ਹਾਲ ਹੀ ਵਿੱਚ ਦੇਸ਼ ‘ਚ 15-18 ਸਾਲ ਦੇ ਬੱਚਿਆਂ ਦੇ ਟੀਕਾਕਰਨ ਲਈ ਕੋਵੈਕਸੀਨ ਦੀ ਵਰਤੋਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ। ਹੁਣ ਭਾਰਤ ਬਾਇਓਟੈਕ ਵੈਕਸੀਨ ਬਣਾਉਣ ਵਾਲੀ ਕੰਪਨੀ ਨੇ 2-18 ਸਾਲ ਦੀ ਉਮਰ ਦੇ ਬੱਚਿਆਂ ‘ਤੇ ਕੋਵੈਕਸੀਨ (BBV152) ਦੇ ਪੜਾਅ 2 ਅਤੇ ਪੜਾਅ 3 ਦੇ ਕਲੀਨਿਕਲ ਟਰਾਇਲ ਦੇ ਨਤੀਜੇ ਜਾਰੀ ਕੀਤੇ ਹਨ।
ਭਾਰਤ ਬਾਇਓਟੈੱਕ ਨੇ ਵੀਰਵਾਰ ਨੂੰ 2-18 ਸਾਲ ਦੀ ਉਮਰ ਦੇ ਬੱਚਿਆਂ ‘ਤੇ ਕੋਵੈਕਸੀਨ (BBV152) ਦੇ ਕਲੀਨਿਕਲ ਟਰਾਇਲਾਂ ਦਾ ਫੇਜ਼-2 ਅਤੇ ਫੇਜ਼-3 ਡਾਟਾ ਜਾਰੀ ਕੀਤਾ।
ਕਲੀਨਿਕਲ ਨਤੀਜੇ ਜਾਰੀ ਕਰਦੇ ਹੋਏ ਕੰਪਨੀ ਨੇ ਕਿਹਾ ਕਿ ਫੇਜ਼ 2/3 ਕਲੀਨਿਕਲ ਅਜ਼ਮਾਇਸ਼ ਵਿੱਚ ਇਸਦੀ ਵੈਕਸੀਨ (ਕੋਵੈਕਸੀਨ) 2-18 ਸਾਲ ਦੀ ਉਮਰ ਦੇ ਬੱਚਿਆਂ ਲਈ “ਸੁਰੱਖਿਅਤ, ਸਹਿਣਯੋਗ ਪਾਈ ਗਈ ਹੈ।
ਭਾਰਤ ਬਾਇਓਟੈੱਕ ਕੰਪਨੀ ਦਾ ਕਹਿਣਾ ਹੈ ਕਿ ਉਸਨੇ ਜੂਨ ਅਤੇ ਸਤੰਬਰ 2021 ਦੌਰਾਨ 2-18 ਸਾਲ ਦੀ ਉਮਰ ਦੇ ਬੱਚਿਆਂ ‘ਤੇ ਕੋਵੈਕਸੀਨ ਦੇ ਕਲੀਨਿਕਲ ਟਰਾਇਲ ਕੀਤੇ, ਜਿਸ ਵਿੱਚ ਇਹ ਟੀਕਾ ਬੱਚਿਆਂ ਲਈ ‘ਬਹੁਤ ਜ਼ਿਆਦਾ ਸੁਰੱਖਿਅਤ’ ਪਾਇਆ ਗਿਆ।
ਇਸ ਟਰਾਇਲ ਵਿੱਚ 374 ਬੱਚਿਆਂ ਵਿੱਚ ਬਹੁਤ ਹਲਕੇ ਜਾਂ ਘੱਟ ਗੰਭੀਰ ਲੱਛਣ ਦਿਖਾਈ ਦਿੱਤੇ, ਜਿਨ੍ਹਾਂ ਵਿੱਚੋਂ 78.6 ਪ੍ਰਤੀਸ਼ਤ ਇੱਕ ਦਿਨ ਵਿੱਚ ਠੀਕ ਹੋ ਗਏ। ਸਭ ਤੋਂ ਆਮ ਮਾੜੇ ਪ੍ਰਭਾਵਾਂ ਵਿੱਚੋਂ ਇੱਕ ਟੀਕੇ ਵਾਲੀ ਥਾਂ ‘ਤੇ ਦਰਦ ਸੀ।
