ਜਗਰਾਉਂ: ਹੋਲਸੇਲ ਕਾਸਮੈਟਿਕ ਦੇ ਸ਼ੋਅਰੂਮ ਵਿੱਚ ਲੱਗੀ ਅੱਗ
ਜਗਰਾਉਂ ਸ਼ਹਿਰ ਵਿੱਚ ਦੇਰ ਰਾਤ ਉਸ ਸਮੇਂ ਹਫੜਾ-ਦਫੜੀ ਮੱਚ ਗਈ ਜਦੋਂ ਇਸ਼ਤਰ ਹਲਵਾਈ ਚੌਕ ਤੋਂ ਗੁਰਦੁਆਰਾ ਸ੍ਰੀ ਗੁਰੂ ਰਾਮਦਾਸ ਜੀ ਨੂੰ ਜਾਣ ਵਾਲੀ ਸੜਕ ਦੇ ਵਿਚਕਾਰ ਪਏ ਇੱਕ ਹੋਲਸੇਲ ਕਾਸਮੈਟਿਕ ਦੇ ਸ਼ੋਅਰੂਮ ਵਿੱਚ ਅੱਗ ਲੱਗ ਗਈ। ਅੱਗ ਲੱਗਣ ਦਾ ਕਾਰਨ ਦੀਵਾਲੀ ਮੌਕੇ ਪਟਾਕੇ ਚਲਾਉਣਾ ਦੱਸਿਆ ਜਾ ਰਿਹਾ ਹੈ। ਪਟਾਕਿਆਂ ਤੋਂ ਨਿਕਲੀ ਚੰਗਿਆੜੀ ਨੇ ਸ਼ੋਅਰੂਮ ਨੂੰ ਅੱਗ ਦੇ ਗੋਲੇ ਵਿੱਚ ਬਦਲ ਦਿੱਤਾ।
ਇਹ ਵੀ ਪੜ੍ਹੋ- ਅਮਰੀਕਾ ਨੇ ਭਾਰਤ ਸਮੇਤ ਇਹਨਾਂ ਦੇਸ਼ਾਂ ਦੀਆਂ ਕੰਪਨੀਆਂ ‘ਤੇ ਲਗਾਈ ਪਾਬੰਦੀ
ਖੁਰਾਣਾ ਐਂਟਰਪ੍ਰਾਈਜ਼ ਨਾਂ ਦੀ ਦੁਕਾਨ ਦੇ ਦੋ ਮਾਲਕ ਹਨ ਜਿਨ੍ਹਾਂ ਦੇ ਨਾਂ ਪ੍ਰਿੰਸ ਅਤੇ ਟਿੰਕੂ ਹਨ। ਦੋਵੇਂ ਦੀਵਾਲੀ ਹੋਣ ਕਾਰਨ ਦੁਕਾਨ ਤੋਂ ਘਰ ਚਲੇ ਗਏ ਸਨ। ਪਰ ਕੁਝ ਸਮੇਂ ਬਾਅਦ ਹੀ ਲੋਕਾਂ ਨੇ ਦੁਕਾਨ ਦੀ ਉਪਰਲੀ ਮੰਜ਼ਿਲ ‘ਤੇ ਰੱਖੇ ਸਾਮਾਨ ‘ਚੋਂ ਅੱਗ ਦੀਆਂ ਲਪਟਾਂ ਨਿਕਲਦੀਆਂ ਦੇਖ ਕੇ ਨੇੜੇ ਸਥਿਤ ਦੁਕਾਨ ਮਾਲਕ ਨੂੰ ਸੂਚਨਾ ਦਿੱਤੀ | ਫਾਇਰ ਬ੍ਰਿਗੇਡ ਵਿਭਾਗ ਨੂੰ ਸੂਚਿਤ ਕੀਤਾ ਗਿਆ ਪਰ ਤੰਗ ਗਲੀਆਂ ਕਾਰਨ ਫਾਇਰ ਬ੍ਰਿਗੇਡ ਦੀ ਗੱਡੀ ਦੁਕਾਨ ਤੱਕ ਨਹੀਂ ਪਹੁੰਚ ਸਕੀ।
ਮੁਸ਼ੱਕਤ ਤੋਂ ਬਾਅਦ ਅੱਗ ‘ਤੇ ਕਾਬੂ ਪਾਇਆ
ਫਾਇਰ ਬ੍ਰਿਗੇਡ ਦੇ ਕਰਮਚਾਰੀਆਂ ਨੂੰ ਦੁਕਾਨ ਤੱਕ ਪਾਣੀ ਪਹੁੰਚਾਉਣ ਲਈ ਕਾਫੀ ਮੁਸ਼ੱਕਤ ਕਰਨੀ ਪਈ। ਜਿਸ ਕਾਰਨ ਗੱਡੀ ਨੂੰ ਸ੍ਰੀ ਗੁਰੂਦੁਆਰਾ ਆਤਮਾ ਸਿੰਘ ਨੇੜੇ ਖੜ੍ਹਾ ਕਰਨਾ ਪਿਆ ਅਤੇ ਉਥੋਂ ਕਰੀਬ 700-800 ਮੀਟਰ ਦੂਰ ਪਾਣੀ ਦੀ ਪਾਈਪ ਵਿਛਾਈ ਗਈ। ਕਾਫੀ ਮੁਸ਼ੱਕਤ ਤੋਂ ਬਾਅਦ ਅੱਗ ‘ਤੇ ਕਾਬੂ ਪਾਇਆ ਜਾ ਸਕਿਆ। ਦੁਕਾਨ ਅੰਦਰ ਪਏ ਪਰਫਿਊਮ ਅਤੇ ਹੋਰ ਸਾਮਾਨ ਕਾਰਨ ਅੱਗ ਕਾਫੀ ਫੈਲ ਗਈ। ਜਿਸ ਕਾਰਨ ਆਸ-ਪਾਸ ਦੇ ਲੋਕਾਂ ਨੇ ਵੀ ਸ਼ੋਅਰੂਮ ਮਾਲਕ ਦੀ ਮਦਦ ਕਰਨੀ ਸ਼ੁਰੂ ਕਰ ਦਿੱਤੀ।
