ਛੱਤੀਸਗੜ੍ਹ ‘ਚ ਪਾਣੀ ਨਾਲ ਭਰੇ ਟੋਏ ‘ਚ ਜਾ ਡਿੱਗੀ ਸਕਾਰਪੀਓ, 8 ਦੀ ਮੌਤ
ਬਲਰਾਮਪੁਰ ਜ਼ਿਲ੍ਹੇ ਦੇ ਰਾਜਪੁਰ ਦੇ ਲਾਡੂਵਾ ਪਿੰਡ ਨੇੜੇ ਸ਼ਨੀਵਾਰ ਰਾਤ 8.30 ਵਜੇ ਇੱਕ ਤੇਜ਼ ਰਫ਼ਤਾਰ ਸਕਾਰਪੀਓ ਪਲਟ ਗਈ ਅਤੇ ਪਾਣੀ ਨਾਲ ਭਰੇ ਟੋਏ ਵਿੱਚ ਜਾ ਵੜੀ। ਇਸ ਹਾਦਸੇ ‘ਚ 8 ਲੋਕਾਂ ਦੀ ਮੌਤ ਹੋ ਗਈ। ਹਾਦਸੇ ਵਿੱਚ ਗੰਭੀਰ ਜ਼ਖ਼ਮੀ ਹੋਏ ਡਰਾਈਵਰ ਦੀ ਇਲਾਜ ਦੌਰਾਨ ਮੌਤ ਹੋ ਗਈ। ਦੇਰ ਰਾਤ ਇੱਕ ਹੋਰ ਨੌਜਵਾਨ ਦੀ ਲਾਸ਼ ਟੋਏ ਵਿੱਚੋਂ ਬਾਹਰ ਕੱਢੀ ਗਈ। ਮਰਨ ਵਾਲਿਆਂ ਵਿੱਚ ਇੱਕ ਹੀ ਪਰਿਵਾਰ ਦੇ ਚਾਰ ਮੈਂਬਰ ਸਨ।
ਜਿਸ ਟੋਏ ਵਿੱਚ ਸਕਾਰਪੀਓ ਗੱਡੀ ਵੜ ਗਈ ਸੀ, ਉਹ ਝਾੜੀਆਂ ਨਾਲ ਘਿਰਿਆ ਹੋਇਆ ਸੀ ਅਤੇ ਕਰੀਬ 10 ਫੁੱਟ ਪਾਣੀ ਨਾਲ ਭਰਿਆ ਹੋਇਆ ਸੀ। ਹਾਦਸੇ ਤੋਂ ਬਾਅਦ ਗੱਡੀ ਦੇ ਸਾਰੇ ਗੇਟਾਂ ਨੂੰ ਤਾਲੇ ਲੱਗ ਗਏ, ਸ਼ੀਸ਼ੇ ਵੀ ਬੰਦ ਸਨ, ਜਿਸ ਕਾਰਨ ਕੋਈ ਵੀ ਬਾਹਰ ਨਹੀਂ ਨਿਕਲ ਸਕਿਆ। ਸਿਰਫ਼ ਡਰਾਈਵਰ ਦੇ ਗੇਟ ਦਾ ਸ਼ੀਸ਼ਾ ਖੁੱਲ੍ਹਾ ਸੀ, ਜਿਸ ਨੂੰ ਲੋਕਾਂ ਨੇ ਖਿੜਕੀ ਰਾਹੀਂ ਬਾਹਰ ਕੱਢਿਆ। ਫਿਰ ਪੁਲਿਸ ਨੂੰ ਹਾਦਸੇ ਦੀ ਸੂਚਨਾ ਦਿੱਤੀ ਗਈ। ਹਰ ਕੋਈ ਦੀਵਾਲੀ ਮਨਾ ਕੇ ਕੁਸਮੀ ਤੋਂ ਸੂਰਜਪੁਰ ਪਰਤ ਰਿਹਾ ਸੀ।
ਜੇਸੀਬੀ ਦੀ ਮਦਦ ਨਾਲ ਕੱਢੀ ਸਕਾਰਪੀਓ
ਰਾਜਪੁਰ ਪੁਲੀਸ ਟੀਮ ਨੇ ਜੇਸੀਬੀ ਦੀ ਮਦਦ ਨਾਲ ਡਾਬਰੀ ਵਿੱਚ ਡੁੱਬੀ ਸਕਾਰਪੀਓ ਨੂੰ ਬਾਹਰ ਕੱਢਿਆ। ਜਦੋਂ ਤੱਕ ਗੱਡੀ ਨੂੰ ਬਾਹਰ ਕੱਢਿਆ ਗਿਆ, ਉਦੋਂ ਤੱਕ ਸਾਰਿਆਂ ਦੇ ਸਾਹ ਰੁਕ ਚੁੱਕੇ ਸਨ। ਸਥਾਨਕ ਲੋਕਾਂ ਦੀ ਮਦਦ ਨਾਲ ਸਾਰਿਆਂ ਨੂੰ ਰਾਜਪੁਰ ਸੀ.ਐੱਚ.ਸੀ. ਲਿਆਂਦਾ ਗਿਆ, ਜਿੱਥੇ ਡਾਕਟਰਾਂ ਨੇ ਜਾਂਚ ਤੋਂ ਬਾਅਦ 6 ਲੋਕਾਂ ਨੂੰ ਮ੍ਰਿਤਕ ਐਲਾਨ ਦਿੱਤਾ।
