UPPSC ਨੇ ਦੋ ਸ਼ਿਫਟਾਂ, ਦੋ ਪ੍ਰੀਖਿਆਵਾਂ ਦਾ ਫੈਸਲਾ ਲਿਆ ਵਾਪਸ, 20 ਹਜ਼ਾਰ ਵਿਦਿਆਰਥੀ 4 ਦਿਨਾਂ ਤੋਂ ਕਰ ਰਹੇ ਸਨ ਅੰਦੋਲਨ
ਉੱਤਰ ਪ੍ਰਦੇਸ਼ ਲੋਕ ਸੇਵਾ ਕਮਿਸ਼ਨ ਦਫਤਰ (UPPSC) ਨੇ ਦੋ ਸ਼ਿਫਟਾਂ, ਦੋ ਪ੍ਰੀਖਿਆਵਾਂ ਦਾ ਫੈਸਲਾ ਵਾਪਸ ਲੈ ਲਿਆ ਹੈ। ਪ੍ਰਯਾਗਰਾਜ ‘ਚ ਕਮਿਸ਼ਨ ਦੇ ਸਾਹਮਣੇ 4 ਦਿਨਾਂ ਤੋਂ ਖੜ੍ਹੇ 20 ਹਜ਼ਾਰ ਵਿਦਿਆਰਥੀਆਂ ਦੇ ਅੰਦੋਲਨ ਅੱਗੇ ਸਰਕਾਰ ਨੂੰ ਝੁਕਣਾ ਪਿਆ ਹੈ। ਕਮਿਸ਼ਨ ਦੇ ਸਕੱਤਰ ਅਸ਼ੋਕ ਕੁਮਾਰ ਵੀਰਵਾਰ ਦੁਪਹਿਰ ਕਰੀਬ 4 ਵਜੇ ਦਫ਼ਤਰ ਤੋਂ ਬਾਹਰ ਆਏ। ਉਨ੍ਹਾਂ ਕਿਹਾ, ‘ਯੂਪੀਪੀਐਸਸੀ ਇੱਕ ਦਿਨ ਵਿੱਚ ਮੁਢਲੀ ਪ੍ਰੀਖਿਆ ਕਰਵਾਏਗੀ। ਕਮਿਸ਼ਨ ਸਮੀਖਿਆ ਅਫਸਰ/ਸਹਾਇਕ ਸਮੀਖਿਆ ਅਫਸਰ (RO/ARO) ਪ੍ਰੀਖਿਆ-2023 ਲਈ ਇੱਕ ਕਮੇਟੀ ਬਣਾਏਗਾ। ਕਮੇਟੀ ਸਾਰੇ ਪਹਿਲੂਆਂ ‘ਤੇ ਵਿਚਾਰ ਕਰਕੇ ਆਪਣੀ ਵਿਸਤ੍ਰਿਤ ਰਿਪੋਰਟ ਪੇਸ਼ ਕਰੇਗੀ।
ਨਵੀਆਂ ਤਰੀਕਾਂ ਦਾ ਕੀਤਾ ਜਾਵੇਗਾ ਐਲਾਨ
ਇਸਦਾ ਮਤਲਬ ਹੈ ਕਿ ਪੀਸੀਐਸ ਪ੍ਰੀ ਅਤੇ ਆਰਓ/ਏਆਰਓ ਪ੍ਰੀ ਪ੍ਰੀਖਿਆ ਮੁਲਤਵੀ ਕਰ ਦਿੱਤੀ ਗਈ ਹੈ। ਪੀਸੀਐਸ ਦੀ ਪ੍ਰੀਖਿਆ 7 ਅਤੇ 8 ਦਸੰਬਰ ਨੂੰ ਹੋਣੀ ਸੀ, ਜਦੋਂ ਕਿ RO/ARO ਪ੍ਰੀਖਿਆ 22 ਅਤੇ 23 ਦਸੰਬਰ ਨੂੰ ਪ੍ਰਸਤਾਵਿਤ ਸੀ। ਹੁਣ ਨਵੀਆਂ ਤਰੀਕਾਂ ਦਾ ਐਲਾਨ ਕੀਤਾ ਜਾਵੇਗਾ।
ਵਿਦਿਆਰਥਣਾਂ ਨਾਲ ਕੀਤਾ ਦੁਰਵਿਵਹਾਰ
