ਨਵੀਂ ਦਿੱਲੀ, 3 ਮਾਰਚ 2026 : ਦਿੱਲੀ ਵਿਖੇ ਲੰਘੇ ਦਿਨਾਂ ਗੈਂਗਸਟਰ ਲਾਰੈਂਸ ਬਿਸ਼ਨੋਈ (Gangster Lawrence Bishnoi) ਦੇ ਵਕੀਲ ਤੇ ਹਮਲਾ ਕਰਨ ਦੇ ਮਾਮਲੇ ਵਿਚ ਮੁੱਖ ਮੁਲਜਮ ਨੂੰ ਪੁਲਸ ਨੇ ਗ੍ਰਿਫ਼ਤਾਰ (Arrested) ਕਰ ਲਿਆ ਹੈ ।

ਕੌਣ ਹੈ ਇਹ ਮੁੱਖ ਮੁਲਜਮ

ਮਿਲੀ ਜਾਣਕਾਰੀ ਅਨੁਸਾਰ ਲਾਰੈਂਸ ਬਿਸ਼ਨੋਈ ਗੈਂਗ ਦੇ ਜਿਸ ਵਕੀਲ ਦੀਪਕ ਖੱਤਰੀ (Lawyer Deepak Khatri) ਦੀ ਕਾਰ ਤੇ ਕਥਿਤ ਤੌਰ ਤੇ ਗੋਲੀਆਂ ਚਲਾਉਣ ਦੇ ਦੋਸ਼ ਹੇਠ ਜਿਸ ਮੁੱਖ ਮੁਲਜਮ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ ਦਾ ਨਾਮ ਰੋਹਿਤ ਸੋਲੰਕੀ (Rohit Solanki) ਹੈ । ਜਾਣਕਾਰੀ ਮੁਤਾਬਕ ਰੋਹਿਤ ਸੋਲੰਕੀ ਨੂੰ ਦੀਪਕ ਖੱਤਰੀ ਦੀ ਸਮੁੱਚੀ ਮੂਵਮੈਂਟ ਸਬੰਧੀ ਜਾਣਕਾਰੀ ਸੋਸ਼ਲ ਮੀਡੀਆ ਤੋਂ ਪ੍ਰਾਪਤ ਹੋਈ ਸੀ । ਦੱਸਣਯੋਗ ਹੈ ਕਿ ਪਕੜਿਆ ਗਿਆ ਵਿਅਕਤੀ ਵਿਦੇਸ਼ ਵਿਚ ਬੈਠੇ ਗੈਂਗਸਟਰ ਰੋਹਿਤ ਗੋਦਾਰਾ ਦਾ ਸਹਿਯੋਗੀ ਹੈ ।

ਕੀ ਦੱਸਿਆ ਜੁਆਇੰਟ ਪੁਲਸ ਕਮਿਸ਼ਨਰ ਨੇ

ਸੰਯੁਕਤ ਪੁਲਸ ਕਮਿਸ਼ਨਰ (Joint Commissioner of Police) (ਮੱਧ) ਮਧੁਰ ਵਰਮਾ ਨੇ ਦਸਿਆ ਕਿ ਸੋਲੰਕੀ ਨੂੰ ਖੱਤਰੀ ਦੀਆਂ ਗਤੀਵਿਧੀਆਂ ਦੀ ਜਾਣਕਾਰੀ ਉਨ੍ਹਾਂ ਦੇ ਸੋਸ਼ਲ ਮੀਡੀਆ ਪ੍ਰੋਫ਼ਾਈਲ ਰਾਹੀਂ ਪਤਾ ਲੱਗੀ । ਉਨ੍ਹਾਂ ਅਨੁਸਾਰ ਮੁਲਜ਼ਮ ਰੋਹਿਤ ਸੋਲੰਕੀ ਨੂੰ ਰੀਲ੍ਹਾਂ ਰਾਹੀਂ ਪਤਾ ਲਗਿਆ ਕਿ ਖੱਤਰੀ ਹਰ ਮੰਗਲਵਾਰ ਨੂੰ ਮਰਘਟ ਵਾਲੇ ਹਨੂਮਾਨ ਮੰਦਰ ਜਾਂਦੇ ਹਨ ਅਤੇ ਮੰਦਰ ਬੰਦ ਹੋਣ ’ਤੇ ਹੀ ਉਥੋਂ ਨਿਕਲਦੇ ਹਨ ।

