ਵਾਸ਼ਿੰਗਟਨ, 22 ਅਕਤੂਬਰ 2026 : ਅਮਰੀਕਾ (America) ਵਿਖੇ ਇਕ ਭਾਰਤੀ ਵਿਅਕਤੀ ‘ਤੇ ਅਮਰੀਕੀ ਸਰਕਾਰ ਨੂੰ ਕਰੋੜਾਂ ਡਾਲਰ ਦਾ ਚੂਨਾ ਲਗਾਏ ਜਾਣ ਦੇ ਦੋਸ਼ ਲੱਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ ।
ਕੋਣ ਹੈ ਇਹ ਭਾਰਤੀ ਵਿਅਕਤੀ
ਮਿਲੀ ਜਾਣਕਾਰੀ ਮੁਤਾਬਕ ਅਮਰੀਕਾ ਵਿਖੇ ਜੋ ਇਕ ਭਾਰਤੀ ਵਿਅਕਤੀ (Indian person) ਵਲੋਂ ਅਮਰੀਕੀ ਸਰਕਾਰ ਨੂੰ 6. 6 ਕਰੋੜ ਅਮਰੀਕੀ ਡਾਲਰ (US Dollar) ਦਾ ਚੂਨਾ ਲਗਾਏ ਜਾਣ ਦਾ ਘਟਨਾਕ੍ਰਮ ਸਾਹਮਣੇ ਆਇਆ ਹੈ ਵਿਚ ਭਾਰਤੀ ਵਿਅਕਤੀ ਦੀ ਪਛਾਣ 52 ਸਾਲਾ ਰਾਜੇਸ਼ ਪਟੇਲ ਦੇ ਤੌਰ ‘ਤੇ ਹੋਈ ਹੈ ।
ਕਿਸ ਤਰ੍ਹਾਂ ਲਗਾਇਆ ਗਿਆ ਹੈ ਚੂੂਨਾ
ਪ੍ਰਾਪਤ ਸੂਚਨਾ ਮੁਤਾਬਕ ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਉਪਰੋਕਤ ਵਿਅਕਤੀ ਵਲੋਂ ਕੋਵਿਡ-19 ਦੌਰਾਨ 3.80 ਲੱਖ ਤੋਂ ਵੱਧ ਫਰਜ਼ੀ ਟੈਸਟ ਰਿਪੋਰਟਾਂ (Fake test reports) ਤਿਆਰ ਕਰ ਕੇ ਅਮਰੀਕੀ ਸਰਕਾਰ ਨਾਲ 6.6 ਕਰੋੜ ਅਮਰੀਕੀ ਡਾਲਰ (ਕਰੀਬ 550 ਕਰੋੜ ਰੁਪਏ) ਦੀ ਵੱਡੀ ਠੱਗੀ ਮਾਰਨ ਦੇ ਗੰਭੀਰ ਦੋਸ਼ ਆਇਦ ਕੀਤੇ ਗਏ ਹਨ । ਦੱਸਣਯੋਗ ਹੈ ਕਿ ਇਲੀਨੋਇਸ ਸਥਿਤ ਇਕ ਕਲੀਨਿਕਲ ਲੈਬਾਰਟਰੀ ਦੇ ਸਹਿ-ਮਾਲਕ ਰਾਜੇਸ਼ ਪਟੇਲ (52) ’ਤੇ ਧੋਖਾਧੜੀ ਦੀਆਂ 5 ਧਾਰਾਵਾਂ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ । ਪਟੇਲ ਨੇ ਅਪਣੀ ਲੈਬ ਰਾਹੀਂ ‘ਮੈਰੀਡੀਅਨ ਮੈਡੀਕਲ ਸਟਾਫ਼ਿੰਗ ਇੰਕ.’ ਦੇ ਨਾਮ ’ਤੇ 3,80,000 ਫ਼ਰਜ਼ੀ ‘ਨੈਗੇਟਿਵ’ ਕੋਵਿਡ ਟੈਸਟ ਰਿਪੋਰਟਾਂ ਤਿਆਰ ਕੀਤੀਆਂ ਸੀ ।
ਪਟੇਲ ਲੈਬ ਵਲੋਂ ਭੇਜੇ ਗਏ ਸਨ ਸਰਕਾਰ ਨੂੰ ਕਰੋੜਾਂ ਦੇ ਫਰਜ਼ੀ ਬਿੱਲ
ਇਨ੍ਹਾਂ ਫਰਜ਼ੀ ਟੈਸਟਾਂ ਦੇ ਬਿਲ ਅਮਰੀਕੀ ਸਰਕਾਰ ਦੇ ‘ਹੈਲਥ ਰਿਸੋਰਸਿਜ਼ ਐਂਡ ਸਰਵਿਸਿਜ਼ ਐਡਮਿਨਿਸਟਰੇਸ਼ਨ’ ਦੇ ਬੀਮਾ ਰਹਿਤ ਲੋਕਾਂ ਦੇ ਪ੍ਰੋਗਰਾਮ ਨੂੰ ਭੇਜੇ ਗਏ । ਇਹ ਸਰਕਾਰੀ ਪ੍ਰੋਗਰਾਮ ਬਿਨਾਂ ਸਿਹਤ ਬੀਮੇ ਵਾਲੇ ਲੋਕਾਂ ਦੇ ਟੈਸਟਾਂ ਦਾ ਖ਼ਰਚਾ ਚੁੱਕਦਾ ਸੀ । ਮੁਕੱਦਮੇ ਅਨੁਸਾਰ ਪਟੇਲ ਦੀ ਲੈਬ ਨੇ 6.62 ਕਰੋੜ ਡਾਲਰ ਦੇ ਫਰਜ਼ੀ ਬਿਲ (Fake bill) ਸਰਕਾਰ ਨੂੰ ਭੇਜੇ, ਜਿਨ੍ਹਾਂ ’ਚੋਂ ਸਰਕਾਰ ਵਲੋਂ 4.41 ਕਰੋੜ ਡਾਲਰ (ਕਰੀਬ 370 ਕਰੋੜ ਰੁਪਏ) ਦਾ ਭੁਗਤਾਨ ਕਰ ਦਿਤਾ ਗਿਆ । ਇਸ ਪੂਰੇ ਘਪਲੇ ’ਚੋਂ ਰਾਜੇਸ਼ ਪਟੇਲ ਨੂੰ ਨਿਜੀ ਤੌਰ ’ਤੇ 2.8 ਕਰੋੜ ਡਾਲਰ (ਕਰੀਬ 235 ਕਰੋੜ ਰੁਪਏ) ਹਾਸਲ ਹੋਏ। ਜੇਕਰ ਅਦਾਲਤ ’ਚ ਦੋਸ਼ ਸਾਬਤ ਹੋ ਜਾਂਦੇ ਹਨ, ਤਾਂ ਰਾਜੇਸ਼ ਪਟੇਲ ਨੂੰ ਹਰ ਆਰੋਪ ਵਿਚ ਵੱਧ ਤੋਂ ਵੱਧ 20 ਸਾਲ ਦੀ ਜੇਲ ਦੀ ਸਜ਼ਾ ਹੋ ਸਕਦੀ ਹੈ ।