ਸਰਕਾਰ ਅਤੇ ਕਮਿਸ਼ਨ ਦੇ ਬੈਕਫੁੱਟ ‘ਤੇ ਹੋਣ ਤੋਂ ਬਾਅਦ ਵੀ ਵਿਦਿਆਰਥੀ ਕਮਿਸ਼ਨ ਦੇ ਬਾਹਰ ਖੜ੍ਹੇ ਹਨ। ਅੱਜ ਸਵੇਰੇ ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ਅਤੇ ਪੁਲਿਸ ਮੁਲਾਜ਼ਮਾਂ ਵਿਚਾਲੇ ਝੜਪ ਹੋ ਗਈ। ਸਾਦੀ ਵਰਦੀ ਵਿੱਚ ਪੁਲਿਸ ਮੁਲਾਜ਼ਮ ਪ੍ਰਦਰਸ਼ਨ ਕਰ ਰਹੇ ਵਿਦਿਆਰਥੀਆਂ ਨੂੰ ਜ਼ਬਰਦਸਤੀ ਚੁੱਕਣ ਲਈ ਆਏ ਸਨ। ਪੁਲਿਸ ਨੂੰ ਦੇਖਦੇ ਹੀ ਵਿਦਿਆਰਥੀ ਇਕ-ਦੂਜੇ ‘ਤੇ ਲੇਟ ਗਏ। ਵਿਦਿਆਰਥੀਆਂ ਦਾ ਕਹਿਣਾ ਹੈ ਕਿ ਪੁਲਿਸ ਮੁਲਾਜ਼ਮਾਂ ਨੇ ਵਿਦਿਆਰਥਣਾਂ ਨਾਲ ਦੁਰਵਿਵਹਾਰ ਵੀ ਕੀਤਾ।
ਪੁਲਿਸ ਦੀ ਇਸ ਕਾਰਵਾਈ ਤੋਂ ਵਿਦਿਆਰਥੀ ਭੜਕੇ ਹੋਏ ਹਨ। ਕਰੀਬ ਇੱਕ ਘੰਟੇ ਵਿੱਚ 10 ਹਜ਼ਾਰ ਤੋਂ ਵੱਧ ਵਿਦਿਆਰਥੀ ਕਮਿਸ਼ਨ ਦੇ ਨੇੜੇ ਪਹੁੰਚ ਗਏ। ਪੁਲਿਸ ਨੇ ਬੈਰੀਕੇਡ ਲਗਾ ਕੇ ਕਮਿਸ਼ਨ ਨੂੰ ਜਾਣ ਵਾਲੀ ਸੜਕ ਨੂੰ ਸੀਲ ਕਰ ਦਿੱਤਾ ਸੀ। ਪ੍ਰਦਰਸ਼ਨਕਾਰੀ ਵਿਦਿਆਰਥੀਆਂ ਨੇ ਬੈਰੀਕੇਡ ਤੋੜ ਦਿੱਤੇ। ਵਿਦਿਆਰਥੀ ਕਮਿਸ਼ਨ ਦੇ ਗੇਟ ’ਤੇ ਪੁੱਜੇ ਹੋਏ ਸਨ।
ਰਾਹੁਲ ਗਾਂਧੀ ਨੇ ਐਕਸ ‘ਤੇ ਕੀਤਾ ਪੋਸਟ
ਰਾਹੁਲ ਗਾਂਧੀ ਨੇ ਐਕਸ ‘ਤੇ ਵਿਦਿਆਰਥੀਆਂ ਦਾ ਮੁੱਦਾ ਉਠਾਇਆ। ਉਨ੍ਹਾਂ ਨੇ ਲਿਖਿਆ, ‘ਵਿਦਿਆਰਥੀਆਂ ਨੂੰ ਭਾਜਪਾ ਸਰਕਾਰ ਦੀ ਅਯੋਗਤਾ ਦੀ ਕੀਮਤ ਕਿਉਂ ਚੁਕਾਉਣੀ ਚਾਹੀਦੀ ਹੈ ਜੋ ਸਿੱਖਿਆ ਪ੍ਰਣਾਲੀ ਨੂੰ ਤਬਾਹ ਕਰਨ ‘ਤੇ ਲੱਗੀ ਹੋਈ ਹੈ? ਜਿਹੜੇ ਵਿਦਿਆਰਥੀ ‘ਪੜ੍ਹਾਈ’ ਕਰ ਰਹੇ ਸਨ, ਉਨ੍ਹਾਂ ਨੂੰ ਸੜਕਾਂ ‘ਤੇ ‘ਲੜਨ’ ਲਈ ਮਜਬੂਰ ਕੀਤਾ ਗਿਆ ਹੈ ਅਤੇ ਹੁਣ ਪੁਲਿਸ ਦੁਆਰਾ ਉਨ੍ਹਾਂ ਨੂੰ ਤੰਗ ਕੀਤਾ ਜਾ ਰਿਹਾ ਹੈ। ਅਸੀਂ ਨੌਜਵਾਨਾਂ ਨਾਲ ਇਸ ਬੇਇਨਸਾਫੀ ਨੂੰ ਬਰਦਾਸ਼ਤ ਨਹੀਂ ਕਰਾਂਗੇ।
