਚ 2022 ਤਕ ਅਲਾਟ ਕੀਤੇ ਗਏ ਕਾਲਜ ਵਿੱਚ ਰਿਪੋਰਟ ਕਰਨ ਦੇ ਯੋਗ ਹੋਣਗੇ।