ਉਨ੍ਹਾਂ ਦੱਸਿਆ ਕਿ ਪ੍ਰਕਿਰਿਆਤਮਕ ਮੁੱਦਿਆਂ ਕਾਰਨ ਥਾਈਲੈਂਡ ਤੋਂ ਸਪੁਰਦਗੀ ਕੀਤੇ ਜਾਣ ਤੋਂ ਬਾਅਦ ਸੋਲੰਕੀ ਨੂੰ ਦੋ ਮਾਰਚ ਨੂੰ ਦਿੱਲੀ ਹਵਾਈ ਅੱਡੇ ਉਤੇ ਗ੍ਰਿਫ਼ਤਾਰ ਕਰ ਲਿਆ ਗਿਆ । ਇਹ ਗ੍ਰਿਫ਼ਤਾਰੀ ਉੱਤਰੀ ਦਿੱਲੀ ਦੇ ਕਸ਼ਮੀਰੀ ਗੇਟ ਇਲਾਕੇ ’ਚ ਅੰਤਰਰਾਜੀ ਬੱਸ ਟਰਮੀਨਲ (ਆਈ. ਐਸ. ਬੀ. ਟੀ.) ਕੋਲ ਖੱਤਰੀ ਅਤੇ ਉਸ ਦੇ ਸਾਥੀਆਂ ਉਤੇ ਹੋਈ ਗੋਲੀਬਾਰੀ ਦੀ ਘਟਨਾ ਤੋਂ ਇਕ ਹਫ਼ਤੇ ਬਾਅਦ ਹੋਈ ਹੈ ।

ਪੁਲਸ ਨੇ ਸੋਲੰਕੀ ਦੇ ਗੋਲਬਾਰੀ ਘਟਨਾ ਵਿਚ ਸ਼ਾਮਲ ਹੋਣ ਬਾਰੇ ਕੀ ਦੱਸਿਆ

ਪੁਲਸ ਅਨੁਸਾਰ ਸੋਲੰਕੀ 25 ਫ਼ਰਵਰੀ ਦੀ ਦੇਰ ਰਾਤ ਮਰਘਟ ਵਾਲੇ ਹਨੂਮਾਨ ਮੰਦਰ ਕੋਲ ਹੋਏ ਹਮਲੇ ਦੀ ਸਾਜਿਸ਼ ਰਚਣ ਅਤੇ ਉਸ ਨੂੰ ਅੰਜਾਮ ਦੇਣ ’ਚ ਸ਼ਾਮਲ ਸੀ । ਜੁਆਇੰਟ ਕਮਿਸ਼ਨਰ ਵਰਮਾ ਨੇ ਦਸਿਆ ਕਿ ਉਹ ਸਿਗਨਲ ਐਪ ਜ਼ਰੀਏ ਗੋਦਾਰਾ ਦੇ ਸਿੱਧੇ ਸੰਪਰਕ ’ਚ ਸੀ। ਗੱਡੀ ’ਚ ਪੰਜ ਲੋਕ ਸਫ਼ਰ ਕਰ ਰਹੇ ਸਨ ਜਦੋਂ ਅਣਪਛਾਤੇ ਹਮਲਾਵਰਾਂ ਨੇ ਗੋਲੀਬਾਰੀ ਸ਼ੁਰੂ ਕਰ ਦਿਤੀ ।

ਉਨ੍ਹਾਂ ਕਿਹਾ ਕਿ ਚਸ਼ਮਦੀਦਾਂ ਅਨੁਸਾਰ ਤਿੰਨ ਹਮਲਾਵਰ ਸਨ ਅਤੇ ਬਾਕੀ ਦੋ ਦੀ ਭਾਲ ਜਾਰੀ ਹੈ । ਪੁਲਸ ਹਥਿਆਰ, ਸਿਮ ਕਾਰਡ ਅਤੇ ਗੱਡੀ ਦੀ ਸਪਲਾਈ ਕਰਨ ਵਾਲੇ ਦਾ ਵੀ ਪਤਾ ਲਗਾ ਰਹੀ ਹੈ । ਗੱਡੀ ’ਚ ਸਵਾਰ ਲੋਕਾਂ ’ਚੋਂ ਸੰਦੀਪ ਨਾਂ ਦੇ ਸ਼ਖ਼ਸ ਨੂੰ ਪਿੱਠ ’ਚ ਦੋ ਗੋਲੀਆਂ ਲਗੀਆਂ ਹਨ ਅਤੇ ਉਨ੍ਹਾਂ ਨੂੰ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ ਹੈ। ਬਾਅਦ ’ਚ ਉਨ੍ਹਾਂ ਦੀ ਹਾਲਤ ਸਥਿਤ ਦੱਸੀ ਗਈ ਅਤੇ ਉਹ ਖ਼ਤਰੇ ਤੋਂ ਬਾਹਰ ਹਨ ।

Read More : ਅਣਪਛਾਤੇ ਹਮਲਾਵਰਾਂ ਨੇ ਕਾਰ ਤੇ ਫਾਇਰਿੰਗ ਕਰਕੇ ਕੀਤਾ ਇਕ ਵਿਅਕਤੀ ਜ਼ਖ਼ਮੀ