ਅੱਜ ਦੇਸ਼ ਵਿੱਚ ਜੀਐਸਟੀ ਲਾਗੂ ਹੋਏ 8 ਸਾਲ ਬੀਤ ਗਏ ਹਨ। ਦੇਸ਼ ਵਿੱਚ ਜੀਐਸਟੀ 1 ਜੁਲਾਈ 2017 ਨੂੰ ਲਾਗੂ ਕੀਤਾ ਗਿਆ ਸੀ। ਇਸ ਸਮੇਂ ਦੌਰਾਨ, ਟੈਕਸ ਵਸੂਲੀ ਦੇ ਅੰਕੜਿਆਂ ਨੇ ਇੱਕ ਨਵਾਂ ਰਿਕਾਰਡ ਕਾਇਮ ਕੀਤਾ ਹੈ। ਵਿੱਤੀ ਸਾਲ 2024-25 ਵਿੱਚ, ਕੁੱਲ ਜੀਐਸਟੀ ਵਸੂਲੀ 22.08 ਲੱਖ ਕਰੋੜ ਰੁਪਏ ਤੱਕ ਪਹੁੰਚ ਗਈ ਹੈ, ਜੋ ਕਿ 5 ਸਾਲ ਪਹਿਲਾਂ 2020-21 ਵਿੱਚ ਸਿਰਫ 11.37 ਲੱਖ ਕਰੋੜ ਰੁਪਏ ਸੀ।
ਯਾਨੀ ਕਿ 5 ਸਾਲਾਂ ਵਿੱਚ ਟੈਕਸ ਸੰਗ੍ਰਹਿ ਲਗਭਗ ਦੁੱਗਣਾ ਹੋ ਗਿਆ ਹੈ। 2024-25 ਵਿੱਚ ਹਰ ਮਹੀਨੇ ਔਸਤਨ GST ਸੰਗ੍ਰਹਿ 1.84 ਲੱਖ ਕਰੋੜ ਰੁਪਏ ਸੀ। ਇਹ 5 ਸਾਲ ਪਹਿਲਾਂ 2020-21 ਵਿੱਚ 95 ਹਜ਼ਾਰ ਕਰੋੜ ਰੁਪਏ ਸੀ।
ਦੱਸ ਦਈਏ ਕਿ 2017 ਵਿੱਚ ਜੀਐਸਟੀ ਲਾਗੂ ਹੋਣ ਵੇਲੇ, ਰਜਿਸਟਰਡ ਟੈਕਸਦਾਤਾਵਾਂ ਦੀ ਗਿਣਤੀ 65 ਲੱਖ ਸੀ, ਜੋ ਹੁਣ ਵਧ ਕੇ 1.51 ਕਰੋੜ ਤੋਂ ਵੱਧ ਹੋ ਗਈ ਹੈ। ਇਸ ਨਾਲ ਸਰਕਾਰ ਦਾ ਟੈਕਸ ਅਧਾਰ ਵੀ ਮਜ਼ਬੂਤ ਹੋਇਆ ਹੈ।
ਇਸਤੋਂ ਇਲਾਵਾ ਸਰਕਾਰ ਦਾ ਕਹਿਣਾ ਹੈ ਕਿ ਜੀਐਸਟੀ ਲਾਗੂ ਹੋਣ ਤੋਂ ਬਾਅਦ, ਟੈਕਸ ਸੰਗ੍ਰਹਿ ਅਤੇ ਟੈਕਸ ਅਧਾਰ ਦੋਵਾਂ ਵਿੱਚ ਜ਼ਬਰਦਸਤ ਵਾਧਾ ਹੋਇਆ ਹੈ। ਇਸ ਨਾਲ ਦੇਸ਼ ਦੀ ਵਿੱਤੀ ਸਥਿਤੀ ਮਜ਼ਬੂਤ ਹੋਈ ਹੈ ਅਤੇ ਟੈਕਸ ਪ੍ਰਣਾਲੀ ਵਧੇਰੇ ਪਾਰਦਰਸ਼ੀ ਅਤੇ ਸਰਲ ਹੋ ਗਈ ਹੈ।
