ਦਿੱਲੀ ਦੀ ਅਰਵਿੰਦ ਕੇਜਰੀਵਾਲ ਸਰਕਾਰ ਵਲੋਂ ਕੇਂਦਰੀ ਸਿਫਾਰਸ਼ ਕੀਤੀ ਵਾਧੇ ਦੀ ਹੱਦ ਨੂੰ ਮਨਜ਼ੂਰੀ ਦੇਣ ਤੋਂ ਬਾਅਦ ਦਿੱਲੀ ਦੇ ਵਿਧਾਇਕਾਂ ਨੂੰ ਹੁਣ ਪ੍ਰਤੀ ਮਹੀਨਾ 90,000 ਰੁਪਏ ਤਨਖਾਹ ਅਤੇ ਭੱਤੇ ਦੇ ਰੂਪ ਵਿੱਚ ਮਿਲਣਗੇ। ਸਰਕਾਰ ਨੇ ਇੱਕ ਬਿਆਨ ਵਿੱਚ ਦੱਸਿਆ ਕਿ ਇਸ ਤੋਂ ਪਹਿਲਾਂ, ਹਰ ਇੱਕ ਵਿਧਾਇਕ ਨੂੰ 53,000 ਰੁਪਏ ਮਿਲ ਰਹੇ ਸਨ, ਜਿਸ ਵਿੱਚ 12,000 ਰੁਪਏ ਤਨਖਾਹ ਅਤੇ ਬਾਕੀ ਰਾਸ਼ੀ ਭੱਤੇ ਦੇ ਰੂਪ ‘ਚ ਸ਼ਾਮਲ ਸਨ। ਇਸ ਵਾਧੇ ਨਾਲ ਹਰੇਕ ਵਿਧਾਇਕ ਨੂੰ 30,000 ਰੁਪਏ ਤਨਖਾਹ ਅਤੇ 60,000 ਰੁਪਏ ਭੱਤੇ ਵਜੋਂ ਮਿਲਣਗੇ।
ਬਿਆਨ ਵਿੱਚ ਦਾਅਵਾ ਕੀਤਾ ਗਿਆ ਕਿ ਵਾਧੇ ਦੇ ਬਾਵਜੂਦ, ਦਿੱਲੀ ਦੇ ਵਿਧਾਇਕ ਦੇਸ਼ ਵਿੱਚ ਸਭ ਤੋਂ ਘੱਟ ਤਨਖਾਹ ਪਾਉਣ ਵਾਲੇ ਵਿਧਾਇਕ ਰਹਿਣਗੇ। ਇਸ ਵਿੱਚ ਦੱਸਿਆ ਗਿਆ ਕਿ ਦਿੱਲੀ ਦੇ ਵਿਧਾਇਕਾਂ ਦੀ ਤਨਖਾਹ ਪਿਛਲੇ 10 ਸਾਲਾਂ ਵਿੱਚ ਨਹੀਂ ਵਧੀ ਸੀ ਅਤੇ ਕੇਜਰੀਵਾਲ ਸਰਕਾਰ ਨੇ ਕੇਂਦਰੀ ਗ੍ਰਹਿ ਮੰਤਰਾਲਾ ਤੋਂ ਉਨ੍ਹਾਂ ਦਾ ਤਨਖਾਹ ਅਤੇ ਭੱਤੇ ਹੋਰ ਰਾਜਾਂ ਦੇ ਵਿਧਾਇਕਾਂ ਦੇ ਬਰਾਬਰ ਵਧਾਉਣ ਦਾ ਅਨੁਰੋਧ ਕੀਤਾ ਸੀ।
