ਆਸਟ੍ਰੇਲੀਆ ਵਿੱਚ ਵਾਪਰੇ ਭਿਆਨਕ ਸੜਕ ਹਾਦਸੇ ‘ਚ ਪੰਜਾਬੀ ਨੌਜਵਾਨ ਦੀ ਮੌਤ: ਸਮਾਨ ਨਾਲ ਭਰਿਆ ਟਰੱਕ ਪਲਟ ਕੇ ਦੂਜੇ ਟਰੱਕ ਨਾਲ ਟਕਰਾਇਆ
ਕਪੂਰਥਲਾ, 15 ਫਰਵਰੀ 2025 – ਕਪੂਰਥਲਾ ਦੇ ਇੱਕ ਸੇਵਾਮੁਕਤ ਏਐਸਆਈ ਦੇ ਪੁੱਤਰ 29 ਸਾਲਾ ਸਤਬੀਰ ਸਿੰਘ ਥਿੰਦ ਦੀ ਆਸਟ੍ਰੇਲੀਆ ਦੇ ਸਿਡਨੀ ਵਿੱਚ ਵਾਪਰੇ ਇਕ ਭਿਆਨਕ ਸੜਕ ਹਾਦਸੇ ‘ਚ ਮੌਤ ਹੋ ਗਈ। ਇਹ ਹਾਦਸਾ 12-13 ਫਰਵਰੀ ਦੀ ਰਾਤ ਨੂੰ ਵਾਪਰਿਆ, ਜਦੋਂ ਸਿਡਨੀ ਹਾਈਵੇਅ ‘ਤੇ ਇਮਾਰਤੀ ਸਮੱਗਰੀ ਲੈ ਕੇ ਜਾ ਰਿਹਾ ਇੱਕ ਟਰੱਕ ਅਚਾਨਕ ਪਲਟ ਗਿਆ ਅਤੇ ਉਲਟ ਦਿਸ਼ਾ ਤੋਂ ਆ ਰਹੇ ਇੱਕ ਹੋਰ ਟਰੱਕ ਨਾਲ ਟਕਰਾ ਗਿਆ।
ਇਹ ਵੀ ਪੜ੍ਹੋ: ਕੈਨੇਡਾ ਦੀ ਸਭ ਤੋਂ ਵੱਡੀ ਚੋਰੀ ਦਾ ਮਾਸਟਰਮਾਈਂਡ ਚੰਡੀਗੜ੍ਹ ਦਾ: ਪੀਲ ਪੁਲਿਸ ਕਰ ਰਹੀ ਆਤਮ ਸਮਰਪਣ ਦੀ ਉਡੀਕ
ਇਸ ਹਾਦਸੇ ਵਿੱਚ ਮ੍ਰਿਤਕ ਸਤਬੀਰ ਸਿੰਘ ਥਿੰਦ, ਜੋ ਕਿ ਪਿੰਡ ਠੱਠਾ ਨਵਾਂ ਦੇ ਸੇਵਾਮੁਕਤ ਏਐਸਆਈ ਤਰਸੇਮ ਸਿੰਘ ਦਾ ਪੁੱਤਰ ਸੀ, ਹਾਦਸੇ ਤੋਂ ਬਾਅਦ ਟਰੱਕ ‘ਚ ਭਰੇ ਮਲਬੇ ਹੇਠ ਆ ਗਿਆ, ਸਿਡਨੀ ਪੁਲਿਸ ਨੇ ਤੁਰੰਤ ਬਚਾਅ ਕਾਰਜ ਸ਼ੁਰੂ ਕੀਤਾ, ਪਰ ਜਦੋਂ ਤੱਕ ਉਸਨੂੰ ਮਲਬੇ ਤੋਂ ਕੱਢਿਆ ਗਿਆ, ਉਸਦੀ ਮੌਤ ਹੋ ਚੁੱਕੀ ਸੀ।
ਹਾਦਸੇ ਵਿੱਚ ਦੂਜੇ ਟਰੱਕ ਦਾ ਡਰਾਈਵਰ ਵੀ ਗੰਭੀਰ ਜ਼ਖਮੀ ਹੋ ਗਿਆ। ਪੁਲਿਸ ਨੂੰ ਉਸਨੂੰ ਮਲਬੇ ਤੋਂ ਬਚਾਉਣ ਲਈ ਲਗਭਗ 7 ਘੰਟੇ ਲੱਗੇ। ਉਸਨੂੰ ਗੰਭੀਰ ਹਾਲਤ ਵਿੱਚ ਕੈਨਬਰਾ ਹਸਪਤਾਲ ਵਿੱਚ ਦਾਖਲ ਕਰਵਾਇਆ ਗਿਆ ਹੈ। ਮ੍ਰਿਤਕ ਦੇ ਪਰਿਵਾਰਕ ਮੈਂਬਰ ਪਰਮਿੰਦਰ ਸਿੰਘ ਦੇ ਅਨੁਸਾਰ, ਇੱਕ ਟਰੱਕ ਮੈਲਬੌਰਨ ਤੋਂ ਸੀ ਅਤੇ ਦੂਜਾ ਸਿਡਨੀ ਤੋਂ ਸੀ। ਹਾਦਸੇ ਵਿੱਚ ਦੋਵੇਂ ਵਾਹਨ ਬੁਰੀ ਤਰ੍ਹਾਂ ਨੁਕਸਾਨੇ ਗਏ। ਪਰਿਵਾਰ ਹੁਣ ਪੋਸਟਮਾਰਟਮ ਤੋਂ ਬਾਅਦ ਸਤਬੀਰ ਦੀ ਲਾਸ਼ ਨੂੰ ਭਾਰਤ ਲਿਆਉਣ ਦੀ ਤਿਆਰੀ ਕਰ ਰਿਹਾ ਹੈ।
