ਸ੍ਰੀ ਮੁਕਤਸਰ ਸਾਹਿਬ, 21 ਮਈ 2026 : ਪੰਜਾਬ ਦੇ ਸ੍ਰੀ ਮੁਕਤਸਰ ਸਾਹਿਬ (Sri Muktsar Sahib) ਵਿਖੇ ਘਰੇਲੂ ਝਗੜੇ ਦੇ ਚਲਦਿਆਂ ਨਹਿਰ ਵਿਚ ਛਾਲ (Jump canal) ਮਾਰਨ ਵਾਲੇ ਪੁੱਤਰ ਨੂੰ ਬਚਾਉਣ ਗਿਆ ਪਿਤਾ ਵੀ ਡੁੱਬ ਗਿਆ ।
ਕੀ ਹੈ ਪੂਰਾ ਮਾਮਲਾ
ਮਿਲੀ ਜਾਣਕਾਰੀ ਅਨੁਸਾਰ ਸ੍ਰੀ ਮੁਕਤਸਰ ਸਾਹਿਬ ‘ਚ ਬੁੱਧਵਾਰ ਸਵੇਰੇ ਇਕ ਦਰਦਨਾਕ ਹਾਦਸਾ ਵਾਪਰ ਗਿਆ । ਜਾਣਕਾਰੀ ਅਨੁਸਾਰ ਥਾਣਾ ਸਿਟੀ ਦੇ ਸਾਹਮਣੇ ਸਬਜ਼ੀ ਮੰਡੀ ‘ਚ ਰੇਹੜੀ ਲਾਉਣ ਵਾਲੇ ਪਿਓ-ਪੁੱਤ ਵਿਚਕਾਰ ਹੋਏ ਝਗੜੇ ਤੋਂ ਬਾਅਦ ਪੁੱਤ ਨੇ ਗੁੱਸੇ ‘ਚ ਸਰਹਿੰਦ ਫੀਡਰ ਨਹਿਰ `ਚ ਛਾਲ ਮਾਰ ਦਿੱਤੀ ।
ਪੁੱਤ ਨੂੰ ਡੁੱਬਦਾ ਦੇਖ ਪਿਓ ਨੇ ਵੀ ਉਸ ਨੂੰ ਬਚਾਉਣ ਲਈ ਨਹਿਰ ‘ਚ ਛਾਲ ਮਾਰ ਦਿੱਤੀ । ਇਸ ਤੋਂ ਬਾਅਦ ਤੇਜ਼ ਵਹਾਅ ‘ਚ ਦੋਵੇਂ ਲਾਪਤਾ ਹੋ ਗਏ । ਘਟਨਾ ਸਵੇਰੇ ਕਰੀਬ 10 ਵਜੇ ਦੀ ਹੈ । ਲਾਪਤਾ ਪਿਓ-ਪੁੱਤ ਦੀ ਪਛਾਣ ਦਸਮੇਸ਼ ਨਗਰ ਦੇ ਰਹਿਣ ਵਾਲੇ ਬੱਗਾ ਸਿੰਘ (25) ਅਤੇ ਉਸ ਦੇ ਪਿਤਾ ਮੱਖਣ ਸਿੰਘ ਵਜੋਂ ਹੋਈ ਹੈ । ਦੋਵੇਂ ਸਬਜ਼ੀ ਮੰਡੀ ‘ਚ ਫਲ-ਸਬਜ਼ੀ ਦੀ ਰੇਹੜੀ ਲਾਉਂਦੇ ਸਨ ।
ਪਿਤਾ ਦੀ ਝਿੜਕ ਤੋਂ ਗੁੱਸੇ ਵਿਚ ਆ ਪੁੱਤਰ ਨੇ ਮਾਰ ਦਿੱਤੀ ਨਹਿਰ ਵਿਚ ਛਾਲ
ਪਰਿਵਾਰ ਦੇ ਜਾਣਕਾਰ ਜਗਸੀਰ ਸਿੰਘ ਨੇ ਦੱਸਿਆ ਕਿ ਇਕ ਦਿਨ ਪਹਿਲਾਂ ਦੋਵਾਂ ਨੇ ਜਿ਼ਆਦਾ ਫਲ-ਸਬਜ਼ੀ ਖਰੀਦ ਲਏ ਸੀ, ਜੋ ਖਰਾਬ ਨਿਕਲ ਗਏ । ਬੁੱਧਵਾਰ ਸਵੇਰੇ ਇਸੇ ਗੱਲ ਨੂੰ ਲੈ ਕੇ ਮੱਖਣ ਸਿੰਘ ਨੇ ਆਪਣੇ ਪੁੱਤ ਬੱਗਾ ਸਿੰਘ ਨੂੰ ਝਿੜਕ ਦਿੱਤਾ । ਝਿੜਕ ਤੋਂ ਨਾਰਾਜ਼ ਹੋ ਕੇ ਬੱਗਾ ਸਿੰਘ ਗੁੱਸੇ `ਚ ਘਰੋਂ ਨਿਕਲਿਆ ਅਤੇ ਸਰਹਿੰਦ ਫੀਡਰ ਨਹਿਰ (Sirhind Feeder Canal) ‘ਚ ਛਾਲ ਮਾਰ ਦਿੱਤੀ ।
ਪੁੱਤ ਨੂੰ ਡੁੱਬਦਾ ਦੇਖ ਮੱਖਣ ਸਿੰਘ ਨੇ ਵੀ ਬਿਨਾਂ ਕੁਝ ਸੋਚੇ ਨਹਿਰ ਵਿਚ ਛਾਲ ਮਾਰ ਦਿੱਤੀ । ਦੇਖਦੇ ਹੀ ਦੇਖਦੇ ਦੋਵੇਂ ਪਾਣੀ ਦੇ ਤੇਜ਼ ਵਹਾਅ ‘ਚ ਰੁੜ੍ਹ ਗਏ । ਸੂਚਨਾ ਮਿਲਦੇ ਸਾਰ ਹੀ ਥਾਣਾ ਬਰੀਵਾਲਾ ਦੀ ਪੁਲਸ ਮੌਕੇ ‘ਤੇ ਪਹੁੰਚੀ । ਬੱਗਾ ਸਿੰਘ ਸ਼ਾਦੀਸ਼ੁਦਾ ਸੀ ਅਤੇ ਉਸ ਦਾ ਇਕ ਛੋਟਾ ਬੱਚਾ ਵੀ ਹੈ । ਪੁਲਸ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੁਲਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ।