ਇਸ ਅਧਿਐਨ ‘ਚ ਪਾਇਆ ਗਿਆ ਹੈ ਕਿ ਬੱਚਿਆਂ ਵਿੱਚ ਕੋਵੈਕਸੀਨ ਦੀ ਵਰਤੋਂ ਨਾਲ ਕੋਈ ਗੰਭੀਰ ਮਾੜੇ ਪ੍ਰਭਾਵ ਨਹੀਂ ਦੇਖੇ ਗਏ।
ਭਾਰਤ ਬਾਇਓਟੈੱਕ ਕੰਪਨੀ ਨੇ ਕਿਹਾ ਕਿ 2-18 ਸਾਲ ਦੀ ਉਮਰ ਦੇ ਬੱਚਿਆਂ ‘ਤੇ ਕੀਤੇ ਗਏ ਅਜ਼ਮਾਇਸ਼ਾਂ ਦੇ ਨਤੀਜੇ ਦੱਸਦੇ ਹਨ ਕਿ ਕੋਵੈਕਸੀਨ ਛੋਟੀ ਉਮਰ ਦੇ ਬੱਚਿਆਂ ‘ਤੇ ਵੀ ਵਰਤੋਂ ਲਈ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ।
ਭਾਰਤ ਬਾਇਓਟੈਕ ਦੁਆਰਾ ਜਾਰੀ ਇੱਕ ਬਿਆਨ ਵਿੱਚ ਕੰਪਨੀ ਦੇ ਚੇਅਰਮੈਨ ਅਤੇ ਮੈਨੇਜਿੰਗ ਡਾਇਰੈਕਟਰ ਕ੍ਰਿਸ਼ਨਾ ਏਲਾ ਨੇ ਕਿਹਾ, “ਬੱਚਿਆਂ ‘ਤੇ ਕੋਵੈਕਸੀਨ ਦੇ ਕਲੀਨਿਕਲ ਟ੍ਰਾਇਲ ਤੋਂ ਪ੍ਰਾਪਤ ਡੇਟਾ ਬਹੁਤ ਉਤਸ਼ਾਹਜਨਕ ਹੈ। ਬੱਚਿਆਂ ਲਈ ਵੈਕਸੀਨ ਦੀ ਸੁਰੱਖਿਆ ਮਹੱਤਵਪੂਰਨ ਹੈ ਅਤੇ ਸਾਨੂੰ ਇਹ ਦੱਸ ਕੇ ਖੁਸ਼ੀ ਹੋ ਰਹੀ ਹੈ ਕਿ ਕੋਵੈਕਸੀਨ ਨੇ ਹੁਣ ਬੱਚਿਆਂ ਵਿੱਚ ਸੁਰੱਖਿਆ ਅਤੇ ਇਮਿਊਨੋਜਨਿਕਤਾ ਲਈ ਡੇਟਾ ਸਾਬਤ ਕੀਤਾ ਹੈ।”
ਟਰਾਇਲ ਵਿੱਚ ਸ਼ਾਮਲ ਬੱਚਿਆਂ ਨੂੰ ਤਿੰਨ ਗਰੁੱਪਾਂ ਵਿੱਚ ਵੰਡਿਆ ਗਿਆ ਸੀ: ਗਰੁੱਪ-1 ਵਿੱਚ 12-18 ਸਾਲ (175 ਬੱਚੇ), ਗਰੁੱਪ-2 ਵਿੱਚ 6-12 ਸਾਲ (175 ਬੱਚੇ), ਅਤੇ ਗਰੁੱਪ-3 ਵਿੱਚ 2-6 ਸਾਲ (175 ਬੱਚੇ)।